മാലിക്ക് ഒരു ചരിത്ര സിനിമയാണോ ? ഈ കഥയുടെ പിന്നിലെ സത്യമെന്ത്!

മലയാളത്തിന്റെ യുവതാരം ഫഹദ് ഫാസിൽ കേന്ദ്രാ കഥാപാത്രമായിയെത്തിയ മാലിക്ക് ഒരർത്ഥത്തിൽ പറഞ്ഞാൽ സത്യമേത് അസത്യമേത് എന്ന് പറയാൻ കഴിയാത്ത ചിത്രമാണ്. വിവിധ  രാഷ്ട്രീയ പാർട്ടികൾ ഉൾപ്പെടുന്ന പ്രശ്നങ്ങൾക്ക് മുൻപ് ഒരു ചരിത്രത്തോട് കാട്ടുന്ന നീതികേട് ആണ് ഇവിടെ മാനുഷിക മൂല്യങ്ങൾ ഉള്ള ഒരു സമൂഹം ചർച്ച ചെയ്യേണ്ടത്.എങ്ങനെയൊക്കെ പറഞ്ഞാലും ശരി കഥ ബീമാ പള്ളി പരിസരത്തെപ്പറ്റിയല്ലെന്ന് ഒട്ടും വിശ്വസിക്കാൻ കഴിയില്ല. അതെ പോലെ തന്നെ വളരെ സൂക്ഷ്മമായിട്ടാണ് ബീമാ ബീവിയുടെ ചരിത്രം മുതൽ പള്ളി പരിസരത്തിന്റെ ചുറ്റുമതിലിന്റെയും ഗേറ്റിന്റെയും കലാസംവിധാനം വരെ നിർവഹിച്ചിരിക്കുന്നത്. രാഷ്ട്രീയം മാറ്റി നിർത്തിയാൽ പോലും ചൂണ്ടി കാണിക്കേണ്ട വ്യത്യാസങ്ങൾ ഇവയാണ്.ബീമാ പള്ളിയുടെ പരിസരത്ത് എല്ലാവർക്കും രക്ഷകനായിയുള്ള ഒരു വ്യക്തിയുണ്ടായിട്ടില്ല.

ഒരു പ്രധാന കാര്യം എന്തെന്നാൽ  എം.എൽ.എ പോയിട്ട് ഒരു വാർഡ് മെമ്പറെ പോലും  എതിരില്ലാതെ ജയിപ്പിക്കാനുള്ള അത്ര ജനസംഖ്യ അവിടെയില്ലാരുന്നു.അതെ പോലെ തന്നെ തിരിച്ചു ഒരു വെടിവെപ്പ് ബീമാ പള്ളിയിൽ ഉണ്ടായിട്ടില്ല. ഒരു പോലീസ് കാരനോ ഉദ്യോഗസ്ഥനോ പ്രതികാരമായി കൊല്ലപ്പെ ട്ടിട്ടില്ല. അവിടെ ആയുധങ്ങൾ ഉണ്ടായിരുന്നു എന്ന പരാതി കേരള പോലീസിന് പോലും ഇല്ല.ക്രിക്കറ്റ് കളിക്കുമ്പോൾ പോലീസ് വെടിയേറ്റ് മരിച്ച പതിനാറുകാരൻ ഉൾപ്പെടെയുള്ളവരുടെ കുടുംബം ഈ  ചിത്രം എങ്ങനെ കാണുമെന്നാണ്  ആലോചികേണ്ടത് ( ഈ ചിത്രത്തിൽ അമീറിന്റെ മകനെ പോലീസ് എടുത്ത് മാറ്റുന്ന രംഗം, വളരെ കൃത്യമായും ആ പതിനാറുകാരനേ പോലീസ് എടുത്ത് മാറ്റുന്ന 2009 ലെ വാർത്ത ചിത്രത്തിൽ നിന്ന് പ്രചോദനം ഉൾകൊണ്ട് തന്നെയാണ്.വളരെ തെറ്റായി തന്നെ നടന്ന വെടിവെപ്പിൽ കുടുംബം നഷ്ടപെട്ട, മരിച്ചവരുടെ നഷ്ടപരിഹാരത്തിന് ഹർജി നൽകി കാത്തിരിക്കുന്ന, വീടുകൾ കടലെടുത്തു കൊണ്ടിരിക്കുന്ന ഒരു ജനതയുടെ മേൽ രാജ്യദ്രോഹം ഉൾപ്പെടെയുള്ള  കുറ്റങ്ങൾ അടിച്ചേൽപ്പിക്കുകയാണ്  ഈ ചിത്രം.

അതെ പോലെ  കേരളത്തിൽ ഏറ്റവും കൂടുതൽ ആളുകൾ മരിച്ച വെടിവെപ്പാണത്. അതിലെ ഇരകളോട് എന്തിനാണ് ഈ ക്രൂരത ? ഇത് സിനിമയല്ലേ, ഇങ്ങനെ ഒക്കെ അല്ലേ പറ്റൂ എന്നാണ് ചോദ്യം എങ്കിൽ നരനയാട്ടിന് ഇരകളായ ഒരു നാട്ടിലെ ജനങ്ങളുടെ കഥ ആണെന്ന് ഓരോ ഫ്രയിമിലും ആവർത്തിച്ച്  കാണിക്കുമ്പോൾ ഏതാണ് സത്യം ഏതാണ് സിനിമ  എന്ന് പോസ്റ്റ് ക്രെഡിറ്റ് കാർഡിൽ എങ്കിലും പറയാനുള്ള സാമൂഹിക ബോധം കാണിക്കേണ്ടതായിരുന്നു. ബീമാ ബീവിയുടെ കഥ മുതൽ മതില്കെട്ടിന്റെയും ഗേറ്റിന്റെയും നിറം വരെ വളരെ കൃത്യമാക്കാൻ കാണിച്ച സൂക്ഷ്മത എന്ത് കൊണ്ടാണ് നടന്ന സംഭവങ്ങളെ ചിത്രീകരിക്കുന്നതിൽ കാണികാഞ്ഞത്. ഒരു മനുഷ്യ സമൂഹത്തിന്റെ ഏറ്റവും വലിയ ഓർമ്മയുടെ ഭാഗമാണ് ഈ ചിത്രം.എന്ത് കൊണ്ടെന്നാൽ ഒരിക്കലും തീയില്ലാതെ പുക ഉണ്ടാകുമോ, അവിടെയുളളവർ  എന്തെങ്കിലുമൊക്കെ കാണിച്ചു കാണും, അത് കൊണ്ടായിരിക്കാം പോലീസ് വെടിവെച്ചതെന്നാണ് ഇനി നാളെ മുതൽ സമൂഹത്തിൽ മിക്കവരും  പറയാൻ പോകുന്നത്.