# കോവിഡ് കാലത്ത് മോദി സർക്കാർ നിസ്സംഗത പാലിച്ചു; രൂക്ഷ വിമർശനവുമായി മുതിർന്ന നടൻ നസറുദ്ദീൻ ഷാ!

- Link: https://ml.b4blaze.com/film-news/the-modi-government-remained-indifferent-during-the-covid-period-veteran-actor-naseeruddin-shah-levels-sharp-criticism
- Published: 2026-11-15T11:13:04+05:30
- Author: Soorya S

കോവിഡ്-19 മഹാമാരിയുടെ ഘട്ടത്തിലും ലോക്ഡൗൺ പ്രഖ്യാപന വേളയിലും നരേന്ദ്ര മോദി സർക്കാരിന്റെ
പ്രവർത്തനങ്ങളെ രൂക്ഷമായി വിമർശിച്ച് പ്രമുഖ നടൻ നസറുദ്ദീൻ ഷാ. ‘ട്രസ്റ്റ് ഇൻ എ ടൈം
ഓഫ് ക്രൈസിസ്’ എന്ന പുസ്തകത്തിന്റെ പ്രകാശനച്ചടങ്ങിൽ സംസാരിക്കവെയാണ് കോവിഡ് കാലത്തെ
സർക്കാരിന്റെ പ്രതിരോധ നടപടികളെയും മനോഭാവത്തെയും അദ്ദേഹം ചോദ്യം ചെയ്തത്. മഹാമാരിക്കാലത്ത്
സ്വന്തം ജീവൻ പോലും പണയംവെച്ച് പോരാടിയ ആരോഗ്യപ്രവർത്തകരെ അദ്ദേഹം ആദരിക്കുകയും ചെയ്തു.

2020 മാർച്ചിൽ രാജ്യവ്യാപകമായി ലോക്ഡൗൺ പ്രഖ്യാപിച്ചപ്പോൾ സർക്കാരിന്റെ ഭാഗത്തുനിന്നും
നിസ്സംഗമായ സമീപനമാണുണ്ടായതെന്ന് നസറുദ്ദീൻ ഷാ കുറ്റപ്പെടുത്തി. “എന്നിൽ നിന്ന് ഒരു
സഹായവും പ്രതീക്ഷിക്കേണ്ട, ഞാൻ എന്റെ താടിയും മുടിയും വളർത്താൻ പോകുന്നു എന്ന മനോഭാവമായിരുന്നു
സർക്കാരിന്റേത്” എന്ന് അദ്ദേഹം പരിഹസിച്ചു. മുതിർന്ന അഭിഭാഷക ഇന്ദിര ജയ്സിങ് എഴുതിയ
പുസ്തകത്തിന്റെ ആമുഖത്തിലെ വരികൾ ഉദ്ധരിച്ചുകൊണ്ടായിരുന്നു അദ്ദേഹത്തിന്റെ വിമർശനം.
പ്രതിസന്ധി ഘട്ടത്തിൽ ജനങ്ങളെ സഹായിക്കുന്നതിൽ ഭരണകൂടം പരാജയപ്പെട്ടുവെന്നും എന്നാൽ
കോവിഡ് പോരാട്ടത്തിനിടയിൽ ജീവൻ വെടിഞ്ഞ ആരോഗ്യപ്രവർത്തകർ രാജ്യത്തിന്റെ യഥാർത്ഥ രക്തസാക്ഷികളാണെന്നും
അദ്ദേഹം കൂട്ടിച്ചേർത്തു.