ലിജോ മാജിക് ഒടിടി പ്രേക്ഷകർ ഏറ്റെടുക്കുമോ? മലൈക്കോട്ടൈ വാലിബൻ ഒടിടിയിലെത്തുന്നു

മോഹൻലാലിനെ നായകനാക്കി ലിജോ ജോസ് പെല്ലിശ്ശേരി സംവിധാനം ചെയ്ത മലൈക്കോട്ടൈ വാലിബൻ ഏറെ പ്രതീക്ഷയോടെയാണ് തിയേറ്ററുകളിലെത്തിയത്. എന്നാൽ സമ്മിശ്ര പ്രതികരണങ്ങളാണ് ചിത്രത്തിന് ലഭിച്ചത്. ഇപ്പോഴിതാ ചിത്രം ഒടിടിയിലെത്തുന്നവെന്ന റിപ്പോർട്ടുകളാണ് പുറത്തുവരുന്നത്. മാർച്ച് ആദ്യ വാരം മുതൽ ചിത്രം ഒടിടിയിലെത്തുമെന്നാണ് റിപ്പോർട്ടുകൾ. ഡിസ്നി പ്ലസ് ഹോട്ട് സ്റ്റാറാണ് ഒടിടി അവകാശം നേടിയിരിക്കുന്നതെന്നും ഒടിടി പ്ലേ റിപ്പോർട്ടിൽ പറയുന്നു. വൻ തുകയ്ക്കാണ് ഹോട്ട് സ്റ്റാർ വാലിബൻ സ്വന്തമാക്കിയതെന്നും റിപ്പോർട്ടുകളുണ്ട്. ജനുവരി 25 നാണ് മലൈക്കോട്ടൈ വാലിബൻ തിയേറ്ററുകളിലെത്തിയത്. അതുകൊണ്ട് തന്നെ ബോക്സ്ഓഫീസിൽ പ്രതീക്ഷിച്ച പോലെ വിജയമാകാൻ ചിത്രത്തിനു സാധിച്ചില്ല. 50 കോടിയിലേറെ ചെലവിലാണ് വാലിബന്റെ ചിത്രീകരണം പൂർത്തിയായത്. എന്നാൽ ഇതുവരെ 30 കോടിയിൽ താഴെ മാത്രമേ ചിത്രത്തിന്റെ കളക്ഷൻ എത്തിയിട്ടുള്ളൂ.

ചിത്രത്തിന് രണ്ടാം ഭാഗം ഉണ്ടാകുമെന്നാണ് അണിയറ പ്രവർത്തകർ പറയുന്നത്. മലൈക്കോട്ടൈ വാലിബൻ രണ്ടാം ഭാഗം കുറച്ചുകൂടി വലുതായിരിക്കും. കഥാപാത്രങ്ങളും വലുത് തന്നെ. മലൈക്കോട്ടൈ വാലിബൻ ഒന്നാം ഭാഗത്തിലെ പോലെ തന്നെ ഇന്ത്യൻ ഭൂപ്രദേശം തന്നെയായിരിക്കും ചിത്രത്തിന്റെ പശ്ചാത്തലമെന്നും സംവിധായകൻ ലിജോ ജോസ് പെല്ലിശ്ശേരി പറയുന്നു. ഇപ്പോഴത്തെ ഡീഗ്രേഡിങ്ങോ ബോക്‌സ്ഓഫീസിലെ മോശം പ്രകടനമോ വാലിബന്റെ രണ്ടാം ഭാഗത്തെ ബാധിക്കില്ലെന്ന് നിർമാതാവ് ഷിബു ബേബി ജോണും പറഞ്ഞു. ആദ്യ ഭാഗത്തെ പോലെ വലിയൊരു ക്യാൻവാസിൽ തന്നെയായിരിക്കും രണ്ടാം ഭാഗവും പ്രേക്ഷകരിലേക്ക് എത്തുക.