# പ്രൊഫസർ ടി.ജെ. ജോസഫിന്റെ കൈവെട്ടിയ കേസ്: എൻഐഎ കൂടുതൽ അന്വേഷണത്തിലേക്ക്

- Link: https://ml.b4blaze.com/news/professor-t-j-josephs-hand-amputation-case-nia-to-investigate-further
- Published: 2025-11-23T10:36:14+05:30
- Author: Aparna V

മൂവാറ്റുപുഴയിൽ അധ്യാപകന്റെ കൈ വെട്ടിമാറ്റിയ കേസുമായി ബന്ധപ്പെട്ട് ദേശീയ അന്വേഷണ 
ഏജൻസി (NIA) കൂടുതൽ അന്വേഷണം ആരംഭിക്കുന്നു. കേസിലെ പ്രതിയായ സവാദിന്റെ മൊഴിയുടെ അടിസ്ഥാനത്തിലാണ്
എൻഐഎയുടെ ഈ നിർണായക നീക്കം.

2010-ലാണ് പ്രൊഫസർ ടി.ജെ. ജോസഫ് ആക്രമിക്കപ്പെട്ടത്. ഈ കേസിലെ മുഖ്യപ്രതികളിലൊരാളായ
സവാദ്, 14 വർഷം ഒളിവിൽ കഴിഞ്ഞ ശേഷം 2024-ലാണ് പിടികൂടപ്പെട്ടത്. ഇത്രയും കാലം ഒളിവിൽ
കഴിയാൻ നിരോധിത സംഘടനയായ പോപ്പുലർ ഫ്രണ്ടിന്റെ (PFI) സഹായം ലഭിച്ചുവെന്നാണ് സവാദ് മൊഴി
നൽകിയിട്ടുള്ളത്.

സവാദിന് ദിണ്ഡിഗലിനടുത്തുള്ള പന്തിരുമലയിലും കണ്ണൂരിലുമുൾപ്പെടെ ഒളിയിടങ്ങൾ ഒരുക്കി
നൽകിയത് പി.എഫ്.ഐ. ആണെന്നും മൊഴിയിലുണ്ട്. ഈ വെളിപ്പെടുത്തലിന്റെ പശ്ചാത്തലത്തിൽ കൂടുതൽ
അന്വേഷണം ആവശ്യമാണെന്ന് എൻഐഎ കോടതിയെ അറിയിച്ചു.

അതേസമയം, സവാദിന്റെ വിചാരണ വൈകിപ്പിക്കാനുള്ള ദേശീയ അന്വേഷണ ഏജൻസിയുടെ മനപ്പൂർവമായ 
നീക്കമാണിതെന്ന് പ്രതിഭാഗം അഭിഭാഷകൻ കോടതിയിൽ വാദിച്ചു. കേസിൽ ഉൾപ്പെട്ട 19 പ്രതികളെ
കോടതി നേരത്തെ ശിക്ഷിച്ചിരുന്നു.