വിദ്യാബാലനന്റെ മഞ്ജുളിക വീണ്ടും​! ഒന്നിലും രണ്ടിലും തീർന്നില്ല; ഭൂൽ ഭുലയ്യയുടെ മൂന്നാം ഭാഗം പ്രഖ്യാപിച്ച് സംവിധായകൻ

ഭൂൽ ഭുലയ്യയുടെ മൂന്നാം ഭാഗം പ്രഖ്യാപിച്ച് സംവിധായകൻ അനീസ് ബസ്മി. മലയാളത്തിലെ എവർ​ഗ്രീൻ ക്ലാസിക് സിനിമ മണിചിത്രത്താഴിൻറെ ഹിന്ദി റീമേക്ക് ആയിരുന്നു ഭൂൽ ഭുലയ്യ. പ്രിയദർശൻ സംവിധാനം ചെയ്ത ചിത്രം 2007ലാണ് റിലീസായത്. ടി സീരിസ് നിർമ്മിച്ച ചിത്രത്തിൽ അക്ഷയ് കുമാർ, വിദ്യ ബാലൻ, ഷൈനി അഹൂജ എന്നിവരാണ് പ്രധാന വേഷത്തിൽ അഭിനയിച്ചത്. എന്നാൽ ഭൂൽ ഭുലയ്യ 2 ഇറങ്ങിയപ്പോൾ അതിൽ അക്ഷയ് കുമാറും പ്രിയദർശനും ഇല്ലായിരുന്നു. അനീസ് ബസ്മി സംവിധാനം ചെയ്ത് ഭൂൽ ഭുലയ്യ 2 2022ലാണ് പുറത്ത് വന്നത്. കാർത്തിക് ആര്യൻ, കിയാറ അദ്വാനി, തബു എന്നിവർ പ്രധാന വേഷത്തിൽ എത്തി.

അക്ഷയ് കുമാർ ഭൂൽ ഭുലയ്യ 3യുടെ ഭാഗമാകില്ലെന്ന് അനീസ് അറിയിച്ചു.. വിദ്യാ ബാലനും കാർത്തിക് ആര്യനും ചിത്രത്തിൻറെ മൂന്നാം ഭാഗത്തിൽ പ്രധാന വേഷത്തിൽ എത്തും. “ഇല്ല, അക്ഷയ് ഭൂൽ ഭുലയ്യ 3 യുടെ ഭാഗമായിരിക്കില്ല. അദ്ദേഹത്തോടൊപ്പം പ്രവർത്തിക്കാൻ എനിക്ക് ആഗ്രഹമുണ്ട്. പക്ഷേ നിർഭാഗ്യവശാൽ ഞങ്ങൾക്ക് ഒരുമിച്ച് പ്രവർത്തിക്കാൻ കഴിയുന്ന തരത്തിൽ തിരക്കഥ ഒരുക്കാൻ സാധിച്ചില്ല. ഭാവിയിൽ തീർച്ചയായും അത് സാധ്യമാകും. ഭൂൽ ഭുലയ്യ 3 യുടെ ഷൂട്ടിംഗ് മാർച്ച് 10 ന് ആരംഭിക്കും” അനീസ് ബസ്മി പറഞ്ഞു.

“ഭൂൽ ഭുലയ്യ 3യിൽ 3 ദിവസത്തെ വേഷം ചെയ്യാൻ വിദ്യ സമ്മതിച്ചു. വിദ്യ ബാലൻ അനുകൂലമായി പ്രതികരിച്ചതുകൊണ്ടാണ് പ്രോജക്ട് തന്നെ തുടങ്ങിയത്.” അനീസ് ബസ്മി കൂട്ടിച്ചേർത്തു. 2007ലെ സൈക്കോളജിക്കൽ ഹൊറർ-കോമഡി ചിത്രമായ ഭൂൽ ഭുലയ്യയിൽ മഞ്ജുളികയുടെ വേഷമാണ് വിദ്യാ ബാലൻ അവതരിപ്പിച്ചത്. മലയാളത്തിൽ ശോഭന അഭിനയിച്ച നാഗവല്ലിയുടെ റോളായിരുന്നു ഇത്.