മലയാളികളുടെ ഏറെ നാളത്തെ സ്വപ്‌നം സഫലമായിരിക്കുകയാണ്. ടി 20 ലോകകപ്പിനുള്ള ഇന്ത്യന്‍ ടീമില്‍ ഇടംനേടിയിരിക്കുകയാണ് കേരളത്തിന്റെ സ്വന്തം സഞ്ജു സാംസണ്‍. നീണ്ട 9 വര്‍ഷത്തെ കരിയറില്‍ ആദ്യമായാണ് ലോകകപ്പ് ടീമിലേക്ക് സഞ്ജു എത്തുന്നത്. പലതവണ അവഗണയേറ്റു വാങ്ങിയാണ് സഞ്ജു സ്വപ്‌ന നിമിഷത്തിലെത്തിയത്.
സഞ്ജു സാംസണിന് ആശംസകള്‍ നേര്‍ന്നിരിക്കുകയാണ് നടന്‍ ബിജു മേനോന്‍. സഞ്ജുവിനെ കെട്ടിപ്പിടിച്ച് ഉമ്മ വെക്കുന്ന ചിത്രം പങ്കുവച്ചാണ് ബിജു മേനോന്റെ ആശംസ. ഏറെ അഭിമാനവും സന്തോഷവും സുഹൃത്തേ. ഇനിയും മുന്നേറൂ.- എന്നാണ് ചിത്രത്തിന് ക്യാപ്ഷനായി കുറിച്ചത്.
സിനിമാ മേഖലയില്‍ നിന്ന് നിരവധി പേരാണ് സഞ്ജുവിന് ആശംസകള്‍ അറിയിച്ചത്. ബേസില്‍ ജോസഫ്, ആന്റണി വര്‍ഗീസ്, ടൊവിനോ തോമസ്, കാളിദാസ് ജയറാം ഉള്‍പ്പടെയുള്ള നിരവധി പേര്‍ ആശംസകള്‍ നേര്‍ന്നിരുന്നു.
ബിസിസിഐ ലോകകപ്പിനുള്ള 15 അംഗ ടീമിനെ പ്രഖ്യാപിച്ചതിന് പിന്നാലെ സഞ്ജുവിന്റെ പോസ്റ്റും വൈറലായിരുന്നു. ‘വിയര്‍പ്പു തുന്നിയിട്ട കുപ്പായം’ എന്ന അടിക്കുറിപ്പോടെ ഇന്ത്യന്‍ ടീമിന്റെ ജാക്കറ്റ് ധരിച്ച് നില്‍ക്കുന്ന ചിത്രമാണ് ഇന്‍സ്റ്റഗ്രാമില്‍ സഞ്ജു പങ്കുവച്ചത്.
മഞ്ഞുമ്മല്‍ ബോയ്‌സ് എന്ന സിനിമയിലെ
വിയര്‍പ്പു തുന്നിയിട്ട കുപ്പായം…
അതില്‍ നിറങ്ങള്‍ മങ്ങുകയില്ല
കട്ടായം കിനാവു കൊണ്ടുകെട്ടും കൊട്ടാരം
അതില്‍ മന്ത്രി നമ്മള്‍ തന്നെ രാജാവും
ചെറിയ ഭൂമിയില്ലേ വിധിച്ചത് നമക്ക്
ഉച്ചികിറുക്കില്‍ നീ ഉയരത്തില്‍ പറക്ക്
ചേറില്‍ പൂത്താലും താമര കണക്ക്
ചോറ് പോരെ മണ്ണില്‍ ജീവിക്കാന്‍ നമ്മക്ക്… എന്ന പാട്ടായിരുന്ന പശ്ചാത്തല സംഗീതമായും സഞ്ജു പങ്കിട്ടിരുന്നത്.