# ‘ജനനായകൻ’ വഴിമാറി; കേസ് നേരത്തെ വിളിച്ച് നിഖില വിമൽ

- Link: https://ml.b4blaze.com/film-news/jananayakan-changes-course-nikhila-vimal-calls-for-early-dismissal-of-case
- Published: 2026-01-08T11:28:02+05:30
- Author: Soorya S

സൂപ്പർ താരം വിജയ്‍യുടെ ബിഗ് ബജറ്റ് ചിത്രം ‘ജനനായകൻ’ റിലീസ് മാറ്റിവെച്ചതോടെ മലയാള
സിനിമയായ ‘പെണ്ണു കേസ്’ നേരത്തെ തിയറ്ററുകളിലെത്തുന്നു. സെൻസർ ബോർഡുമായുള്ള നിയമതർക്കത്തെത്തുടർന്ന്
വിജയ്‍ ചിത്രത്തിന്റെ റിലീസ് അനിശ്ചിതത്വത്തിലായ സാഹചര്യം കണക്കിലെടുത്താണ് നിഖില വിമൽ
നായികയാകുന്ന ഈ ചിത്രം ജനുവരി 10-ന് റിലീസ് ചെയ്യാൻ തീരുമാനിച്ചത്. നേരത്തെ വലിയ തമിഴ്
ചിത്രങ്ങളുടെ റിലീസ് പരിഗണിച്ച് മലയാളത്തിലെ പല ചിത്രങ്ങളും തീയതി മാറ്റിയിരുന്നുവെങ്കിലും,
അപ്രതീക്ഷിതമായി ലഭിച്ച ഈ അവസരം മുതലെടുക്കുകയാണ് അണിയറപ്രവർത്തകർ.

‘കേസ് നേരത്തെ വിളിച്ചു’ എന്ന രസകരമായ ടാഗ്‌ലൈനോടു കൂടിയ പോസ്റ്റർ പങ്കുവെച്ചുകൊണ്ടാണ്
സിനിമയുടെ പുതിയ റിലീസ് തീയതി നിർമ്മാതാക്കൾ പ്രഖ്യാപിച്ചത്. ജനുവരി 10-ന് ചിത്രം തിയറ്ററുകളിൽ
എത്തുന്നതിന് മുന്നോടിയായി, ജനുവരി 9-ന് തന്നെ ചിത്രത്തിന്റെ പെയ്ഡ് പ്രിവ്യൂ ഷോകളും
സംഘടിപ്പിക്കുന്നുണ്ട്. തമിഴ് സിനിമയുടെ റിലീസ് നീട്ടിയതോടെ ഒഴിഞ്ഞു കിടക്കുന്ന തിയറ്ററുകൾ
പരമാവധി പ്രയോജനപ്പെടുത്തുക എന്നതാണ് ഈ നീക്കത്തിലൂടെ ലക്ഷ്യമിടുന്നത്.

നവാഗതനായ ഫെബിൻ സിദ്ധാർത്ഥ് സംവിധാനം ചെയ്യുന്ന ‘പെണ്ണു കേസ്’ ഒരു ഫാമിലി എന്റർടെയ്‌നറാണെന്നാണ്
സൂചന. ഒരു വിവാഹത്തട്ടിപ്പുകാരിയായാണ് നിഖില വിമൽ ചിത്രത്തിൽ വേഷമിടുന്നത്. ഹക്കീം 
ഷാജഹാൻ, അജു വർഗ്ഗീസ്, രമേശ് പിഷാരടി തുടങ്ങിയ പ്രമുഖ താരനിരയും ചിത്രത്തിന്റെ ഭാഗമാണ്.
ഇ4 എക്സിപിരിമെന്റ്സ്, സീ സ്റ്റുഡിയോസ്, ലണ്ടൻ ടാക്കീസ് എന്നീ ബാനറുകൾ സംയുക്തമായാണ്
ചിത്രം നിർമ്മിച്ചിരിക്കുന്നത്.

വിജയ് ചിത്രം കാണാനായി കാത്തിരുന്ന ആരാധകർക്ക് റിലീസ് മാറ്റിയത് വലിയ നിരാശയാണ് നൽകിയിരിക്കുന്നത്.
എന്നാൽ ആ ഒഴിവിലേക്ക് മികച്ചൊരു മലയാള ചിത്രം എത്തുന്നത് തിയറ്റർ ഉടമകൾക്കും പ്രേക്ഷകർക്കും
ഒരുപോലെ ആശ്വാസമാകും. സെൻസർ തർക്കങ്ങൾ പരിഹരിച്ച് ‘ജനനായകൻ’ എന്ന് തിയറ്ററുകളിലെത്തും
എന്ന കാര്യത്തിൽ കോടതി വിധിയോടെ മാത്രമേ കൂടുതൽ വ്യക്തത ലഭിക്കൂ.