രംഗണ്ണനും അമ്പാനും പിള്ളേരും ചേർന്ന് ആവേശവുമായി തീയറ്ററുകൾ നിറയ്ക്കുകയാണ്. ചിത്രത്തിൽ ഫഹദ് അവതരിപ്പിച്ച രംഗണ്ണൻ എന്ന കഥാപാത്രത്തിന്റെ ലൈസൻസിനെ കുറിച്ച് പരാമർശമുണ്ടായിരുന്നു. ഇപ്പോൾ രംഗണ്ണന്റെ ഡ്രൈവിങ് ലൈസൻസ് പുറത്തുവിട്ടിരിക്കുകയാണ് സംവിധായകൻ ജിത്തും മാധവൻ.
“എടാ മോനേ ലൈസൻസൊണ്ടോ? ഇല്ലെങ്കി എൻറെ ലൈസൻസ് അമ്പാൻറടുത്തുണ്ട്, അത് വാങ്ങിച്ചോ!”- എന്നുള്ള സിനിമയിലെ ഡയലോഗ് കുറിച്ചാണ് ജിത്തു ലൈസൻസും പങ്കുവെച്ചത്. രഞ്ജിത് ഗംഗാധരൻ എന്നാണ് രംഗണ്ണന്റെ യഥാർത്ഥ പേര്. തന്റെയും അച്ഛന്റേയും പേരിന്റെ ആദ്യ അക്ഷരങ്ങൾ ചേർത്താണ് രംഗ എന്ന പേര് വന്നത് എന്ന് ലൈസൻസിൽ നിന്ന് വ്യക്തമാണ്.
1978 ഏപ്രിൽ 15നാണ് രംഗന്റെ ജനനതിയതി. കഴിഞ്ഞ ഏപ്രിൽ 15ന് രംഗണ്ണന് 46 തികഞ്ഞു എന്നും ആരാധകർ കണ്ടെത്തി കഴിഞ്ഞു. അൻവർ റഷീദ് എന്റർടൈൻമെന്റ്‌സിന്റെ ബാനറിൽ അൻവർ റഷീദും ഫഹദ് ഫാസിൽ ആൻഡ് ഫ്രണ്ട്‌സിന്റെ ബാനറിൽ നസ്രിയ നസീമും ചേർന്നാണ് ആവേശം നിർമ്മിച്ചിരിക്കുന്നത്.
കോളേജ് പിള്ളേരും അവരെ സഹായിക്കാനെത്തുന്ന ഗുണ്ടയുടെയും കഥ പറയുന്ന ആവേശം ഭീഷ്മപർവ്വം എന്ന സൂപ്പർ ഹിറ്റിനു ശേഷം എ&എ റിലീസ് വിതരണം ചെയ്യുന്ന ചിത്രം കൂടിയാണ്. ഫഹദിന് പുറമെ മൻസൂർ അലി ഖാൻ, ആശിഷ് വിദ്യാർത്ഥി, സജിൻ ഗോപു, പ്രമുഖ മലയാളി ഗെയിമറും യൂട്യൂബറുമായ ഹിപ്സ്റ്റർ, മിഥുൻ ജെഎസ്, റോഷൻ ഷാനവാസ്, പൂജ മോഹൻരാജ്, നീരജ രാജേന്ദ്രൻ, ശ്രീജിത്ത് നായർ, തങ്കം മോഹൻ തുടങ്ങി നിരവധി പേർ ചിത്രത്തിൽ എത്തുന്നുണ്ട്.