# സച്ചിനും റീനുവും ഇനി വരില്ല; ‘പ്രേമലു 2’ ഉപേക്ഷിച്ചുവെന്ന് റിപ്പോർട്ട്

- Link: https://ml.b4blaze.com/film-news/sachin-and-reenu-will-not-be-coming-again-report-says-premalu-2-has-been-abandoned
- Published: 2026-02-04T10:06:14+05:30
- Author: Soorya S

കൊച്ചി: മലയാള സിനിമയിലെ എക്കാലത്തെയും വലിയ വിജയങ്ങളിലൊന്നായ ‘പ്രേമലു’വിന്റെ രണ്ടാം
ഭാഗം കാത്തിരുന്ന ആരാധകർക്ക് നിരാശ പകർന്ന് പുതിയ റിപ്പോർട്ടുകൾ. ചിത്രത്തിന്റെ രണ്ടാം
ഭാഗം പൂർണ്ണമായും ഉപേക്ഷിച്ചതായാണ് സിനിമാ വൃത്തങ്ങളിൽ നിന്നുള്ള സൂചന. തിരക്കഥയുമായി
ബന്ധപ്പെട്ട അഭിപ്രായ വ്യത്യാസങ്ങളാണ് ചിത്രത്തിന് തിരിച്ചടിയായതെന്നാണ് വിവരം.

തിരക്കഥയിലെ തർക്കം വില്ലനായി?
 2024 ഏപ്രിലിൽ ചിത്രത്തിന്റെ വിജയാഘോഷത്തിനിടെയാണ് 
സംവിധായകൻ ഗിരീഷ് എ.ഡി രണ്ടാം ഭാഗം ഔദ്യോഗികമായി പ്രഖ്യാപിച്ചത്. എന്നാൽ പ്രഖ്യാപനം
കഴിഞ്ഞ് രണ്ട് വർഷത്തോളമാകുമ്പോഴും സിനിമയുടെ ജോലികൾ പുരോഗമിച്ചിരുന്നില്ല. തിരക്കഥയിൽ
വരുത്തേണ്ട മാറ്റങ്ങളെച്ചൊല്ലി അണിയറപ്രവർത്തകർക്കിടയിൽ രൂപപ്പെട്ട തർക്കം ഒടുവിൽ സിനിമ
തന്നെ വേണ്ടെന്നുവെക്കുന്ന നിലയിലേക്ക് കാര്യങ്ങളെ എത്തിച്ചുവെന്നാണ് റിപ്പോർട്ട്.

നേരത്തെ ഒരു അഭിമുഖത്തിൽ നിർമ്മാതാക്കളിലൊരാളായ ദിലീഷ് പോത്തൻ ചിത്രത്തിന്റെ അനിശ്ചിതത്വത്തെക്കുറിച്ച്
സൂചന നൽകിയിരുന്നു. സാങ്കേതിക കാരണങ്ങളാൽ ചിത്രം വൈകുമെന്നും ഗിരീഷ് എ.ഡി മറ്റൊരു സിനിമയുടെ
തിരക്കിലാണെന്നുമായിരുന്നു അന്നത്തെ വിശദീകരണം.

ബോക്സ് ഓഫീസിലെ വിസ്മയം
 കേവലം 12.50 കോടി രൂപ മുതൽമുടക്കിൽ നിർമ്മിച്ച പ്രേമലു ആഗോളതലത്തിൽ
135 കോടിയിലധികം രൂപയാണ് ബോക്സ് ഓഫീസിൽ നിന്ന് സ്വന്തമാക്കിയത്. ഹൈദരാബാദിന്റെ പശ്ചാത്തലത്തിൽ
ഒരുങ്ങിയ ചിത്രം തെലുങ്കിലും തമിഴിലും വലിയ തരംഗമുണ്ടാക്കിയിരുന്നു. നസ്‌ലിൻ – മമിത
ബൈജു കൂട്ടുകെട്ടിന്റെ പ്രകടനം തന്നെയായിരുന്നു ചിത്രത്തിന്റെ വിജയരഹസ്യം.

പുതിയ പ്രോജക്റ്റുമായി ഗിരീഷ് എ.ഡി
 പ്രേമലു 2 മുടങ്ങിയതോടെ ഗിരീഷ് എ.ഡി തന്റെ പുതിയ
ചിത്രത്തിലേക്ക് കടന്നിരിക്കുകയാണ്. നിവിൻ പോളി നായകനാകുന്ന ‘ബത്‌ലഹേം കുടുംബ യൂണിറ്റ്’
ആണ് ഇനി പുറത്തിറങ്ങാനുള്ള ചിത്രം. മമിത ബൈജു തന്നെയാണ് ഈ ചിത്രത്തിലും നായികയായെത്തുന്നത്.
പ്രേമലുവിന് തിരക്കഥയൊരുക്കിയ ഗിരീഷ് എ.ഡിയും കിരൺ ജോസിയും ചേർന്നാണ് ഈ സിനിമയുടെയും
രചന നിർവ്വഹിക്കുന്നത്. 2026 ഓണം റിലീസായി ചിത്രം തിയറ്ററുകളിൽ എത്തുമെന്നാണ് വിവരം.

പ്രേമലു 2 ഉപേക്ഷിച്ചതുമായി ബന്ധപ്പെട്ട് ഭാവന സ്റ്റുഡിയോസ് ഇതുവരെ ഔദ്യോഗിക പ്രതികരണം
നടത്തിയിട്ടില്ല. സച്ചിന്റെയും റീനുവിന്റെയും ഇനിയുള്ള പ്രണയകഥ വെള്ളിത്തിരയിൽ കാണാൻ
കാത്തിരുന്ന പ്രേക്ഷകർക്ക് ഈ വാർത്ത വലിയ ഞെട്ടലാണ് നൽകിയിരിക്കുന്നത്.