18 വർഷത്തെ ദാമ്പത്യ ജീവിതം അവസാനിപ്പിക്കാൻ ധനുഷും ഐശ്വര്യയും; വിവാഹമോചന ഹർജി ഫയൽ ചെയ്തു

നടൻ രജനികാന്തിന്‍റെ മകളും സംവിധായികയുമായ ഐശ്വര്യ രജനീകാന്തും നടൻ ധനുഷും വിവാഹമോചനത്തിന് അപേക്ഷ നൽകി. ചെന്നൈ കുടുംബ കോടതിയിലാണ് പരസ്പര സമ്മതത്തോടെയുള്ള വിവാഹമോചന ഹർജി ഫയൽ ചെയ്തിട്ടുള്ളത്. 2022 ജനുവരിയിൽ വേർപിരിയാൻ പോവുകയാണെന്ന് ഇരുവരും പ്രഖ്യാപിച്ചിരുന്നു. വേർപിരിയൽ പ്രഖ്യാപിച്ച് ഏകദേശം ഒന്നര വർഷത്തിന് ശേഷമാണ് വിവാഹമോചന ഹർജി നല്‍കിയിട്ടുള്ളത്.

കഴിഞ്ഞ രണ്ട് വർഷമായി വേർപിരിഞ്ഞാണ് ഇരുവരും താമസിക്കുന്നത്. എന്നാല്‍ മക്കളായ യാത്രയുടെയും ലിംഗയുടെയും സ്കൂൾ പരിപാടികളില്‍ ഇവര്‍ ഒന്നിച്ച് എത്തിയിരുന്നു. 18 വർഷത്തെ ദാമ്പത്യത്തിന് ശേഷമാണ് ഇരുവരും വേർപിരിയുന്നത്. ധനുഷും ഐശ്വര്യയും യഥാക്രമം 21-ഉം 23-ഉം വയസുള്ളപ്പോൾ 2004ലാണ് വിവാഹിതരായത്.

‘സുഹൃത്തുക്കളായും ദമ്പതികളായും മാതാപിതാക്കളായും അഭ്യുദയകാംക്ഷികളായും 18 വർഷത്തെ ഒരുമിച്ചു. വളർച്ച, മനസിലാക്കൽ, പൊരുത്തപ്പെടുത്തൽ എന്നിങ്ങനെയായിരുന്നു യാത്ര. ഇന്ന് നമ്മൾ നമ്മുടെ വഴികൾ വേർതിരിക്കുന്ന സ്ഥലത്താണ് നിൽക്കുന്നത്. ഐശ്വര്യയും ഞാനും ദമ്പതികളെന്ന നിലയിൽ വേർപിരിയാനും വ്യക്തികളെന്ന നിലയിൽ ഞങ്ങളെ മനസ്സിലാക്കാനും തീരുമാനിച്ചു.’- ധനുഷ് മുമ്പ് കുറിച്ചത് ഇങ്ങനെയായിരുന്നു.