20 വർഷത്തെ കാത്തിരിപ്പിനൊടുവിൽ രചനയ്ക്ക് സ്വപ്നസാഫല്യം

മറിമായം എന്ന കോമഡി പരിപാടിയിലൂടെ മലയാളികളുടെ മനസ്സിൽ ഇടം നേടിയ താരമാണ് രചന നാരായണൻകുട്ടി. ജയറാമിനൊപ്പം ലക്കിസ്റ്റാർ എന്ന സിനിമയിൽ നായികയായി എത്തിയതോടെ താരത്തിനെ തേടി ഒട്ടനവധി മികച്ച കഥാപാത്രങ്ങളായിരുന്നു എത്തിയത്. സമൂഹമാധ്യമങ്ങളിലും സജീവമായ താരം പങ്കുവയ്ക്കുന്ന വിശേഷങ്ങൾക്കെല്ലാം വലിയ സ്വീകാര്യതയാണ് ലഭിക്കാറുള്ളത്.

അത്തരത്തിൽ താരം ഇപ്പോൾ പങ്കുവെച്ചിരിക്കുന്ന വിശേഷമാണ് ആരാധകർ ഏറ്റെടുത്തിരിക്കുന്നത്. നീണ്ട ഇരുപത് വർഷത്തിന് ശേഷം നാടകത്തിൽ അഭിയനയിക്കാൻ രചനയ്ക്ക് അവസരം ലഭിച്ചിരിക്കുകയാണ്. ആ വിശേഷമാണ് താരം ഇപ്പോൾ പങ്കുവെച്ചിരിക്കുന്നത്. സൂര്യ കൃഷ്ണമൂർത്തി സംവിധാനം ചെയ്യുന്ന അനാമിക എന്ന നാടകത്തിലൂടെയാണ് രചനയുടെ രണ്ടാം വരവ്. നാടക പരിശീലനത്തിന്റെ ചിത്രങ്ങൾ പങ്കുവച്ചാണ് ഈ വിവരം നടി പ്രേക്ഷകരെ അറിയിച്ചത്.

‘‘പ്രിയപ്പെട്ടവരേ, നീണ്ട 20 വർഷങ്ങൾക്ക് ശേഷം ഞാൻ ഒരു നാടകത്തിന്റെ ഭാഗമാവുകയാണ്. സൂര്യ കൃഷ്ണമൂർത്തി സർ സംവിധാനം ചെയ്യുന്ന അനാമിക എന്ന നാടകം ജൂൺ 3, 4 തീയതികളിൽ വൈകിട്ട് 6.30 ന് തൈക്കാട് സൂര്യ നാടക കളരിയിലെ ഗണേശത്തിലാണ് അരങ്ങേറുന്നത്ത്. ഏവരും തീർച്ചയായും വന്ന് ദയയോടെ ഈ അവസരത്തെ അനുഗ്രഹിക്കുകയും എന്റെ സ്വപ്നത്തിന്റെ ഭാഗമാകുകയും ചെയ്യണം.’’–രചന കുറിച്ചു.