# നിന്റെ സമ്മതമില്ലാതെ നീ ഗർഭം ധരിച്ചാൽ അത് വേണ്ടെന്ന് വെക്കാനുള്ള സ്വാതന്ത്ര്യം നിനക്കുണ്ട്; അച്ഛന്റെ കത്ത് പങ്കുവെച്ച്‌ കനി കുസൃതി

- Link: https://ml.b4blaze.com/film-news/kani-kusurthi-shared-her-father-birthday-gift
- Published: 2020-07-20T15:18:41+05:30
- Author: Rahul

നടി മോഡൽ എന്നീ മേഖലകളിൽ പ്രശസ്തയായ താരമാണ് കനി കുസൃതി. സാമൂഹ്യ പ്രവര്‍ത്തകരായ മൈത്രേയന്റെയും
ഡോ എകെ ജയശ്രീയുടെയും മകളാണ് താരം, വ്യത്യസ്തമായ ഫോട്ടോഷൂട്ട് ചിത്രങ്ങൾ താരം മിക്കപ്പോഴും
പങ്കുവെക്കാറുണ്ട്. ഇപ്പോൾ തനിക്ക് പതിനെട്ടാം വയസ്സിൽ അച്ഛൻ പിറന്നാൾ സമ്മാനമായി നൽകിയ
കത്ത് പങ്കുവക്കുകയാണ് താരം. സമൂഹത്തിലെ വ്യത്യസ്തങ്ങളായ ജാതിമത വ്യത്യാസങ്ങല്കും വേര്തിരിവുകൾക്കും
എതിരെ ശക്തമായി പ്രതിഷേധിക്കണം എന്ന് അച്ഛൻ കനിയോട് കത്തിൽ കൂടി പറയുന്നു. കത്തിലെ 
ചില പ്രസക്ത ഭാഗങ്ങള്‍ ഇങ്ങനെയാണ്.

‘എന്റെ പ്രിയമുള്ള മകള്‍ കനിക്ക്,

ഇന്ന് നിനക്ക് 18 വയസ്സ് തികയുകയാണ്. ഇന്ത്യന്‍ ഭരണഘടനാപരമായി സ്വതന്ത്രമായി തീരുമാനം
എടുക്കാന്‍ അവകാശമുള്ള ഒരു വ്യക്തിയായി നീ മാറിയിരിക്കുന്നു. ഈ സന്ദര്‍ഭത്തില്‍ നിന്റെ
അവകാശങ്ങള്‍ക്കും ഉത്തരവാദിത്വങ്ങള്‍ക്കും ഒപ്പം നിന്നെ വളര്‍ത്താന്‍ ഒരു പ്രധാന പങ്കുവഹിച്ച
വ്യക്തി എന്ന നിലയില്‍ നിനക്ക് ചില പിന്തുണകളും വാഗ്ദാനങ്ങളായി ഞാന്‍ നല്‍കുകയാണ്.

![kani](https://i0.wp.com/ml.b4blaze.com/wp-content/uploads/2020/07/kani.jpg?resize
=595%2C594&ssl=1)

വ്യത്യസ്തങ്ങളായ ജാതിമത വിശ്വാസങ്ങളുടെയും, വര്‍ഗ്ഗ,വംശ, രാഷ്ട്രീയ വേര്‍തിരുവുകളുടെയും,
പുരുഷ മേധാവിത്വ മൂല്യങ്ങളുടെയും സമ്മിശ്ര സംസ്‌കാര സമൂഹത്തില്‍ വേണം നീ ഇനി മുതല്‍
ഒരു സ്വതന്ത്ര്യ വ്യക്തിയായി ജീവിക്കാന്‍. ഇവിടെ കാലുറപ്പിക്കാന്‍ എളുപ്പമല്ല. അതില്‍
ഏത് ശരി, ഏത് തെറ്റ് എന്ന് സംശമുണര്‍ത്തുന്ന സന്ദര്‍ഭങ്ങളില്‍ ഒന്ന് മറിച്ചു നോക്കാനാണ്
ഈ കുറിപ്പ് നിനക്ക് ഞാന്‍ നല്‍കുന്നത്.

സ്ത്രീകളെ രണ്ടാം തരം പൗരന്മാരായി കണ്ട് പുരുഷന്മാരെ നിയന്ത്രിക്കാന്‍ തരത്തില്‍ രൂപപ്പെടുത്തിയ
മൂല്യങ്ങളും നിയമങ്ങളുമാണ് ഈ സമൂഹത്തില്‍ ഭൂരിപക്ഷം ഉള്ളത്. സ്ത്രീകളെ നിയന്ത്രിക്കാന്‍
അവരുടെ ലൈംഗിക അവകാശങ്ങളെ കവര്‍ന്നെടുക്കുകയാണ് പുരുഷന്മാര്‍ ചെയ്ത് വന്നത്. നിന്റെ
സ്വാതന്ത്ര്യ ബോധം പുരുഷസമൂഹത്തിന്റെ മൂല്യ ബോധത്തിനെതിരാണ്. അതിനാല്‍ അതിന്റെ അടികളേല്‍ക്കാന്‍
ധാരാളം സന്ദര്‍ഭങ്ങള്‍ ജീവിതത്തില്‍ ഉണ്ടാവുമെന്ന് ഞാന്‍ തിരിച്ചറിയുന്നു. ആ അടികളുടെ
രൂക്ഷത കുറക്കാന്‍ എന്റെ ഇനിയുള്ള വാഗ്ദാനങ്ങള്‍ ശാരീരികവും മാനസികവുമായ ശക്തി പകരുമെന്ന്
ഞാന്‍ കരുതുന്നു.

വീട് വിട്ട് പോകാനും മാറി താമസിക്കാനുമുള്ള നിന്റെ അവകാശത്തിനു പിന്തുണ പ്രഖ്യാപിക്കുന്നു.
ഇഷ്ടപെടുന്ന വ്യക്തിയുമായി അത് ആണായാലും പെണ്ണായാലും സങ്കര വര്‍ഗമായാലും ലൈംഗിക ബന്ധത്തില്‍
ഏര്‍പ്പെടാന്‍ നിനക്കുള്ള അവകാശത്തിനും പിന്തുണ നല്‍കുന്നു

![kani 2](https://i0.wp.com/ml.b4blaze.com/wp-content/uploads/2020/07/kani-2.jpg?
resize=587%2C600&ssl=1)

ഗര്‍ഭം ധരിക്കാനും പ്രസവിക്കാനുമുള്ള നിന്റെ അവകാശം ഒരു പുരുഷന്റെ സംരക്ഷണം മാത്രം 
പരിമിതപ്പെടുത്തുന്ന ഇന്നത്തെ നടപ്പിന് വിരുദ്ധമായി നിനക്കത് സ്വതന്ത്രമായി ചെയ്യാന്‍
എല്ലാ സഹായവും വാഗ്ദാനം ചെയ്യുന്നു.

നിനക്ക് ഇഷ്ടമുള്ള വസ്ത്രങ്ങള്‍ ധരിക്കാനുള്ള അവകാശത്തിനും പിന്തുണ നല്‍കുന്നു. നിന്റെ
ഇഷ്ടത്തിന് വിരുദ്ധമായി ഗര്‍ഭം ധരിക്കുവാന്‍ ഇടവരികയാണെങ്കില്‍ അത് വേണ്ട എന്ന് വയ്ക്കാന്‍
നിനക്ക് അവകാശമുണ്ട്. തിരഞ്ഞെടുത്ത ഇണയെ പിന്നീട് വേണ്ടെന്നു വയ്ക്കാനുള്ള അവകാശത്തിനു
പിന്തുണ നല്‍കുന്നു

ഒരേ സമയം ഒന്നിലധികം പേരോട് പ്രണയം തോന്നാം അങ്ങനെ തോന്നുന്നത് സ്വാഭാവികമാണെന്ന് മനസിലാക്കി
അതിനും പിന്തുണ നല്‍കുന്നു. ആരോടും പ്രേമം തോന്നുന്നില്ല അതിനാല്‍ ഒറ്റയ്ക്ക് കഴിയാനാണ്
തീരുമാനം എങ്കില്‍ അതിനും പിന്തുണ നല്‍കുന്നു. മദ്യംകഴിക്കാനും പുകവലിക്കാനും മറ്റേതൊരു
വ്യക്തിയെ പോലെ നിനക്കും അവകാശമുണ്ട്. നിനക്ക് ഇഷ്ടമുള്ള പ്രവര്‍ത്തി ചെയ്തു ജീവിക്കാന്‍
പരിപൂര്‍ണ പിന്തുണ വാഗ്ദാനം ചെയ്യുന്നു.

ബലാത്സംഗത്തിന് വിധേയയായാല്‍ അതിനെ അക്രമം എന്ന് കണ്ട്, ഉളവാക്കിയ സ്‌തോഭത്തെ മറികടക്കാനുള്ള
ആര്‍ജ്ജവം നേടിയെടുക്കണം.

മറ്റുള്ളവര്‍ക്ക് അസ്വസ്ഥതകളും ഹാനിയും ഉണ്ടാക്കുന്നതിനാല്‍ പുകവലി ശീലമാക്കരുതെന്ന്
അഭ്യര്‍ത്ഥിക്കുന്നു. മദ്യം വേണമെന്നുണ്ടെങ്കില്‍ അത് മിതമായി ഉപയോഗിക്കുവാന്‍ ശീലിക്കുക.
പക്ഷെ കുറ്റവാളിയെ പോലെ രഹസ്യമായി ചെയ്യരുത്.’

https://www.instagram.com/p/CC0HQPPnV2g/?utm_source=ig_web_button_share_sheet