ഉണ്ണി മുകുന്ദന്‍ കേന്ദ്ര കഥാപാത്രത്തെ അവതരിപ്പിക്കുന്ന ഏറ്റവും പുതിയ ചിത്രമാണ് ‘മാളികപ്പുറം’. നവാഗതനായ വിഷ്ണു ശശിശങ്കര്‍ ആണ് ചിത്രം സംവിധാനം ചെയ്യുന്നത്. ചിത്രീകരണം പൂര്‍ത്തിയായ ചിത്രത്തിന്റെ പ്രമോഷനുമായി ബന്ധപ്പെട്ട തിരക്കിലാണ് ഉണ്ണി മുകുന്ദനും അണിയറ പ്രവര്‍ത്തകരും. ഇപ്പോഴിതാ ഉണ്ണി മുകുന്ദന്‍ പങ്കുവെച്ച ഗ്ലിംപ്സ് വീഡിയോയാണ് ശ്രദ്ധേയമാകുന്നത്. ബാലതാരത്തോടൊപ്പം കയ്യില്‍ ടോര്‍ച്ചുമായി നില്‍ക്കുന്ന ഉണ്ണിയുടെ വീഡിയോ ആരാധകരേറ്റെടുത്തിരിക്കുകയാണ്. പ്രമോഷനുകള്‍ ആരംഭിക്കുന്നു, ഞാന്‍ അവതരിപ്പിക്കുന്ന ഈ കഥാപാത്രം എനിക്ക് ഏറ്റവും പ്രിയപ്പെട്ടതായിരിക്കും. നിങ്ങളെ ത്രില്ലടിപ്പിക്കാന്‍ ഉടന്‍ വരുന്നു, നിങ്ങളുടെ അടുത്തുള്ള തിയേറ്ററുകളില്‍ ഒപ്പം ഷെഫീക്കിനെ സ്നേഹിച്ചതിന് നന്ദി എന്നും പറഞ്ഞാണ് നടന്‍ വീഡിയോ പോസ്റ്റ് ചെയ്തത്.
എരുമേലി ശ്രീധര്‍മ ശാസ്താ ക്ഷേത്രത്തില്‍ വെച്ചാണ് ചിത്രത്തിന്റെ പൂജ ചടങ്ങുകള്‍ നടന്നത്. ചിത്രത്തിന്റെ സെറ്റില്‍ പന്തളം രാജകുടുംബാംഗങ്ങള്‍ എത്തിയത് വലിയ വാര്‍ത്തയായിരുന്നു. ദീപ വര്‍മ്മ, അരുണ്‍ വര്‍മ്മ, സുധിന്‍ ഗോപിനാഥ് എന്നിവരാണ് രാജകുടുംബത്തെ പ്രതിനിധീകരിച്ച് എത്തിയത്. ഉണ്ണി മുകുന്ദന്‍, ദേവനന്ദ എന്നിവര്‍ക്കൊപ്പം രാജകുടുംബാംഗങ്ങള്‍ സമയം ചിലവഴിക്കുകയും ചെയ്തിരുന്നു. വിഷ്ണു ശശിശങ്കര്‍ സംവിധാനം ചെയ്യുന്ന ചിത്രത്തിന്റെ ഛായാഗ്രഹണം നിര്‍വഹിക്കുന്നത് വിഷ്ണു നമ്പൂതിരിയാണ്. സംഗീതം രഞ്ജിന്‍ രാജ്. കാവ്യ ഫിലിം കമ്പനി, ആന്‍ മെഗാ മീഡിയ എന്നീ ബാനറുകളില്‍ പ്രിയ വേണു, നീത പിന്റോ എന്നിവരാണ് ചിത്രത്തിന്റെ നിര്‍മ്മാണം.
സൈജു കുറുപ്പ്, ഇന്ദ്രന്‍സ്, മനോജ് കെ ജയന്‍, രമേശ് പിഷാരടി, സമ്പത്ത് റാം, ദേവനന്ദ, ശ്രീപദ് എന്നിവരാണ് മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. അഭിലാഷ് പിള്ളയുടേതാണ് രചന. സംവിധായകന്‍ തന്നെ എഡിറ്റിംഗും നിര്‍വ്വഹിക്കുന്നു.
