ഇന്ത്യന്‍ സിനിമയിലെ തന്നെ പകരക്കാരില്ലാത്ത ഇതിഹാസ താരമാണ് രജനികാന്ത്. തലൈവയായുള്ള സൂപ്പര്‍ സ്റ്റാറിലേക്കുള്ള വളര്‍ച്ചയില്‍ അദ്ദേഹത്തിന് ഒപ്പം നിന്നത് ഭാര്യ ലതയാണ്. ആയുസ്സ് കുറഞ്ഞ സെലിബ്രിറ്റി ദമ്പതികള്‍ക്കിടയില്‍ നാല് പതിറ്റാണ്ടായ ഉറച്ച ദാമ്പത്യജീവിതം നയിക്കുകയാണ് രജനീകാന്തും ലതയും. സിനിമ പോലെ തന്നെ സുന്ദരമായ പ്രണയ കഥയാണ് രജനിയുടേയും ലതയുടേയും.
നടന്റെ അഭിമുഖം എടുക്കാന്‍ വന്നയാളാണ് ലത. ആദ്യ കാഴ്ചയില്‍ തന്നെ പ്രണയമായി. വീട്ടുകാരുടെ സമ്മതത്തോടെ രജനി 1981ല്‍ ലതയെ വിവാഹം കഴിച്ചു. ഇപ്പോഴിതാ, രജനി ഭാര്യ ലതയെ കുറിച്ച് പറഞ്ഞ വാക്കുകളാണ് ശ്രദ്ധേയമാകുന്നത്. ഇത്രയും നാളത്തെ തന്റെ ആരോഗ്യകരമായ ജീവിതത്തിന്റെ ക്രെഡിറ്റ് മുഴുവന്‍ ഭാര്യ ലതയ്ക്കാണ് തലൈവ നല്‍കുന്നത്.
സിനിമയിലേക്കെത്തും മുമ്പ് ബസ് കണ്ടക്ടറായിരുന്നു രജനി. ആ സമയത്ത് തനിക്ക് ധാരാളം ദുശ്ശീലങ്ങള്‍ ഉണ്ടായിരുന്നുവെന്നും എന്നാല്‍ അതെല്ലാം മാറ്റിയെടുത്തതും ലതയാണ്. ഭാര്യാ സഹോദരനും നടനും നാടകകൃത്തുമായ വൈ ജി മഹേന്ദ്രയ്ക്ക് ഒപ്പം ഒരു പരിപാടിയില്‍ പങ്കെടുക്കുന്നതിനിടെയാണ് രജനി ഓര്‍മ്മകള്‍ പങ്കുവച്ചത്.
ലതയെ പരിചയപ്പെടുത്തി തന്നതും വിവാഹം കഴിച്ചു തന്നതും എല്ലാം വൈ ജി മഹേന്ദ്രയാണെന്ന് രജനി പറയുന്നു. തനിക്ക് ഇപ്പോള്‍ 73 വയസ്സായി. എന്റെ ഈ ആരോഗ്യത്തിന് കാരണം ഭാര്യയാണ്. ഞാന്‍ ബസ് കണ്ടക്ടറായിരുന്നപ്പോള്‍, ഒരുപാട് ദുശ്ശീലങ്ങള്‍ ഉണ്ടായിരുന്നു.
അന്നൊക്കെ ദിവസവും രണ്ടുനേരം മട്ടണ്‍ കഴിച്ചിരുന്നു. ദിവസവും മദ്യപിച്ചിരുന്നു. സിഗരറ്റും വലിച്ച് കൂട്ടുമായിരുന്നു. സിനിമയില്‍ വന്നശേഷം പണവും പ്രശസ്തിയും കൂടിയപ്പോഴും ആ സ്വഭാവം വര്‍ധിച്ചു. ദിവസവും രാവിലെ മട്ടണും അപ്പവും ചിക്കനും കഴിക്കണം. വെജിറ്റേറിയന്‍ ആയവരോട് പുച്ഛമായിരുന്നു. അവരൊക്കെ എന്താണ് ഈ കഴിക്കുന്നതെന്ന് ഞാന്‍ അത്ഭുതപ്പെട്ടിരുന്നു.
സത്യം പറഞ്ഞാല്‍, സിഗരറ്റ്, മദ്യം, മാംസം ഇതൊരു അപകടം പിടിച്ച കോമ്പിനേഷനാണ്. നിയന്ത്രണമില്ലാതെ ഇതെല്ലാം കഴിക്കുന്നവര്‍ 60 വയസിനപ്പുറം ആരോഗ്യത്തോടെ ജീവിച്ചിട്ടില്ല. 60 വയസ്സ് തികയുന്നതിന് മുന്‍പ് തന്നെ പലര്‍ക്കും ആരോഗ്യപ്രശ്‌നങ്ങള്‍ ഉണ്ടാകും.
ഭാര്യയാണ് എന്നെ സ്‌നേഹം കൊണ്ട് എല്ലാ ദുശ്ശീലവും മാറ്റിയെടുത്തത്. സ്‌നേഹം കൊണ്ടും ഡോക്ടര്‍മാരുടെ സഹായത്തോടെയും അവളെന്റെ ജീവിതത്തെ ചിട്ടപ്പെടുത്തി എന്ന് താരം പറഞ്ഞു.
സിഗരറ്റ് വലിക്കുന്നതൊക്കെ ഒരുകാലത്ത് രജനീകാന്ത് സ്‌റ്റൈലായിരുന്നു. നിരവധി ചിത്രങ്ങളില്‍ സിഗരറ്റ് രംഗങ്ങളിലൂടെ രജനി ആരാധകരുടെ കയ്യടിയും നേടിയിരുന്നു. എന്നാല്‍ അടുത്തിടെയായി സിനിമകളിലെല്ലാം താരം സിഗരറ്റിനോട് നോ പറയുന്നുണ്ട്. ഇനി ആ ശീലം പ്രോത്സാഹിപ്പിക്കേണ്ടെന്ന് രജനീകാന്ത് തീരുമാനിച്ചിരിക്കുകയാണ്.