ആരും പിറന്നാള്‍ ആശംസിച്ചില്ല!!! സങ്കടം പറഞ്ഞ് വീട്ടമ്മ, ആശംസകളുമായി താരലോകം

എല്ലാ ദിവസങ്ങളിലും ഓരോ ആഘോഷങ്ങള്‍ ആഘോഷിക്കുന്നവരാണ് ഏറെയും. പിറന്നാളുകളും മറ്റ് സന്തോഷ നിമിഷങ്ങളെല്ലാം ബന്ധുക്കളോടും സുഹൃത്തുക്കളോടൊപ്പവും ആഘോഷമാക്കുകയാണ് ഏറെ പേരും. കുഞ്ഞുങ്ങളുടെ മുതല്‍ പ്രായമായവരുടെയെല്ലാം പിറന്നാളുകള്‍ ആഘോഷമാക്കാറുണ്ട്. സോഷ്യല്‍ മീഡിയയില്‍ നിറയെ ആഘോഷങ്ങളുടെയെല്ലാം ചിത്രങ്ങള്‍ വൈറലാകാറുണ്ട്.

എന്നാല്‍ ചിലര്‍ക്ക് ഇത്തരം ആഘോഷങ്ങള്‍ക്കൊന്നും ഭാഗ്യം ലഭിക്കാറില്ല. അങ്ങനെ ഒരു അമ്മയുടെ വീഡിയോയാണ് സോഷ്യലിടത്ത് വൈറലാകുന്നത്. വീട്ടമ്മമാരുടെ ഉള്ളിലുള്ള ആഗഹങ്ങളൊന്നും പലപ്പോഴും കൂടെയുള്ളവരൊന്നും ശ്രദ്ധിക്കാറില്ല.

ആ വിഷമമാണ് സാവിത്രി അമ്പി ഇന്‍സ്റ്റഗ്രാമില്‍ പങ്കിട്ടത്. ആ വീഡിയോയാണ് വൈറലായി മാറിയത്. തന്റെ പിറന്നാള്‍ ദിനത്തില്‍ വേണ്ടപ്പെട്ടവരും സുഹൃത്തുക്കളും ആരും തന്നെ ആശംസകള്‍ അറിയിക്കാതെ വന്നതോടെ വിഷമം പങ്കിടുകയായിരുന്നു സാവിത്രി.

ഞാന്‍ ആദ്യം എന്നെ തന്നെ ഒന്ന് വിഷ് ചെയ്യുകയാണ്, പിറന്നാള്‍ ആശംസകള്‍ അംബിക്കുട്ടി… ഗോഡ് ബ്ലസ് യു.. നിങ്ങള്‍ക്ക് അറിയാമോ ഇന്നെന്റെ ബെര്‍ത്ത്ഡേ ആണെന്ന്… നിങ്ങള്‍ക്ക് എങ്ങനെ അറിയാനാ അല്ലേ.. എന്റെ വീട്ടിലുള്ളവര്‍ പോലും ഇക്കാര്യത്തെ കുറിച്ച് അറിഞ്ഞിട്ടില്ല. സമയം അഞ്ച് മണി കഴിഞ്ഞു. ഈ സമയം വരെയും ഒരാളും എനിക്കൊരു ആശംസ അറിയിച്ചിട്ടില്ല… അപ്പോള്‍ നിങ്ങള്‍ ഓര്‍ക്കും ഈ വയസുകാലത്താണോ പിറന്നാള്‍ എന്ന്… ഇപ്പോള്‍ എല്ലാവരും അവരവരുടെ ഇഷ്ടാനുസരണം ബര്‍ത്ത്ഡേ ആഘോഷിക്കുന്നുണ്ട്. ഈ വീഡിയോ കാണുന്ന നിങ്ങളെങ്കിലും എനിക്ക് ഒരു ആശംസ അറിയിക്കണം എന്നായിരുന്നു സാവിത്രി പങ്കുവച്ചത്.

കഴിഞ്ഞ ദിവസമായിരുന്നു സാവിത്രി വീഡിയോ പങ്കുവെച്ചത്. പിന്നാലെ നിരവധി പേരാണ് പിറന്നാള്‍ ആശംസകളുമായി എത്തിയത്. സാധാരണക്കാര്‍ മാത്രമല്ല താരലോകത്തുനിന്നും സാവിത്രിയ്ക്ക് ആശംസകള്‍ നിറയുന്നുണ്ട്. നടിമാരായ ഐശ്വര്യ ലക്ഷ്മി, ശില്‍പ ബാല, ദിവ്യ ഉണ്ണി, നിരഞ്ജന അനൂപ്, നിഖില വിമല്‍, അശ്വതി ശ്രീകാന്ത്, ശ്രീവിദ്യ മുല്ലച്ചേരി, തുടങ്ങിയവരും ഗായികമാരായ സിതാര കൃഷ്ണകുമാര്‍, അമൃത സുരേഷ്, രഞ്ജിനി ജോസ്, അഞ്ജു ജോസഫ് തുടങ്ങിയവരും സാവിത്രിയ്ക്ക് ഹൃദ്യമായ പിറന്നാള്‍ ആശംസകള്‍ അറിയിച്ചു.