# ‘എന്റെ സിനിമയൊന്ന് കാണുമോ?’; മക്കൾ ഇതുവരെ തന്റെ ചിത്രങ്ങളൊന്നും കണ്ടിട്ടില്ലെന്ന് വെളിപ്പെടുത്തി ശാലിനി

- Link: https://ml.b4blaze.com/film-news/will-you-watch-my-movie-shalini-reveals-that-her-children-have-not-seen-any-of-her-films-yet
- Published: 2026-02-22T12:02:34+05:30
- Author: Soorya S

മലയാളികൾ ഇന്നും ഹൃദയത്തോട് ചേർത്തുപിടിക്കുന്ന ‘അനിയത്തിപ്രാവി’ലെ മിനിയും ‘മാമാട്ടിക്കുട്ടിയമ്മ’യുമൊക്കെയായ
ശാലിനിയുടെ സിനിമകൾ കാണാത്തവർ ചുരുക്കമാണ്. എന്നാൽ തന്റെ മക്കളായ അനൗഷ്കയും ആദ്‌വിക്കും
ഇതുവരെ തന്റെ ഒരു സിനിമ പോലും കണ്ടിട്ടില്ലെന്ന രസകരമായ വെളിപ്പെടുത്തലുമായി എത്തിയിരിക്കുകയാണ്
താരം. ജെ.എഫ്.ഡബ്ല്യു (JFW) മൂവി അവാർഡ്‌സ് 2026-ന്റെ വേദിയിൽ വെച്ചാണ് ശാലിനി ഈ കൗതുകകരമായ
കാര്യം ആരാധകരോട് പങ്കുവെച്ചത്.

തമിഴ് സൂപ്പർ താരം അജിത്തുമായുള്ള വിവാഹശേഷം സിനിമയിൽ നിന്ന് വിട്ടുനിൽക്കുന്ന ശാലിനി,
മക്കളോടൊപ്പം സമയം ചിലവഴിക്കാനാണ് ഇഷ്ടപ്പെടുന്നത്. തന്റെ സിനിമകൾ കാണാൻ പലതവണ പദ്ധതിയിടുമെങ്കിലും‘
പിന്നെയാകാം’ എന്ന് പറഞ്ഞ് മക്കൾ അത് മാറ്റിവയ്ക്കുകയാണ് പതിവെന്ന് ശാലിനി പറഞ്ഞു. 
തന്റെ സിനിമകളിലെ ഗാനങ്ങൾ അവർ കാണാറുണ്ടെങ്കിലും പൂർണ്ണരൂപത്തിൽ ഒരു ചിത്രം പോലും അവർ
ഇതുവരെ കണ്ടു തീർത്തിട്ടില്ലെന്നും താരം കൂട്ടിച്ചേർത്തു.

വേദിയിൽ വെച്ച് മക്കളോട് തമാശരൂപേണ ശാലിനി ഒരു അഭ്യർത്ഥനയും നടത്തി. ‘മക്കളേ, ദയവുചെയ്ത്
എന്റെ ഒരേയൊരു സിനിമയെങ്കിലും നിങ്ങളൊന്ന് കാണുമോ?’ എന്നായിരുന്നു താരത്തിന്റെ ചോദ്യം.
മകൾ ഒരിക്കൽ ശാലിനിയുടെ ഒരു സിനിമയെക്കുറിച്ച് സുഹൃത്ത് പറഞ്ഞത് കേട്ട് ആവേശത്തോടെ 
വന്നെങ്കിലും അന്നും സിനിമ കാണൽ നടന്നില്ലെന്ന് താരം ഓർത്തെടുത്തു. ശാലിനിയുടെ ഈ തുറന്നുപറച്ചിൽ
സോഷ്യൽ മീഡിയയിൽ ഇതിനോടകം തന്നെ വൈറലായിക്കഴിഞ്ഞു.