# ദിലീപ്: ജനപ്രിയനിലെ താരത്തിളക്കവും വിവാദങ്ങളുടെ നിഴലും

- Link: https://ml.b4blaze.com/general-news/dileep-the-stardom-and-the-shadow-of-controversies-in-the-popular-film
- Published: 2025-12-08T09:47:46+05:30
- Author: Aparna V

മലയാള സിനിമയിലെ മുൻനിര താരങ്ങളിൽ ഒരാളായ ദിലീപിന്റെ കരിയർ ഗ്രാഫ് ഉയർച്ച താഴ്ചകൾ നിറഞ്ഞതാണ്.
നടിയെ ആക്രമിച്ച കേസും തുടർന്നുണ്ടായ വിവാദങ്ങളും താരത്തിന്റെ കരിയറിന് വലിയ തിരിച്ചടിയായി.
റിമാൻഡ് കാലാവധിക്ക് ശേഷം പുറത്തിറങ്ങിയപ്പോൾ റിലീസായ രാമലീല ഒഴികെ പിന്നീടിറങ്ങിയ 
ചിത്രങ്ങളൊന്നും പ്രേക്ഷകരെ കാര്യമായി ആകർഷിച്ചില്ല. ഈ കേസ് കാരണം സ്ത്രീകളടക്കമുള്ള
ഒരു വിഭാഗം പ്രേക്ഷകർ ദിലീപ് എന്ന നടനിൽ നിന്ന് അകന്നുപോയതായി വിലയിരുത്തപ്പെടുന്നു.

സാധാരണക്കാരനും വെള്ളിത്തിരയിൽ തിളങ്ങാം എന്നതിന് ഉദാഹരണമായിരുന്നു ദിലീപ്. കമലിന്റെ
സഹസംവിധായകനായി സിനിമാ ജീവിതം തുടങ്ങിയ അദ്ദേഹം, നായകന് വേണ്ട മുഖസൗന്ദര്യമോ ശരീരപ്രകൃതിയോ
ഇല്ലായിരുന്നിട്ടും പ്രേക്ഷകരുടെ മനസ്സിൽ ഇടം നേടി. ‘അടുത്ത വീട്ടിലെ പയ്യൻ’ എന്ന ഇമേജ്
കുട്ടികളുടെയും വീട്ടമ്മമാരുടെയും പ്രിയങ്കരനായി അദ്ദേഹത്തെ മാറ്റി.

സഹസംവിധായകനായി പ്രവർത്തിച്ച ശേഷം, കമലിന്റെ എന്നോടിഷ്ടം കൂടാമോ എന്ന ചിത്രത്തിലൂടെയാണ്
ദിലീപ് ക്യാമറയ്ക്ക് മുന്നിലെത്തുന്നത്. മാനത്തെ കൊട്ടാരം എന്ന സിനിമയിലൂടെ അദ്ദേഹം
നായകനായി. ആ ചിത്രം വൻ വിജയമായിരുന്നു. ത്രീ മെൻ ആർമി, കൊക്കരക്കോ, കല്യാണ സൗഗന്ധികം
തുടങ്ങിയ ലോ ബജറ്റ് ചിത്രങ്ങളിലൂടെ വിജയക്കുതിപ്പ് തുടർന്നു.

ലോഹിതദാസിന്റെ തിരക്കഥയിൽ ഒരുങ്ങിയ സല്ലാപം ദിലീപിന്റെ കരിയറിലെ വഴിത്തിരിവായി. ഈ പുഴയും
കടന്ന്, മീനത്തിൽ താലികെട്ട്, പഞ്ചാബി ഹൗസ്, ഈ പറക്കും തളിക, ജോക്കർ തുടങ്ങി നിരവധി
ചിത്രങ്ങൾ പ്രേക്ഷകർ ഇരു കൈകളും നീട്ടി സ്വീകരിച്ചു.

മലയാള സിനിമയിൽ തിളങ്ങി നിന്ന നടി മഞ്ജു വാര്യരുമായുള്ള വിവാഹശേഷം, മഞ്ജു സിനിമയിൽ 
നിന്ന് വിട്ടുനിൽക്കുകയും ദിലീപ് മലയാള സിനിമയിൽ കൂടുതൽ ശക്തനാവുകയും ചെയ്തു. നടൻ എന്നതിലുപരി
നിർമ്മാതാവ്, തിയേറ്റർ ഉടമ എന്നീ നിലകളിലും അദ്ദേഹം വളർന്നു. ചാന്തുപൊട്ട്, കുഞ്ഞിക്കൂനൻ,
പച്ചക്കുതിര, സൗണ്ട് തോമ, ചക്കരമുത്ത്, മായാമോഹിനി എന്നിങ്ങനെയുള്ള പരീക്ഷണ ചിത്രങ്ങൾക്കും
അദ്ദേഹം ഡേറ്റ് നൽകി. ബോക്സ് ഓഫീസിൽ തരംഗമായ മീശമാധവൻ ദിലീപിന്റെ താരപദവി ഉയർത്തി. 
സിഐഡി മൂസ, വെട്ടം, പാണ്ടിപ്പട തുടങ്ങിയ ചിത്രങ്ങൾ പ്രേക്ഷകരെ ഏറെ ചിരിപ്പിച്ചു.

കുടുംബചിത്രങ്ങളിലൂടെ സിനിമാ ലോകം കീഴടക്കിയപ്പോഴും, കഥാവശേഷൻ, കൽക്കട്ടാ ന്യൂസ്, പെരുമഴക്കാലം
തുടങ്ങിയ ചിത്രങ്ങളിലൂടെ ഗൗരവമുള്ള കഥാപാത്രങ്ങളെ അവതരിപ്പിക്കാൻ ദിലീപ് ശ്രദ്ധിച്ചിട്ടുണ്ട്.
ലയൺ, ഡോൺ തുടങ്ങിയ ആക്ഷൻ റോളുകളും പരീക്ഷിച്ചു. വിജയങ്ങൾ മാത്രമല്ല, പരാജയങ്ങളും അദ്ദേഹം
ഏറ്റെടുത്തു. ഓരോ തിരിച്ചടിക്ക് ശേഷവും പുതിയ തന്ത്രങ്ങളുമായി കുട്ടികളെയും വീട്ടമ്മമാരെയും
കയ്യിലെടുക്കാൻ അദ്ദേഹം വീണ്ടും ബിഗ് സ്‌ക്രീനിലെത്തി. അമ്മ സംഘടനയുടെ ധനശേഖരണാർത്ഥം
മലയാള സിനിമയിലെ താരങ്ങളെ അണിനിരത്തി നിർമ്മിച്ച ട്വന്റി ട്വന്റി എന്ന ചിത്രം സിനിമാ
ലോകത്തെ ദിലീപിന്റെ സ്വാധീനം വ്യക്തമാക്കുന്നതായിരുന്നു.

മലയാള സിനിമയിലെ തന്ത്രശാലിയായ ഒരു ശക്തിയായി തുടരുമ്പോഴാണ് 2017-ൽ നടി ആക്രമിക്കപ്പെട്ട
സംഭവവും അതിന് പിന്നിൽ ദിലീപിന് പങ്കുണ്ടെന്ന സൂചനകളും പുറത്തുവരുന്നത്. അതോടെ ‘ജനപ്രിയൻ’
എന്ന വിളിപ്പേരിന് മങ്ങലേറ്റു. കേസും വിവാദങ്ങളും വാർത്തകളിൽ നിറഞ്ഞുനിന്നു. റിമാൻഡ്
കാലാവധിക്ക് ശേഷം റിലീസായ രാമലീലയെ കേസിന്റെ പേരിൽ തള്ളിക്കളയരുതെന്ന് സംവിധായകൻ അരുൺ
ഗോപി അഭ്യർത്ഥിച്ചിരുന്നു. ആ ചിത്രം വൻ ഹിറ്റായി. ദിലീപിന്റെ കരിയറിലെ അവസാനത്തെ ബോക്സ്
ഓഫീസ് വിജയവും ഒരുപക്ഷേ അതായിരുന്നു.

പൊതുവേദികളിൽ നിന്നും കുറച്ചുകാലം വിട്ടുനിന്ന ശേഷം ദിലീപ് വീണ്ടും സിനിമയിൽ സജീവമായി.
കമ്മാരസംഭവം, ജാക്ക് ആൻഡ് ഡാനിയേൽ, മൈ സാന്റാ, കേശു ഈ വീടിന്റെ നാഥൻ, വോയിസ് ഓഫ് സത്യനാഥൻ,
ബാന്ദ്ര, തങ്കമണി, പവി കെയർ ടേക്കർ തുടങ്ങി പല രൂപത്തിലും ഭാവത്തിലും അദ്ദേഹം എത്തി.
എന്നാൽ, സ്ഥിരം പ്രേക്ഷകർ ഈ ചിത്രങ്ങളെ പഴയതുപോലെ സ്വീകരിച്ചില്ല. ‘അടുത്ത വീട്ടിലെ
പയ്യൻ’ എന്ന ഇമേജിൽ നിന്ന് പലരും അകലം പാലിച്ചു. ഏറ്റവും ഒടുവിൽ ഇറങ്ങിയ പ്രിൻസ് ആൻഡ്
ഫാമിലി എന്ന ചിത്രത്തിനും സമ്മിശ്ര പ്രതികരണങ്ങളാണ് ലഭിച്ചത്.