തെലുങ്ക് നടൻ ആണെങ്കിലും മലയാളികൾക്ക് ഏറെ പ്രിയപ്പെട്ട നടനാണ് അല്ലു അർജുൻ, അല്ലുവിന്റെ ഇപ്പോൾ ഇറങ്ങിയ അങ്ങ് വൈകുണ്ഠപുരത്ത് ചിത്രങ്ങള്‍ കേരളത്തിലും വന്‍ വിജയമാണ് അങ്ങ് വെെകുണ്ഠപുരത്തിനും വന്‍ വരവേല്‍പ്പാണ് കേരളം നല്‍കിയത്. എന്നാല്‍ മൊഴിമാറ്റമല്ലാതെ തന്നെ മലയാളത്തില്‍ ഒരു സിനിമ ചെയ്യണമെന്നാണ് തന്‍റെ ആഗ്രഹമെന്ന് അല്ലു അര്‍ജുന്‍ പറയുന്നു. മലയാളം ചിത്രം ചെയ്യണമെന്ന് ആത്മാര്‍ത്ഥമായ ആഗ്രഹം തനിക്കുണ്ട്. വെറുതെ പറയുന്നതല്ല. കഴിഞ്ഞ 10 വര്‍ഷത്തിനിടെ പലപ്പോഴും താന്‍ ഇത് പറഞ്ഞിട്ടുണ്ടെന്നും അല്ലു അര്‍ജുന്‍ പറയുന്നു. മനോരമയ്ക്ക് നല്‍കിയ അഭിമുഖത്തിലായിരുന്നു താരത്തിന്‍റെ പ്രതികരണം. നല്ലൊരു പ്രോജക്ട് തന്നെ തേടി എപ്പോള്‍ വരുന്നോ അപ്പോള്‍ അത് ചെയ്തിരിക്കുമെന്നും അല്ലു അര്‍ജുന്‍ പറയുന്നു.
മികച്ച സംവിധായകന്‍, തിരക്കഥാകൃത്ത് അങ്ങനെ പ്രതിഭകളുടെ ഒരു കൂട്ടായ്മയാണ് താന്‍ കാത്തിരിക്കുന്നതെന്നും താരം പറഞ്ഞു. മലയാളത്തിനൊപ്പം തെലുങ്കിലും റിലീസ് ചെയ്യാന്‍ സാധിക്കുന്ന ഒരു ദ്വിഭാഷാ ചിത്രമാണ് തന്‍റെ സ്വപ്നമെന്നും അല്ലു അര്‍ജുന്‍ പറഞ്ഞു. മലയാളത്തിലെ യുവനടന്മാരായ ഫഹദ് ഫാസില്‍, നിവിന്‍ പോളി, ദുല്‍ഖര്‍ സല്‍മാന്‍ എന്നിവരുടെ എല്ലാ ചിത്രങ്ങളും കാണാറുണ്ടെന്നും അല്ലു അര്‍ജുന്‍ പറഞ്ഞു. അടുത്തിടെ കണ്ടതില്‍ ഏറ്റവും ഇഷ്ടമായത് കുമ്പളങ്ങി നെെറ്റ്സ് ആണെന്നും താരം വ്യക്തമാക്കി. ഭാവി പ്രതീക്ഷ നല്‍കുന്ന നല്ല യുവ സംവിധായകര്‍ മലയാളത്തിലുണ്ടെന്നാണ് താരത്തിന്‍റെ അഭിപ്രായം.
അതേസമയം, മമ്മൂട്ടിയോടും മോഹന്‍ലാലിനോടും തനിക്ക് ആദരവുണ്ടെന്നും രണ്ടുപേരും രാജ്യത്തെ തന്നെ മികച്ച അഭിനേതാക്കളാണെന്നും പക്ഷെ വ്യക്തിപരമായി തനിക്ക് ഇഷ്ടം മോഹന്‍ലാലിനോടാണെന്നും അല്ലു അര്‍ജുന്‍ പറഞ്ഞു. അദ്ദേഹത്തിന്‍റെ ലാളിത്യമാണ് അതിന് കാരണമായി അല്ലു ചൂണ്ടിക്കാണിക്കുന്നത്.
