തന്നെ ഇടിച്ചിട്ടയാളെ കെട്ടിപ്പിടിച്ച് ബൈക്കുകാരന്‍- വൈറലായി ഒരു വീഡിയോ

ഇന്ത്യയോ മറ്റേതെങ്കിലും രാജ്യമോ ആകട്ടെ, റോഡപകടങ്ങള്‍ അസാധാരണമല്ല. വാഹനാപകടങ്ങള്‍ മൂലമോ ഗതാഗത നിയമലംഘനങ്ങള്‍ മൂലമോ ഉണ്ടാകുന്ന അടിപിടികളും വഴക്കുകളും നമ്മള്‍ പലപ്പോഴും കാണുന്ന ഒന്നാണ്.

എന്നിരുന്നാലും, സാധാരണഗതിയില്‍ നമുക്ക് കാണാന്‍ സാധിക്കാത്തത സംഭവമടങ്ങിയ ഒരു വീഡിയോയാണ് ഇപ്പോള്‍ സോഷ്യല്‍ മീഡിയയില്‍ വൈറലാവുന്നത്. അപകടം നടന്നതിന് ശേഷം പ്രശ്‌നം സമാധാനപരമായി അവസാനിപ്പിക്കുന്ന വ്യക്തിയേയാണ് നമുക്ക് വീഡിയോയില്‍ കാണാന്‍ സാധിക്കുക. തന്നെ ഇടിച്ചിട്ടയാളെ കെട്ടിപ്പിടിക്കുകയാണ് ഈ വ്യക്തി. സംഭവം നടന്നതെവിടെയാണെന്ന് വ്യക്തമില്ല. എന്നാല്‍ സംഭവമിങ്ങനെയാണ്.

ഒരു കാറ് ബൈക്കുമായി കൂട്ടിയിടിക്കുന്നു. ബൈക്കില്‍ നിന്ന് തെറിച്ചു വീണ ബൈക്ക് യാത്രികന്‍ എഴുന്നേറ്റ് വനിതാ ഡ്രൈവറുടെ അടുത്തേക്ക് ചെന്ന് അവളെ ആലിംഗനം ചെയ്യുന്നതാണ് വീഡിയോയില്‍ കാണാന്‍ സാധിക്കുക. ഗുഡ് ന്യൂസ് മൂവ്മെന്റ് എന്ന ഇന്‍സ്റ്റാഗ്രാം അക്കൗണ്ട് ‘ഇയാള്‍ ബൈക്ക് ഓടിക്കുമ്പോള്‍ ഒരു കാര്‍ വന്ന് ഇടിക്കുകയായിരുന്നു’ എന്ന അടിക്കുറിപ്പോടെയാണ് വീഡിയോ പങ്കുവെച്ചത്.

‘ഞാന്‍ കണ്ട ഏറ്റവും അവിശ്വസനീയമായ ദയയുടെ പ്രകടനങ്ങളിലൊന്ന്, ഡ്രൈവറെ പരിഭ്രാന്തിയാക്കുന്നതിനു പകരം, അവന്‍ വിറച്ചുപോയ യുവതിയെ ആശ്വസിപ്പിക്കുകയായിരുന്നു,’ എന്നും വീഡിയോയ്ക്ക് താഴെ കുറിക്കുന്നു. നിരവധി പേരാണ് യുവാവിനെ അഭിനന്ദിച്ച് രംഗത്തെത്തിയത്. നിമിഷ നേരങ്ങള്‍ക്കുള്ളില്‍ വീഡിയോ വൈറലാവുകയും ചെയ്തു.