പീഡന, ​ഗാർഹിക പീഡന കേസുകൾ, ദാമ്പത്യ ജീവിതത്തിലെ നിരന്തര പരാജയം; നാലാമതും വിവാഹിതനായി വിവാദ ഗായകൻ

ബംഗ്ലാദേശി ഗായകൻ മൈനുൾ അസൻ നോബിൾ നാലാമതും വിവാഹിതനായി. ഫർസാൻ അർഷിയെന്ന ഫുഡ് വ്ലോഗറിനെയാണ് നോബിൾ വിവാഹം ചെയ്തത്. പെരുമാറ്റ ദൂഷ്യത്തിന്റെ പേരിൽ പലപ്പോഴും വിവാദങ്ങളിലകപ്പെട്ടിട്ടുള്ള ​ഗായകനാണ് മൈനുൾ അസൻ. ഫർസാന്റെ രണ്ടാം വിവാഹമാണിത്. നദിം അഹമ്മദ് ആണ് ഫർസാന്റെ ആദ്യ ഭർത്താവ്. വീണ്ടും വിവാഹിതനായെന്ന കാര്യം മൈനുൾ തന്നെയാണ് സോഷ്യൽ മീഡിയയിലൂടെ അറിയിച്ചത്. അസഭ്യമായി സംസാരിച്ചതിന് ഉൾപ്പെടെ പല തവണ വിമർശനങ്ങൾ ഏറ്റുവാങ്ങിയ ​ഗായകനാണ് മൈനുൾ അസൻ.

തുടരെത്തുടരെയായി മൂന്ന് വിവാഹം കഴിച്ചെങ്കിലും എല്ലാം വിവാഹമോചനത്തിലാണ് കലാശിച്ചത്. റിമിയാണ് നോബിളിന്റെ ആദ്യഭാര്യ. വിവാഹം കഴിഞ്ഞ് അധികം വൈകാതെ റിമിയുമായുള്ള നോബിൾ അവസാനിപ്പിച്ചു. ബന്ധുവായ യുവതിയെയാണ് പിന്നീട് വിവാഹം ചെയ്തു. എന്നാൽ ആ ബന്ധവും വളരെ വേ​ഗം അവസാനിച്ചു. പിന്നീട് സൽസബിൽ എന്ന ​ഗായികയുമായിട്ടായിരുന്നു വിവാഹവും. ഈ ബന്ധത്തും അധിക കാലം നീണ്ടില്ല. നോബിളിനെതിരെ സൽസബിൽ ഗാർഹികപീഡന പരാതി നൽകുന്നതിൽ വരെ കാര്യങ്ങൾ എത്തുകയും ചെയ്തു.

നോബിൾ മർദിച്ചതിനെ തുടർന്ന് സൽസബിൽ ആശുപത്രിയിൽ ചികിത്സ തേടിയിരുന്നു. നോബിൾ വളരെ നല്ലയാളായിരുന്നുവെന്നും പിന്നീട് മോശം കൂട്ടുക്കെട്ടുകളിൽ പെടുകയും ലഹരിക്ക് അടിമയാവുകയും ചെയ്തുവെന്നുമുള്ള സൽസബിലിന്റെ വെളിപ്പെടുത്തലും പിന്നാലെ വലിയ ചർച്ചയായി. സ്വകാര്യ ചാനലിലെ റിയാലിറ്റി ഷോയിലൂടെ ശ്രദ്ധേയനായി സംഗീതരംഗത്ത് ചുവടുറപ്പിച്ച ഗായകനാണ് മൈനുൾ അസൻ നോബിൾ. രബീന്ദ്രനാഥ ടാഗോറിനെയും നരേന്ദ്ര മോദിയെയും കുറിച്ചു നടത്തിയ മോശം പരാമർശങ്ങൾ നോബിളിനെ വിവാദ​ഗായകനാക്കി മാറ്റി. കരാറിൽ ഒപ്പ് വച്ചിട്ടും ഏറ്റെടുത്ത സംഗീതപരിപാടികളിൽ പങ്കെടുക്കാൻ തയറാകാത്തതും ലൈംഗിക പീഡന കേസും അടക്കം ​ഗായകന്റെ പേരിലുണ്ട്.