കോളിവുഡിൽ നിന്ന് ബോളിവുഡിൽ എത്തി സാക്ഷാൽ ഷാരുഖ് ഖാനെ വച്ച് സൂപ്പർ ഹിറ്റ് ചിത്രമൊരുക്കിയ സംവിധായകനാണ് അറ്റ്ലി. ഇപ്പോൾ അറ്റ്ലിയുടെ ഒരു പ്രഖ്യാപനം രാജ്യമൊട്ടാകെ ശ്രദ്ധ നേടുകയാണ്. മൂന്ന് വർഷത്തിനുള്ളിൽ തന്റെ ഹോളിവുഡ് ചിത്രം ഉണ്ടാവുമെന്നാണ് അറ്റ്ലി അറിയിച്ചിട്ടുള്ളത്. ബോളിവുഡിൽ എത്തുന്നതിന് തനിക്ക് എട്ട് വർഷമെടുത്തെന്നും കൂടാതെ ജവാനിലൂടെ തന്റെ വർക്ക് പ്രേക്ഷകർക്ക് ഇഷ്ടപ്പെട്ടതിൽ സന്തോഷവാനാണെന്നും അദ്ദേഹം പറഞ്ഞു.
‘എന്റെ സിനിമയിൽ വരുന്ന അക്രമ സീനുകൾ ആരെയും പ്രകോപിപ്പിക്കാനല്ല, സഹജീവികളോടുള്ള ചില പ്രവർത്തനങ്ങൾ മനുഷ്യത്വപരമാണോ മനുഷ്യത്വരഹിതമാണോ എന്ന് പ്രേക്ഷകരെ വീണ്ടും ചിന്തിപ്പിക്കാൻ പ്രേരിപ്പിക്കുന്നതാണ്. ഒരു സിനിമയിൽ നായ്ക്കളെ വെടിവയ്ക്കുന്ന രംഗം ചിത്രീകരിച്ചാൽ പോലും, അത് അക്രമത്തെ സൂചിപ്പിക്കണമെന്നില്ല, മറിച്ച്‌ അത് മൃഗങ്ങൾക്കെതിരായ അതിക്രമത്തെ ചോദ്യം ചെയ്യുന്നതായിരിക്കും. ഈ ശ്രമങ്ങളെല്ലാം അക്രമമായി കണക്കാക്കുന്നത് ദൗർഭാഗ്യകരമാണ്’, അറ്റ്ലീ പറഞ്ഞു.
കഴിഞ്ഞ വർഷത്തെ ഏറ്റവും വലിയ ഹിറ്റുകളിൽ ഒന്നായിരുന്നു അറ്റ്ലിയുടെ ഷാരൂഖ് ചിത്രം ‘ജവാൻ’. ആഗോള തലത്തിൽ 1000 കോടിയിലധികം രൂപയാണ് ചിത്രം നേടിയത്. 300 കോടി ബജറ്റിൽ ഒരുങ്ങിയ ചിത്രം ജവാന് ശേഷമാണ് പുറത്ത് ഇറങ്ങിയത്. പ്രിയാമണി, സന്യ മൽഹോത്ര, ദീപിക പദുക്കോൺ എന്നിവരും ചിത്രത്തിൽ അഭിനയിച്ചിരുന്നു.