അക്ഷയതൃതീയ ആകുമ്പോഴേക്കും സ്വർണം വാങ്ങാൻ കൂട്ടത്തോടെ ഓടുന്നതിനു മുൻപ് ഇതൊന്നു ചിന്തിക്കു…

അക്ഷയത്രിതീയ എന്ന് കേൾക്കുമ്പോൾ തന്നെ ഇന്ന് ജനങ്ങൾ സ്വർണം വാങ്ങിക്കാനായി ജൂവല്ലറികളിലേക്ക് ഓടുന്നു. എന്താ കാരണം? അക്ഷയതൃതീയക്ക് സ്വർണം വാങ്ങിയാൽ ആ വര്ഷം മുഴുവൻ വീട്ടിൽ ഐശ്വരം ഉണ്ടാകുമത്രേ. ശരിയാണ്. ഐശ്വര്യം ഉണ്ടാകും. അത് പക്ഷെ നമുക്കല്ല. ജുവല്ലറി മുതലാളിയുടെ കുടുംബത്തിന്. ഇങ്ങനെ വര്ഷം തോറും സ്ഥിരമായി അക്ഷയതൃതീയ ദിവസം സ്വർണം വാങ്ങിക്കുന്ന നിരവധി പേരാണ് നമ്മുടെ ഇടയിൽ ഉള്ളത്. എന്നാൽ ഇവരിൽ എത്രപേർക്ക് അറിയാം എന്താണ് ഈ അക്ഷയതൃതീയ ദിവസത്തിന്റെ യഥാർത്ഥ വിശ്വാസം എന്ന്?

അക്ഷയതൃതീയ എന്നത് പണ്ടുമുതലേ ഉള്ള ഒരു പ്രത്യേക ദിവസമാണ്. വിശ്വാസ പ്രകാരം ഈ ദിവസം ദാനധർമങ്ങൾ ചെയ്താൽ ദാനധർമ്മം ചെയ്യുന്ന വ്യക്തിയുടെ കുടുംബത്തിൽ ആ വര്ഷം മുഴുവൻ ഐശ്വര്യം നിറഞ്ഞു നിൽക്കും എന്നതാണ്. വര്ഷം തോറും ഈ ആചാരങ്ങൾ ജനങ്ങൾ അനുഷ്ഠിച്ചു വരുകയും ഈ ദിവസങ്ങളിൽ പുണ്യപ്രവർത്തിയായ ദാനധർമ്മം ചെയ്തു വരുകയും ഉണ്ടായിരുന്നു. എന്നാൽ 2002 ആയപ്പോഴേക്കും കഥ മാറി. 2002ൽ വേൾഡ് ഗോൾഡ് കൗൺസിലറായ ശിവറാം കൊണ്ടുവന്ന ഒരു ആശയമാണ് ഈ അക്ഷയത്രിതീയ ദിവസം ജനങ്ങളെ സ്വർണം വാങ്ങിക്കുവാൻ പ്രേരിപ്പിക്കുക എന്നത്. ഇങ്ങനെ സ്വർണം വാങ്ങിയാൽ ഐശ്വരം ഉണ്ടാകുമെന്നു ജനങ്ങളെ ബോധിപ്പിക്കണമെന്നും അദ്ദേഹം പ്രമുഖ സ്വർണ വ്യാപാരികളോട് അഭിപ്രായപ്പെട്ടു. അതെ തുടർന്ന് വൻകിട സ്വർണ വ്യാപാരികൾ ആയ മൂന്നു നാല് പേര് ചെറിയ തോതിൽ അക്ഷയതൃതീയ ദിനത്തിൽ സ്വർണം വാങ്ങിക്കുന്നതിന്റെ പ്രാധാന്യം വ്യക്തമാക്കി പ്രചാരണം തുടങ്ങി. എന്നാൽ ആ വര്ഷം ഇത് മൂലം വലിയ മെച്ചമൊന്നും സ്വർണവിപണിയിൽ ഉണ്ടായില്ല. എന്നാൽ അടുത്തവര്ഷം അക്ഷയതൃതീയ ആയപ്പോൾ വിൽപ്പന നിരക്കിൽ ചെറിയ രീതിയിൽ മാറ്റം വരുകയും മുൻവർഷത്തെ അപേക്ഷിച്ചു സ്വർണം കൂടുതൽ വിറ്റുവരുകയും ചെയ്തു.

ഇതോടെ രണ്ടു-മൂന്ന് വൻകിടവ്യാപാരികളിൽ മാത്രം ഒതുങ്ങി നിന്ന ഈ വിൽപ്പന തന്ത്രം ചെറുകിട വ്യാപാരികളും ഏറ്റെടുത്തു. അത് കൊണ്ട് തന്നെ സ്വാഭാവികമായും ഈ ദിവസം സ്വർണം വാങ്ങാൻ വളരെ ഉത്തമം ആണെന്നും ഇത് കുടുംബത്തിൽ ഐശ്വരം കൊണ്ടുവരുമെന്നും വൻ തോതിൽ പ്രചാരണം ഉണ്ടാകുകയും ഇത് ശരിയാണെന്നു സ്വാഭാവികമായും ജനങ്ങളുടെ മനസ്സിൽ പതിയുകയും ചെയ്തു. പിന്നീടങ്ങോട്ട് അക്ഷയതൃതീയയിൽ സ്വർണക്കച്ചവടം പൊടിപൊടിക്കാൻ തുടങ്ങി. ചുരുക്കി പറഞ്ഞാൽ പ്രണയിതാക്കൾക്കായി വാലെന്റൈൻസ്‌ഡേ ഉണ്ടായത് പോലെ, കുട്ടികൾക്കായി ശിശുദിനം ഉണ്ടായത് പോലെ, സ്വർണം വാങ്ങുന്നതിനു വേണ്ടി സ്വര്ണകച്ചവടക്കാർ ഉണ്ടാക്കിയ ഒരു ദിവസം മാത്രമാണ് ഈ അക്ഷയതൃതീയ.  ഇന്ന് പുരോഗമനം ഈ മേഖലയിലും ഉണ്ടായി. അക്ഷയതൃതീയ ദിവസം സ്വർണം വാങ്ങുന്നതിനായി മാത്രം പലഷോറൂമുകളും ഇന്ന് മുൻകൂർ ബുക്കിംഗ് സൗകര്യങ്ങൾ വരെ ആരംഭിച്ചു.

മണ്ടന്മാരായ നമ്മൾ ഇതൊന്നും മനസിലാക്കാതെ ക്യാഷ് കൊടുത്ത് ഐശ്വര്യം വാങ്ങിക്കുവാനായി അക്ഷയതൃതീയ ദിവസം കൂട്ടത്തോടെ സ്വര്ണക്കടയിലേക്ക് ഓടുന്നു. ഇനി നിങ്ങൾ തന്നെ പറ ഈ ദിവസം സ്വർണം വാങ്ങിയാൽ ഐശ്വര്യം ഉണ്ടാകുന്നത് വാങ്ങിക്കുന്ന ആൾക്കോ അതോ സ്വർണക്കടക്കാരനോ?