28 വര്‍ഷങ്ങള്‍ക്കിപ്പുറം ആദ്യമായി ‘മുത്തു’ കണ്ട് മീന!!

തെന്നിന്ത്യയിലെ ശ്രദ്ധേയ നായികയാണ് നടി മീന. മലയാളത്തിലും തമിഴിലും തെലുങ്കിലുമെല്ലാം ഏറെ ആരാധകരുള്ള നായികയായിരുന്നു മീന. ഭര്‍ത്താവിന്റെ അപ്രതീക്ഷിത വിയോഗത്തിന് ശേഷം മീന വീണ്ടും സ്‌ക്രീനില്‍ സജീവമായിരിക്കുകയാണ്.

ഇപ്പോള്‍ റീ-റീലീസുകളുടെ കാലമാണ്. മലയാളത്തിലും തമിഴിലുമെല്ലാം നിരവധി ചിത്രങ്ങള്‍ റീറിലീസ് ചെയ്തിട്ടുണ്ട്. ഇപ്പോഴിതാ അങ്ങനെയൊരു ചിത്രത്തിന്റെ വിശേഷമാണ് ശ്രദ്ധേയമാകുന്നത്. രജനികാന്തിന്റെ സൂപ്പര്‍ ഹിറ്റ് ചിത്രം മുത്തു റീ റിലീസ് ചെയ്തിരിക്കുകയാണ്.

തമിഴിലെ എക്കാലത്തെയും മികച്ച വാണിജ്യ വിജയമായിരുന്നു കെഎസ് രവികുമാര്‍ സംവിധാനം ചെയ്ത മുത്തു. ഇപ്പോഴിതാ വര്‍ഷങ്ങള്‍ക്ക് ശേഷം കൃത്യമായി പറഞ്ഞാല്‍ 28 വര്‍ഷങ്ങള്‍ക്ക് ശേഷം മുത്തു ചിത്രം മുഴുവനായി ആദ്യമായി തിയേറ്ററില്‍ കണ്ടിരിക്കുകയാണ് മീന. മീമ തന്നെയായിരുന്നു ചിത്രത്തിലെ നായിക.

ടിവിയില്‍ കുറച്ച് ഭാഗങ്ങള്‍ കണ്ടതല്ലാതെ മുത്തു ഇതുവരെ മുഴുവനായി മീന കണ്ടിട്ടില്ലായിരുന്നു. ആ ആഗ്രഹമാണ് വര്‍ഷങ്ങള്‍ക്കിപ്പുറം സഫലമായിരിക്കുന്നത്.

സിനിമയുടെ ആദ്യ പ്രദര്‍ശനം കാണാന്‍ സംവിധായകന്‍ കെ.എസ് രവികുമാറിനൊപ്പമാണ് മീന ചെന്നൈ രോഹിണി തിയേറ്ററിലെത്തിയത്. കവിതാലയാ പ്രൊഡക്ഷന്‍സിന്റെ ബാനറില്‍ രാജം ബാലചന്ദറും പുഷ്പ കന്തസാമിയും ചേര്‍ന്ന് നിര്‍മ്മിച്ച ചിത്രം വന്‍ വിജയമായിരുന്നു.. എസ്എസ് രാജമൗലിയുടെ ആര്‍ആര്‍ആര്‍ മറികടക്കുംവരെ ജപ്പാനില്‍ ഏറ്റവുമധികം കളക്റ്റ് ചെയ്ത ഇന്ത്യന്‍ ചിത്രം മുത്തുവായിരുന്നു.