# “നിങ്ങൾക്ക് എന്തു വിലയുണ്ട്?”; കരൂർ ദുരന്തബാധിതരെ അപമാനിച്ച നടി വിനോദിനിക്കെതിരെ സനം ഷെട്ടി

- Link: https://ml.b4blaze.com/film-news/what-are-you-worth-sanam-shetty-slams-actress-vinodini-for-insulting-karur-disaster-victims
- Published: 2025-12-06T14:29:53+05:30
- Author: Soorya S

ചെന്നൈ: കരൂർ ദുരന്തത്തിൽപ്പെട്ടവരുടെ വേദനയെയും ദുരിതത്തെയും നിസ്സാരവൽക്കരിച്ച് സംസാരിച്ച
നടി വിനോദിനി വൈദ്യനാഥനെതിരെ രൂക്ഷവിമർശനവുമായി നടി സനം ഷെട്ടി രംഗത്ത്. പൊതുജനങ്ങൾക്ക്‘
വലിയ വിലയൊന്നുമില്ല’ എന്ന തരത്തിൽ വിനോദിനി നടത്തിയ പരാമർശങ്ങൾക്കെതിരെയാണ് സനം ഷെട്ടി
കടുത്ത ഭാഷയിൽ പ്രതികരിച്ചത്.

വിനോദിനിയുടെ വാക്കുകൾക്ക് പിന്നിൽ നടൻ വിജയിയെ അറസ്റ്റ് ചെയ്യാൻ സാധിക്കാത്തതിലുള്ള
നിരാശ മാത്രമാണുള്ളതെന്നും സനം ഷെട്ടി ആരോപിച്ചു.

വിനോദിനിയുടെ വിവാദ പരാമർശം:

പൊതുവിഷയങ്ങളിൽ ഇടപെടുന്നത് കുറച്ചതിനെക്കുറിച്ച് അടുത്തിടെ ഒരു അഭിമുഖത്തിൽ സംസാരിക്കവെയാണ്
വിനോദിനി വിവാദ പരാമർശം നടത്തിയത്. “ജനങ്ങൾക്ക് അത്ര വിലയൊന്നുമില്ലെന്ന് ഞാൻ മനസ്സിലാക്കി.
ഉദാഹരണത്തിന്, കരൂർ ദുരന്തത്തിൽ 41 പേരാണ് മരിച്ചത്. അവരുടെ കുടുംബം പോലും ആ വിഷയം 
മറന്ന് മുന്നോട്ടുപോയി എന്നാണ് തോന്നുന്നത്. അങ്ങനെ മറക്കുന്നവർക്ക് വേണ്ടി എന്തിന്
സംസാരിക്കണം?” എന്നായിരുന്നു വിനോദിനിയുടെ ചോദ്യം.

സനം ഷെട്ടിയുടെ വിമർശനം:

ദുരന്തബാധിതരോട് വിനോദിനി അനുകമ്പയില്ലാത്ത രീതിയിൽ സംസാരിക്കുന്നത് മനസാക്ഷിക്കുറവാണെന്ന്
സനം ഷെട്ടി ആരോപിച്ചു. “പൊതുജനങ്ങളുടെ വേദനയെ എങ്ങനെ ഇത്തരത്തിൽ അപമാനിക്കാൻ നിങ്ങൾക്ക്
സാധിക്കുന്നു? നിങ്ങൾ ആരാണ്? നിങ്ങൾക്ക് എന്തു വിലയുണ്ട്?” എന്ന് സനം ഷെട്ടി ചോദ്യം
ചെയ്തു.

വിനോദിനി ദുരന്തബാധിതരെ നേരിട്ട് കാണുകയോ അവരുടെ പ്രശ്‌നങ്ങൾ അറിയുകയോ ചെയ്യാതെയാണ്
സംസാരിക്കുന്നത്. നടൻ വിജയിയെ അറസ്റ്റ് ചെയ്യാൻ കഴിയാത്തതിലുള്ള കടുത്ത നിരാശ മാത്രമാണ്
ഈ വാക്കുകളിലൂടെ അവർ പ്രകടിപ്പിക്കുന്നതെന്നും സനം ആരോപിച്ചു.

“ഞാൻ രാഷ്ട്രീയത്തിലില്ല, എനിക്ക് ഒരു പാർട്ടിയുടെ പിന്തുണയുമില്ല. എങ്കിലും കരൂർ ദുരന്തബാധിതരെ
ഞാൻ നേരിട്ട് പോയി കണ്ടിരുന്നു. ആ ജനങ്ങൾ പോലും വിജയ് സാറിനെ കുറ്റപ്പെടുത്തുന്നില്ല.
ഇത് അംഗീകരിക്കാൻ കഴിയാത്തതുകൊണ്ടാണ് ആ ജനങ്ങൾക്ക് നിങ്ങൾക്ക് വിലയില്ലാത്തവരായി മാറിയത്,”
സനം ഷെട്ടി തുറന്നടിച്ചു.

നേരത്തെ മക്കൾ നീതി മയ്യം പാർട്ടിയിൽ സജീവമായിരുന്ന വിനോദിനി, ഈ വർഷം ജനുവരിയിൽ രാജിവച്ചിരുന്നു.
കരൂർ സംഭവത്തിന് ശേഷം വിനോദിനി വിജയിയെ പിന്തുണച്ച് സംസാരിച്ചതും ശ്രദ്ധേയമായിരുന്നു.