രാജു നിനക്ക് കെട്ടിപിടിച്ചൊരുമ്മ, ബ്ലെസി ചേട്ടാ കൂപ്പുകൈ!!! ഹൃദയം തുറന്ന് ജയസൂര്യ

മികച്ച പ്രേക്ഷക പ്രശംസയോടെ ബ്ലെസി സംവിധാനം ചെയ്ത് പൃഥ്വിരാജ് നായകനായ ആടുജീവിതം തിയറ്ററുകളില്‍ നിറഞ്ഞ സദസ്സില്‍ മുന്നേറുകയാണ്. മരുഭൂമിയിലെ നജീബ് ആവാന്‍ പൃഥ്വിരാജ് നടത്തിയ കഠിന ശ്രമങ്ങളെല്ലാം ഫലം കണ്ടിരിക്കുകയാണ്. പൃഥ്വിരാജ് ഇല്ലായിരുന്നെങ്കില്‍ ‘ആടുജീവിതം’ സിനിമയാകില്ല. കാരണം നജീബ് ആകാന്‍ പൃഥ്വി എടുത്ത പരിശ്രമങ്ങള്‍ക്ക് മുകളില്‍ ഇന്ത്യയിലെ ഒരു നടനും പോകാന്‍ പറ്റില്ല. നജീബ് എന്ന കഥാപാത്രത്തിന് പൂര്‍ണത ലഭിക്കാന്‍ സ്വന്തം ശരീരത്തെ പോലും പൃഥ്വി പരീക്ഷണ വസ്തുവാക്കി. പട്ടിണി കിടന്നും അപകടകരമാം വിധം ശരീരഭാരം കുറച്ചും പൃഥ്വി നജീബിനായി സ്വയം സമര്‍പ്പിച്ചു. അതിന്റെ ഫലമാണ് പൃഥ്വിരാജിന് ഇപ്പോള്‍ കിട്ടുന്ന ഓരോ കൈയ്യടികളും.

ആടുജീവിതം കണ്ട് ജയസൂര്യ പങ്കുവച്ച ഹൃദയഹാരിയായ കുറിപ്പ് ശ്രദ്ധേയമായിരിക്കുകയാണ്. വിധിയുടെയും പടച്ചോന്റെയും നടുവിലൂടെയുള്ള നജീബിന്റെ യാത്ര. ആടുജീവിതം. എന്നാണ് ജയസൂര്യ ഫെയ്‌സ്ബുക്കില്‍ കുറിച്ചത്.

രാജു നിനക്ക് കെട്ടിപിടിച്ചൊരുമ്മയെന്നും, നജീബിന്റെ ലോകത്തേക്ക് കൂട്ടികൊണ്ടുപോയ ബ്ലെസി ചേട്ടാ നിങ്ങള്‍ക്കും നിങ്ങളോടൊപ്പം കൂടെ കൂടിയ നജീബിന്റെ ഹൃദയ താളമറിഞ്ഞ എല്ലാവര്‍ക്കും എന്റെ കൂപ്പുകൈയെന്നും ജയസൂര്യ കുറിച്ചു.

കേരള ബോക്‌സ് ഓഫീസില്‍ മാത്രം ചിത്രം റിലീസ് ദിനത്തില്‍ ആറ് കോടിയില്‍ അധികം കളക്ഷന്‍ നേടിയിരിക്കുകയാണ്. പൃഥ്വിരാജിന്റെ കരിയറിലെ ഏറ്റവും വലിയ ഓപ്പണിംഗാണ് ആടുജീവിതത്തിന് ലഭിച്ചിരിക്കുന്നത്. ഓപ്പണിംഗ് ദിവസം ഈ വര്‍ഷം ഏറ്റവും കൂടുതല്‍ കളക്ഷന്‍ നേടുന്ന ചിത്രമായും ആടുജീവിതം മാറി.