‘പുന്നാര കാട്ടിലെ പൂവനത്തില്‍’ ആലപിച്ച് ഹൃദയങ്ങള്‍ കീഴടക്കി അഭയ ഹിരണ്‍മയി!! അഭിമാന നിമിഷമെന്ന് താരം

സിനിമാ പ്രേക്ഷകര്‍ ഏറെ ആകാംഷയോടെ കാത്തിരിക്കുന്ന മോഹന്‍ലാല്‍ – ലിജോ ജോസ് ചിത്രം മലൈക്കോട്ടൈ വാലിബനിലെ ആദ്യ ഗാനം തന്നെ ആരാധകരെ കൈയ്യിലെടുത്തിരിക്കുകയാണ്. ഹൃദ്യമായ പ്രണയ ഗാനം ശ്രീകുമാര്‍ വാക്കിയിലും അഭയ ഹിരണ്‍മയിയും ചേര്‍ന്നാണ് ആലപിച്ചിരിക്കുന്നത്. ‘പുന്നാര കാട്ടിലെ പൂവനത്തില്‍’ എന്നു തുടങ്ങുന്ന മനോഹരഗാനം ഹൃദയങ്ങള്‍ കീഴടക്കിയിരിക്കുകയാണ്. പിഎസ് റഫീക്കാണ് ഗാനത്തിന്റെ വരികള്‍ ഒരുക്കിയത്. പ്രശാന്ത് പിള്ളയാണ് സംഗീതം നല്‍കിയിരിക്കുന്നത്.

അഭയ ഹിരണ്‍മയി സന്തോഷം പങ്കുവച്ച കുറിപ്പ് ശ്രദ്ധേയമാകുകയാണ്. ജീവിതത്തിലെ മനോഹരമായ ദിവസം ആണ് ഇന്ന്, നമ്മളോരുത്തരും പ്രതീക്ഷിക്കുന്ന ലിജോ ജോസ് പെല്ലിശ്ശേരി മോഹന്‍ലാല്‍ ചിത്രത്തിന്റെ ആദ്യ ഗാനം റിലീസാകുകയാണ്. ഒരു വര്‍ഷം മുന്നേ എനിക്ക് വളരെ ഇഷ്ടമുള്ള സംഗീത സംവിധായകന്‍ ആയ പ്രശാന്ത് പിള്ള ഒരു ഗാനാലാപനത്തിന് ക്ഷണിച്ചു. വളരെ തൃപ്തിയോടെ ആ ഗാനം പാടി സ്റ്റുഡിയോയില്‍ നിന്ന് ഇറങ്ങി വന്ന എനിക്ക് ഏതാണ് ഈ ഗാനം, ഏതു സിനിമയിലേതാണ് ഈ ഗാനം എന്നതിനെക്കുറിച്ചു ഒരു ഐഡിയയും ഇല്ലായിരുന്നു.

രണ്ടു മാസത്തിനു മുന്നേ ലിജോ ജോസ് പെല്ലിശ്ശേരി ഒരു കഥാപാത്രത്തിന് ഡബ്ബ് ചെയ്യാന്‍ എന്നെ വിളിക്കുകയും ആ ജോലി പൂര്‍ത്തീകരിച്ച ശേഷം ‘അഭയ പാടിയ മലൈക്കോട്ടൈ വാലിബനിലെ പാട്ടു കേള്‍ക്കണ്ടേ’ എന്ന് ചോദിച്ചു, ലിജോ ഈ ഗാനം കേള്‍പ്പിച്ച് തരുന്ന സമയത്താണ് എനിക്ക് പോലും വിശ്വസിക്കാന്‍ പറ്റാത്ത തരത്തില്‍ നമ്മുടെ ലെജന്‍ഡറി ആക്ടര്‍ ലാലേട്ടന്റെ മലൈക്കോട്ടൈ വാലിബനില്‍ ഞാനും ഒരു ഭാഗമായ കാര്യം അറിയുന്നത്. ഒരുപാടു സന്തോഷം കിട്ടിയ നിമിഷം, അത്രേം പ്രൗഡ് തോന്നിയ നിമിഷം ആയിരുന്നു അത്. ലിജോയ്ക്കും പ്രശാന്ത് പിള്ളയ്ക്കും ഒത്തിരി നന്ദി. നിങ്ങളും ഈ ഗാനം ഏറ്റെടുക്കും എന്ന് വിശ്വസിക്കുന്നു, എന്നാണ് അഭയ സോഷ്യല്‍ മീഡിയയില്‍ പങ്കുവച്ചത്.

മലയാളം, തമിഴ്, തെലുങ്ക് കന്നഡ, ഹിന്ദി എന്നീ ഭാഷകളിലാണ് ചിത്രം തിയ്യേറ്ററിലെത്തുന്നത്. സൊണാലി കുല്‍ക്കര്‍ണി, ഹരീഷ് പേരടി, ഡാനിഷ് സെയ്ത്, മനോജ് മോസസ്, കഥ നന്ദി, മണികണ്ഠന്‍ ആചാരി എന്നിവരാണ് മറ്റ് ശ്രദ്ധേയമായ കഥാപാത്രങ്ങളെ അവതരിപ്പിക്കുന്നത്. ‘മലൈക്കോട്ടൈ വാലിബന്‍’ 2024 ജനുവരി 25നാണ് തിയേറ്ററുകളിലെത്തുന്നത്.