മകളുടെ വിവാഹം അറിഞ്ഞില്ലേ എന്ന് ചോദിക്കുന്നവർക്ക് മറുപടി; സൊനാക്ഷി വിവാഹക്കാര്യത്തിൽ ശത്രുഘ്നൻ സിൻഹയുടെ പ്രതികരണം

നടി സൊനാക്ഷി സിൻഹയും ലിവിംഗ് പാർട്ണറായ നടൻ സഹീർ ഇക്ബാൽ വിവാഹിതരാകുന്നതാണ് ബോളിവുഡ് ലോകത്തെ പുതിയ വാർത്ത. ജൂൺ 23 ന് മുംബൈയിലാണ് വിവാഹമെന്നാണ് റിപ്പോർട്ടുകൾ വരുന്നത്. സൊനാക്ഷിയും സഹീറും വളരെക്കാലമായി ഒരുമിച്ചാണ് ജീവിക്കുന്നത്. വിവാഹ വാർത്ത പുറത്ത് വന്നതോടെ ബോളിവു‍ഡ് ലോകത്ത് പല ചർച്ചകളും നടക്കുന്നുണ്ട്. പക്ഷേ മകളുടെ വിവാഹത്തെ കുറിച്ച് ഒരു വിവരം അറിയില്ലെന്നാണ് സൊനാക്ഷിയുടെ പിതാവും നടനും ലോക്സഭ എംപിയുമായ ശത്രുഘ്നൻ സിൻഹ ഇപ്പോൾ പറയുന്നത്.

ലോക്സഭ തെരഞ്ഞെ‌ടുപ്പിൽ തൃണമൂൽ കോൺഗ്രസ് സ്ഥാനാർത്ഥിയായി വിജയിച്ച അദ്ദേഹം മാധ്യമങ്ങളോട് സംസാരിക്കുകയായിരുന്നു. തെരഞ്ഞെടുപ്പ് വിജയത്തിന് ശേഷം മാധ്യമങ്ങൾ മകളുടെ വിവാഹത്തെ കുറിച്ചാണ് ചോദിക്കുന്നത്. മാധ്യമങ്ങൾ അറിഞ്ഞത് മാത്രമേ എനിക്കും ഇക്കാര്യത്തെ കുറിച്ച് അറിയൂ എന്ന് ശത്രുഘ്നൻ സിൻഹ വ്യക്തമാക്കി. മകൾ കാര്യങ്ങൾ ഞങ്ങളെ അറിയിക്കുമ്പോൾ ഞാനും ഭാര്യയും ചടങ്ങിൽ പങ്കെടുക്കും. അറിയില്ലെങ്കിലും ഞങ്ങളുടെ അനുഗ്രഹം അവൾക്കുണ്ടാകുമെന്നും അദ്ദേഹം പറഞ്ഞു.

മകളുടെ തീരുമാനങ്ങളെ എന്നും വിശ്വസിക്കാറുണ്ട്. അവൾ മുതിർന്ന വ്യക്തിയാണ്. അവൾക്ക് അവളുടെ തീരുമാനം എടുക്കാൻ അവകാശമുണ്ട്. എൻറെ മകളുടെ കല്ല്യാണം എവിടെ നടന്നാലും അതിൻറെ ചടങ്ങുകളുടെ മുന്നിൽ ഞാൻ ഉണ്ടാകും. പിന്നെ ചിലർ ചോദിക്കുന്നുണ്ട് മകളുടെ വിവാഹ വിവരം മാധ്യമങ്ങൾ അറിഞ്ഞിട്ടും നിങ്ങൾ ഇതുവരെ അറിഞ്ഞില്ലെയെന്ന്. അവരോട് ഒന്നെ പറയാനുള്ള ഇന്നത്തെക്കാലത്തെ കുട്ടികൾ മാതിപിതാക്കളോട് അനുവാദം വാങ്ങില്ല. അവർ അക്കാര്യം അറിയിക്കുക മാത്രമേ ചെയ്യുകയുള്ളൂ. അവൾ അറിയിക്കുന്നതിനായി ഞാനും ഭാര്യയും കാത്തിരിക്കുകയാണ് – ശത്രുഘ്നൻ സിൻഹ പറഞ്ഞു.