എന്റെ ഏറ്റവും വിലപ്പെട്ട നിമിഷം!! മാലാഖ കുഞ്ഞിന്റെ ചിത്രം പങ്കുവച്ച് പേളി മാണി

കഴിഞ്ഞ ദിവസമാണ് നടി പേളി മാണിയും ശ്രീനിഷും രണ്ടാമത്തെ കണ്‍മണിയെത്തിയ സന്തോഷം പങ്കുവച്ചത്. പെണ്‍കുഞ്ഞ് പിറന്നിരിക്കുന്നു. പേളിയും മകളും സുഖമായും ആരോഗ്യത്തോടെയിരിക്കുന്നെന്നാണ് ശ്രീനിഷ് പങ്കുവച്ചത്. ഇപ്പോഴിതാ മാലാഖ കുഞ്ഞിന്റെ ചിത്രം പുറത്തുവിട്ടിരിക്കുകയാണ് പേളി.

ലേബര്‍ റൂമില്‍ നിന്നും കുഞ്ഞിനെ ആദ്യമായി കയ്യിലെടുത്ത ചിത്രത്തിനോടൊപ്പം ഹൃദ്യമായ കുറിപ്പും പങ്കുവച്ചിട്ടുണ്ട് പേളി. അവളുടെ മൃദുവായ ചര്‍മ്മയും ഹൃദയമിടിപ്പും ജീവിതത്തിലെ വിലപ്പെട്ട നിമിഷങ്ങളില്‍ ഒന്നായി ഓര്‍മ്മിക്കപ്പെടുമെന്നും പേളി പറയുന്നു.

‘നീണ്ട 9 മാസങ്ങള്‍ക്ക് ശേഷം ഞങ്ങള്‍ പരസ്പരം കണ്ടുമുട്ടിയിരിക്കുന്നു. ആദ്യമായാണ് ഞാനവളെ എടുക്കുന്നത്. അവളുടെ മൃദുവായ ചര്‍മ്മവും അവളുടെ ചെറിയ ഹൃദയമിടിപ്പുകളും എന്റെ ഏറ്റവും വിലപ്പെട്ട നിമിഷങ്ങളില്‍ ഒന്നായി എന്നും ഓര്‍മ്മിക്കപ്പെടും…ആനന്ദ കണ്ണീര്‍ പൊഴിയുകയാണ്, ഇന്ന് ഞാന്‍ ഒരു പെണ്‍കുഞ്ഞിന്റെ കൂടി അഭിമാനിയായ അമ്മയായിരിക്കുകയാണ്. നിങ്ങള്‍ എല്ലാവരും സ്‌നേഹ പ്രാര്‍ത്ഥനകളും ആശംസകളും അയക്കുന്നുണ്ടെന്ന് ശ്രീനി എന്നോട് പറഞ്ഞിട്ടുണ്ട്. ഞങ്ങളുടെ കൊച്ചുകുടുംബം ഇത്രമാത്രം സ്‌നേഹിക്കപ്പെടുന്നു എന്നറിയുന്നതില്‍ എന്റെ ഹൃദയം സന്തോഷത്താല്‍ നിറയുകയാണ്. എല്ലാവര്‍ക്കും ഒരുപാട് നന്ദി’, എന്ന് പേളി മാണി കുറിച്ചു.

നിരവധി പേരാണ് താരങ്ങള്‍ക്ക് ആശംസകള്‍ നേരുന്നത്. ഇന്നലെ വൈകിട്ടാണ് തങ്ങള്‍ക്ക് രണ്ടാമത്തെ കുഞ്ഞ് ജനിച്ച വിവരം ശ്രീനിഷ് അരവിന്ദ് അറിയിച്ചത്. 2021ലാണ് പേളിയ്ക്കും ശ്രീനിഷിനും നിലാ എന്ന ആദ്യത്തെ കുഞ്ഞ് പിറന്നത്. ബിഗ് ബോസ് മലയാളം സീസണ്‍ ഒന്നിലെ മത്സരാര്‍ഥികളായിരുന്നു പേളിയും ശ്രീനിഷും. ഷോയില്‍ വച്ച് പ്രണയത്തിലായ ഇരുവരും ഷോ കഴിഞ്ഞയുടനെ വിവാഹിതരായിരുന്നു. സോഷ്യല്‍മീഡിയയില്‍ സജീവമാണ് ഇരുവരും. എല്ലാ വിശേഷങ്ങളും പങ്കിടാറുണ്ട്. നില ബേബിയും ഏറെ ആരാധകരുള്ള താരമാണ്.