തിരുവനന്തപുരം: ലോക്സഭയിലേക്ക് വിജയിച്ച കെ രാധാകൃഷ്ണന് പകരം മാനന്തവാടി എംഎൽഎ ഒ ആർ കേളു മന്ത്രിയാകും. പട്ടിക ജാതി ക്ഷേമ വകുപ്പായിരിക്കും കേളുവിന് ലഭിക്കുക. സിപിഎം സംസ്ഥാന സമിതിയംഗമാണ് ഒ ആർ കേളു. അതേസമയം, മന്ത്രിസഭയിൽ കൂടുതൽ മാറ്റങ്ങൾ വന്നേക്കുമെന്നും വിവരങ്ങളുണ്ടാകും. കെ രാധാകൃഷ്ണൻ വഹിച്ചിരുന്ന ദേവസ്വം വകുപ്പിൻറെ ചുമതല വി എൻ വാസവന് നൽകും. പാർലമെൻററി കാര്യ വരുപ്പ് എം ബി രാജേഷിനായിരിക്കും.
ആലത്തൂരിൽ നിന്ന് ലോക്സഭാ എം പിയായി രാധാകൃഷ്ണൻ തെര‍ഞ്ഞെടുക്കപ്പെട്ടതോടെയാണ് മന്ത്രിസ്ഥാനവും എംഎൽഎ സ്ഥാനവും രാജിവെച്ചത്. പട്ടികജാതി വികസനം, ദേവസ്വം തുടങ്ങിയ പ്രധാന വകുപ്പുകളുടെ മന്ത്രിയായിരുന്നു കെ രാധാകൃഷ്ണൻ. കേരളത്തിൽ നിന്ന് ലോക്സഭ തെരഞ്ഞെ‌ടുപ്പിൽ വിജയിച്ച സിപിഎമ്മിന്റെ ഏക സ്ഥാനാർത്ഥിയാണ് കെ രാധാകൃഷ്ണൻ. സ്ഥാനമൊഴിയുന്നതിന് തൊട്ടുമുമ്പ് പട്ടിക വിഭാഗക്കാർ കൂടുതലായി താമസിക്കുന്ന സ്ഥലങ്ങളുടെ പേരുകൾ മാറ്റാനുള്ള ഉത്തരവിൽ രാധാകൃഷ്ണൻ ഒപ്പിട്ടിരുന്നു. കോളനി, സങ്കേതം, ഊര് എന്നീ പേരുകൾ ഒഴിവാക്കാനാണ് അദ്ദേഹം ഉത്തരവിട്ടത്.
