എറണാകുളം ലോ കോളേജില് വച്ച് നടി അപര്ണ ബാലമുരളിയോട് വിദ്യാര്ഥി മോശമായി പെരുമാറിയ സംഭവം വിവാദമായിരിക്കുകയാണ്. സംഭവത്തില് കോളേജ് വിദ്യാര്ഥിയെ സസ്പെന്ഡ് ചെയ്തിരുന്നു. ഇപ്പോഴിതാ വിഷയത്തില് പ്രതികരിച്ചിരിക്കുകയാണ് നടി സജീത മഠത്തില്. താനും നേരിട്ട ദുരനുഭവമാണ് നടി പങ്കുവച്ചിരിക്കുന്നത്.
ഈ അടുത്ത് ഒരു അറിയപ്പെടുന്ന ബുദ്ധിജീവിയോട് ഒരു പരിപാടിയില് വെച്ച് കുറച്ചുനേരം സംസാരിച്ചു. അതിനിടയില് ഒരു ഫോട്ടോ എടുത്താലോ എന്ന് അയാള് ചോദിക്കുന്നു. ആവാം എന്നു മറുപടി പറയും മുന്പ് കക്ഷി തോളില് കയ്യിട്ട് ചേര്ത്തു പിടിച്ച് ക്ലിക്കുന്നു. ഒന്നു പ്രതികരിക്കാന് പോലും സമയമില്ല.
തോളില് കയ്യിടാനുള്ള ഒരു സൗഹൃദവും ഞങ്ങള് തമ്മിലില്ല. പിന്നെ അന്നു മുഴുവന് ആ അസ്വസ്ഥത എന്നെ പിന്തുടര്ന്നു. അടുത്ത കൂട്ടുകാരോട് പറഞ്ഞ് സങ്കടം തീര്ത്തു. ഇത്തരം കാര്യങ്ങള് ചെയ്യുന്നതിലുള്ള ശരികേട് നമ്മള് എങ്ങനെയാണ് മനുഷ്യരെ പറഞ്ഞു മനസ്സിലാക്കുക? അപര്ണ ബാലമുരളിയുടെ അസ്വസ്ഥമായ മുഖം കണ്ടപ്പോള് ഓര്ത്തത്! എന്നാണ് നടി കുറിച്ചത്.
പുതിയ സിനിമയുടെ പ്രചാരണത്തിന് ലോ കോളേജിലെ പരിപാടിക്കെത്തിയപ്പോഴാണ് വേദിയില് കയറിയ വിദ്യാര്ഥി താരത്തിനോട് അപമര്യാദയായി പെരുമാറിയത്. കയ്യില് പിടിച്ച് എഴുന്നേല്പ്പിക്കുകയും തോളില് കയ്യിട്ട് സെല്ഫിയെടുക്കാന് ശ്രമിക്കുകയുമായിരുന്നു.
ഒരു സ്ത്രീയുടെ സമ്മതം ചോദിക്കാതെ അവരുടെ ദേഹത്തു കൈവയ്ക്കുന്നതു ശരിയല്ലെന്ന് ഒരു ലോ കോളജ് വിദ്യാര്ഥി മനസ്സിലാക്കിയില്ലെന്നതു ഗുരുതരമാണ്. കൈപിടിച്ച് എഴുന്നേല്പിച്ചതുതന്നെ ശരിയല്ല. പിന്നീടാണ് കൈ ദേഹത്തുവച്ചു നിര്ത്താന് നോക്കിയത്. ഇതൊന്നും ഒരു സ്ത്രീയോടു കാണിക്കേണ്ട മര്യാദയല്ല. ഞാന് പരാതിപ്പെടുന്നില്ല. പിന്നാലെ പോകാന് സമയമില്ലെന്നാണ് നടി കാരണമായി പറഞ്ഞത്.