‘അച്ഛന്റെ സിനിമയ്ക്ക് മകന്റെ ഉറപ്പ്’!! “ഈ സിനിമ നിങ്ങളെ നിരാശപ്പെടുത്തില്ല”- കാളിദാസ് ജയറാം

അച്ഛന്റെ വഴിയേ സഞ്ചരിച്ച് മലയാള സിനിമയിലും തമിഴ് സിനിമാ ലോകത്തും പ്രശസ്തി പിടിച്ചുപറ്റിയ താരമാണ് കാളിദാസ് ജയറാം. മലയാളികളുടെ പ്രിയപ്പെട്ട സംവിധായകന്‍ സത്യന്‍ അന്തിക്കാട് സംവിധാനം ചെയ്ത കൊച്ചു കൊച്ചു സന്തോഷങ്ങള്‍ എത്ര ചിത്രത്തിലൂടെയാണ് ജയറാമിന്റെ മകനായി ആ ബാല താരം എത്തിയത്.

സിനിമയില്‍ ജയറാമിന്റെ മകനായി തന്നെ കാളിദാസ് ജയറാം ജീവിച്ചു. ഇന്നിതാ വീണ്ടും ആ ഷൂട്ടിംഗ് സെറ്റ് ഓര്‍മ്മയിലേക്ക് തിരിച്ച് എത്തിയിരിക്കുകയാണ് കാളിദാസ്. സംവിധായകന്‍ സത്യന്‍ അന്തിക്കാട്, നായകന്‍ അച്ഛന്‍ തന്നെ. ജയറാമിനെയും മീര ജാസ്മിനെയും കേന്ദ്ര കഥാപാത്രങ്ങളാക്കി സത്യന്‍ അന്തിക്കാട് സംവിധാനം ചെയ്യുന്ന പുതിയ ചിത്രത്തിന്റെ സെറ്റില്‍ കഴിഞ്ഞ ദിവസമാണ് കാളിദാസ് ജയറാം എത്തിയത്. അച്ഛന്‍ ജയറാം, സത്യന്‍ അന്തിക്കാട്, അനൂപ് സത്യന്‍ എന്നിവര്‍ക്കൊപ്പം നില്‍ക്കുന്ന ചിത്രങ്ങളും കാളിദാസ് തന്റെ ഇന്‍സ്റ്റഗ്രാം അക്കൗണ്ടില്‍ പങ്കുവെച്ചിട്ടുണ്ട്. തന്റെ ആദ്യ സിനിമയായ കൊച്ചു കൊച്ചു സന്തോഷങ്ങളിലേക്ക് തിരിച്ചു പോയി എന്നാണ് കാളിദാസ് ചിത്രങ്ങളോടൊപ്പം കുറിച്ചിരിക്കുന്നത്. ”കൊച്ചു കൊച്ചു സന്തോഷങ്ങളുടെ സമയത്തിലേക്ക് തിരിച്ചു പോയ പോലെ തോന്നുന്നു. മാസ്റ്റര്‍ ഫിലിംമേക്കറായ ഇദ്ദേഹം വര്‍ക്ക് ചെയ്യുന്നത് കാണാന്‍ എപ്പോഴും സന്തോഷമാണ്. അതും എന്റെ ഏറ്റവും പ്രിയപ്പെട്ട നടന്‍ മിസ്റ്റര്‍ ജയറാമിനൊപ്പം.” ”വീട്ടില്‍ തിരിച്ചെത്തിയ പോലെ തോന്നി.

ഇവരുടെ കൂട്ടുകെട്ടിന്റെ വലിയ ആരാധകനാണ് ഞാന്‍. ഈ സിനിമയും നിങ്ങളെയാരേയും നിരാശപ്പെടുത്തില്ല എന്ന് ഉറപ്പാണ്. ഇത് തിയേറ്ററില്‍ കാണുന്നതിനായി കാത്തിരിക്കുന്നു” എന്നാണ് കാളിദാസ് തന്റെ സോഷ്യല്‍ മീഡിയ പേജില്‍ കുറിച്ചിരിക്കുന്നത്. ഒരുപാട് വര്‍ഷങ്ങള്‍ക്ക് ശേഷം മീര ജാസ്മിന്‍ മലയാള സിനിമയിലേക്ക് തിരിച്ചു വരുന്ന സിനിമകൂടിയാണ് ഇത്.