# മമ്മൂട്ടിയെ കണ്ട് കണ്ണുനിറഞ്ഞ് കണ്ണൻ സാഗർ; ‘എനിക്ക് കിട്ടിയ പുതിയൊരു ജന്മത്തിന്റെ അനുഗ്രഹം’!

- Link: https://ml.b4blaze.com/film-news/kannan-sagars-eyes-welled-up-upon-seeing-mammootty-a-blessing-of-a-new-lease-on-life
- Published: 2026-11-16T14:49:49+05:30
- Author: Soorya S

ഹൃദയ ശസ്ത്രക്രിയയ്ക്കു ശേഷം ജീവിതത്തിലേക്ക് തിരിച്ചെത്തിയ നടനും മിമിക്രി കലാകാരനുമായ
കണ്ണൻ സാഗർ, തന്റെ ചികിത്സയ്ക്ക് സഹായമൊരുക്കിയ മെഗാസ്റ്റാർ മമ്മൂട്ടിയെ നേരിൽ കണ്ട്
നന്ദി അറിയിച്ചു. പനങ്ങാടിലെ ‘മേള’ സിനിമയുടെ ലൊക്കേഷനിൽ എത്തിയ താരം മമ്മൂട്ടിയുടെ
കാൽ തൊട്ട് വണങ്ങുകയും, തനിക്ക് പുനർജന്മം നൽകിയ അദ്ദേഹത്തോടുള്ള സ്നേഹം വൈകാരികമായി
പങ്കുവെക്കുകയും ചെയ്തു. രമേശ് പിഷാരടിയുടെയും ‘കെയർ ആൻഡ് ഷെയർ’ ഫൗണ്ടേഷന്റെയും രാജഗിരി
ആശുപത്രിയിലെ ഡോക്ടർമാരുടെയും പിന്തുണയോടെയാണ് തന്റെ ചികിത്സയും ഈ കൂടിക്കാഴ്ചയും സാധ്യമായതെന്ന്
കണ്ണൻ സാഗർ വ്യക്തമാക്കി.

മമ്മൂട്ടിയുടെ മുന്നിൽ നിന്നപ്പോൾ വാക്കുകൾ മുറിഞ്ഞെന്നും കണ്ണ് നിറഞ്ഞുപോയെന്നും താരം
ഓർക്കുന്നു. “വേദനകളൊക്കെ കഴിഞ്ഞു, ഇനി പഴയതുപോലെ ചിരിച്ചും ചിരിപ്പിച്ചും സിനിമയിൽ
വീണ്ടും സജീവമാകണം” എന്ന് മമ്മൂട്ടി സ്നേഹത്തോടെ പറഞ്ഞത് തനിക്ക് ലഭിച്ച വലിയൊരു അനുഗ്രഹമാണെന്ന്
കണ്ണൻ സാഗർ കുറിച്ചു. രാജഗിരി ആശുപത്രിയിലെ ഡോക്ടർമാർക്കും തനിക്കായി കൂടെനിന്ന എല്ലാവർക്കും
ഹൃദയപൂർവ്വം നന്ദി അറിയിച്ച താരം, താൻ വീണ്ടും ആരാധകരുടെ സ്നേഹത്തിലേക്കും സിനിമയിലേക്കും
മടങ്ങിവരുമെന്നും വ്യക്തമാക്കി.