# ഇന്ത്യൻ ബോക്സ് ഓഫീസിൽ വമ്പൻ കുതിപ്പ്; കളക്ഷനിൽ റെക്കോർഡിട്ട് ‘സ്പൈഡർമാൻ: ബ്രാൻഡ് ന്യൂ ഡേ’

- Link: https://ml.b4blaze.com/film-news/%e0%b4%87%e0%b4%a8%e0%b5%8d%e0%b4%a4%e0%b5%8d%e0%b4%af%e0%b5%bb-%e0%b4%ac%e0%b5%8b%e0%b4%95%e0%b5%8d%e0%b4%b8%e0%b5%8d-%e0%b4%93%e0%b4%ab%e0%b5%80%e0%b4%b8%e0%b4%bf%e0%b5%bd-%e0%b4%b5%e0%b4%ae
- Published: 2026-08-06T13:09:45+05:30
- Author: Sana Fathima

ബോക്സ് ഓഫീസിലെ കളക്ഷനാണ് ഇന്ന് ഒരു സിനിമയുടെ വിജയത്തിന്റെ പ്രധാന മാനദണ്ഡമായി കണക്കാക്കപ്പെടുന്നത്.
സമീപകാലത്ത് ഇന്ത്യൻ ഭാഷാ ചിത്രങ്ങൾ മാത്രമല്ല, ഹോളിവുഡ് സിനിമകളും രാജ്യത്തെ പ്രേക്ഷകരിൽ
നിന്ന് മികച്ച സ്വീകരണം നേടുന്നുണ്ട്. ആ നിരയിൽ ഏറ്റവും പുതിയതായി ഇടംപിടിച്ചിരിക്കുന്നത്‘
സ്പൈഡർമാൻ: ബ്രാൻഡ് ന്യൂ ഡേ’ ആണ്. റിലീസ് ദിനത്തിൽ തന്നെ റെക്കോർഡ് ഓപ്പണിംഗ് നേടിയ
ചിത്രം ഇന്ത്യയിലും ശ്രദ്ധേയമായ മുന്നേറ്റം തുടരുകയാണ്.

ചിത്രത്തിന്റെ ഇന്ത്യൻ വിതരണക്കാരായ സോണി പിക്ചേഴ്സ് പുറത്തുവിട്ട കണക്കുകൾ പ്രകാരം,
റിലീസ് ദിനമായ ജൂലൈ 30-ന് ചിത്രം 73 കോടി രൂപയുടെ ഗ്രോസ് കളക്ഷൻ നേടിയിരുന്നു. ഇന്ത്യയിൽ
ഒരു ഹോളിവുഡ് ചിത്രത്തിന് ലഭിച്ച എക്കാലത്തെയും മികച്ച ഓപ്പണിംഗായാണ് ഇത് രേഖപ്പെടുത്തപ്പെട്ടത്.

ഇതിന് പിന്നാലെ ചിത്രത്തിന്റെ കളക്ഷൻ കൂടുതൽ ശക്തമായി ഉയർന്നു. സോണി പിക്ചേഴ്സ് ഇന്ത്യ
പുറത്തുവിട്ട ഏറ്റവും പുതിയ കണക്കുകൾ പ്രകാരം, ചിത്രത്തിന്റെ ഇന്ത്യയിലെ ആകെ ഗ്രോസ്
കളക്ഷൻ 380.78 കോടി രൂപയിലെത്തിയിരിക്കുകയാണ്. റിലീസിന് പിന്നാലെ തുടർച്ചയായി മികച്ച
പ്രതികരണമാണ് ചിത്രം ബോക്സ് ഓഫീസിൽ നേടുന്നത്. പ്രമുഖ ടിക്കറ്റ് ബുക്കിംഗ് പ്ലാറ്റ്ഫോമായ
ബുക്ക് മൈ ഷോയിൽ നിലവിൽ മണിക്കൂറിൽ 60,000-ത്തിലധികം ടിക്കറ്റുകൾ വിറ്റഴിയുന്നതായും
റിപ്പോർട്ടുകളുണ്ട്. ഇതും ചിത്രത്തിന്റെ ജനപ്രീതി വ്യക്തമാക്കുന്ന സൂചനയായാണ് വിലയിരുത്തപ്പെടുന്നത്.

കൊളംബിയ പിക്ചേഴ്സ്, മാർവൽ സ്റ്റുഡിയോസ്, പാസ്കൽ പിക്ചേഴ്സ് എന്നിവർ ചേർന്നാണ് ചിത്രം
നിർമ്മിച്ചിരിക്കുന്നത്. ‘ഷാങ്-ചി ആൻഡ് ദി ലെജൻഡ് ഓഫ് ദി ടെൻ റിംഗ്സ്’ എന്ന ചിത്രത്തിന്റെ
സംവിധായകനായ ഡെസ്റ്റിൻ ഡാനിയൽ ക്രെറ്റൺ ആണ് ‘സ്പൈഡർമാൻ: ബ്രാൻഡ് ന്യൂ ഡേ’ സംവിധാനം 
ചെയ്തിരിക്കുന്നത്. ക്രിസ് മക്കെന്നയും എറിക് സോമേഴ്സും ചേർന്നാണ് തിരക്കഥ ഒരുക്കിയത്.
ടോം ഹോളണ്ട് സ്പൈഡർമാനായി എത്തുന്ന ചിത്രത്തിൽ സെൻഡയ, സാഡി സിങ്ക്, ജേക്കബ് ബറ്റലോൺ,
ജോൺ ബെർന്താൽ, ഫ്ലോറൻസ് പ്യൂ, ട്രമെൽ ടിൽമാൻ, മരിസ ടോമെയ്, മാർക്ക് റഫലോ എന്നിവരാണ്
മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.