സച്ചിയേട്ടാ, ഇത് നിങ്ങള്‍ക്കുള്ള പുരസ്‌കാരമാണ്…67ാമത് ഫിലിം ഫെയര്‍ സൗത്ത് പുരസ്‌കാര നേട്ടത്തിന്റെ സന്തോഷം പങ്കുവെച്ച് നടി ഗൗരി നന്ദ. ഫേസ്ബുക്ക് കുറിപ്പിലൂടെയാണ് ഗൗരി നന്ദ അവാര്‍ഡ് നേടിയ സന്തോഷം പങ്കുവച്ചിരിക്കുന്നത്. തന്റെ സ്വപ്‌നമാണ് യാഥാര്‍ഥ്യമായത്. സച്ചി ഇല്ലായിരുന്നുവെങ്കില്‍ ഇത് സാധ്യമാകുമായിരുന്നില്ലെന്നും ഗൗരി നന്ദ പറയുന്നു.
‘സ്വപ്നങ്ങളിലൊന്ന് സഫലമായ നിമിഷം. അവസാനം ഈ കറുത്ത സുന്ദരി എന്റെ കൈകളിലെത്തി. ഫിലിം ഫെയറിന് നന്ദി. സച്ചിയേട്ടാ, ഇത് നിങ്ങള്‍ക്കുള്ള പുരസ്‌കാരമാണ്. നിങ്ങളില്ലായിരുന്നുവെങ്കില്‍ ഇത് സാധ്യമാവുകയില്ലായിരുന്നു. അയ്യപ്പനും കോശിയും സിനിമയുടെ മുഴുവന്‍ ടീമിനും നന്ദി. മികച്ച സഹനടിയായി കണ്ണമ്മയ്ക്കുള്ള പുരസ്‌കാരം’-എന്നാല്‍ സന്തോഷം പങ്കുവച്ച് ഗൗരി നന്ദ കുറിച്ചത്.
അയ്യപ്പനും കോശിയും ചിത്രത്തിലെ വളരെ ശ്രദ്ധ നേടിയ ശക്തമായ സ്ത്രീ കഥാപാത്രമായിരുന്നു കണ്ണമ്മ. മലയാളത്തിലെ മികച്ച ചിത്രത്തിനുള്ള പുരസ്‌കാരം അടക്കം നാല് ഫിലിം ഫെയര്‍ പുരസ്‌കാരങ്ങളാണ് അയ്യപ്പനും കോശിയും സ്വന്തമാക്കിയത്.
അയ്യപ്പനും കോശിയും സിനിമയിലെ അഭിനയത്തിലൂടെ മികച്ച നടനുള്ള പുരസ്‌കാരം ബിജു മേനോനും ലഭിച്ചു. സിനിമയിലെ ‘അറിയാതറിയാതറിയാ നേരത്ത്…’ എന്ന ഗാനത്തിന് റഫീഖ് അഹമ്മദിന് മികച്ച വരികള്‍ എഴുതിയതിനുള്ള പുരസ്‌കാരവും ലഭിച്ചു.
‘ദ ഗ്രേറ്റ് ഇന്ത്യന്‍ കിച്ചണി’ലെ അഭിനയത്തിലൂടെ നിമിഷ സജയനാണ് മലയാളത്തിലെ മികച്ച നടിയായത്. മികച്ച സഹനടന്‍ ‘നായാട്ട്’ എന്ന സിനിമയിലെ പ്രകടനത്തിലൂടെ ജോജു ജോര്‍ജും നേടി.
മികച്ച സംവിധായകന്‍ ‘തിങ്കളാഴ്ച നിശ്ചയം’ സംവിധാനം ചെയ്ത സെന്ന ഹെഗ്‌ഡെയാണ്. ‘സൂഫിയും സുജാത’യിലൂടെ എം ജയചന്ദ്രന്‍ മികച്ച സംഗീത സംവിധായകനുമായി.
‘വെള്ളം’ സിനിമയിലെ ‘ആകാശമായവളെ…’ എന്ന ഗാനം ആലപിച്ച ഷഹബാസ് അമനും മാലിക് സിനിമയിലെ ‘തീരമേ…’ എന്ന ഗാനത്തിലൂടെ കെഎസ് ചിത്രയും മികച്ച ഗായകര്‍ക്കുള്ള പുരസ്‌കാരങ്ങളും നേടി.