ചാക്കോച്ചന്‍ കമന്റ് ചെയ്താല്‍ ‘അനിയത്തിപ്രാവ്’ ഒന്നുകൂടി കാണാമെന്ന് പിഷാരടി!! പണി കൊടുത്ത് ആരാധകര്‍

മലയാളത്തിലെ എക്കാലത്തെയും മികച്ച സൂപ്പര്‍ഹിറ്റ് ചിത്രമാണ് കുഞ്ചാക്കോ ബോബന്‍ നായകനായെത്തിയ അനിയത്തിപ്രാവ്. പ്രണയ ചിത്രങ്ങളില്‍ എന്നും ഒന്നാം സ്ഥാനത്താണ് അനിയത്തിപ്രാവ്. ആരാധക ലോകം അത്രമേല്‍ ഹൃദയത്തോട് ചേര്‍ത്തതാണ് സുധിയെയും മിനിയെയും.

ഇപ്പോഴിതാ അനിയത്തിപ്രാവ് തിയ്യേറ്ററിലെത്തിയിട്ട് 27 വര്‍ഷങ്ങള്‍ പിന്നിടുകയാണ്. 1997 മാര്‍ച്ച് 26നാണ് ട്രെന്‍ഡ് സെറ്റര്‍ ആയി മാറിയ ഫാസില്‍ ചിത്രം അനിയത്തിപ്രാവ് തിയേറ്ററുകളിലെത്തിയത്. അതിനിടെ ആശംസകള്‍ നേര്‍ന്നുള്ള രമേഷ് പിഷാരടിയുടെ പോസ്റ്റ് വൈറലായിരിക്കുകയാണ്. പുതിയ ട്രെന്‍ഡിനൊപ്പം ചേര്‍ന്നാണ് രമേഷ് പിഷാരടിയുടെ പോസ്റ്റ്.

ഈ ഫോട്ടോയ്ക്കു ചാക്കോച്ചന്‍ കമന്റ് ചെയ്താല്‍ ‘അനിയത്തിപ്രാവ്’ ഒന്നുകൂടി കാണും എന്നാണ് പിഷാരടി സമൂഹമാധ്യമത്തില്‍ കുറിച്ചത്. കുഞ്ചാക്കോ ബോബനുമായി നില്‍ക്കുന്ന ഒരു മനോഹരചിത്രമാണ് പിഷു പങ്കുവച്ചത്.

”പോയി കാണൂ കാണൂ” എന്ന് കുഞ്ചാക്കോ ബോബന്‍ ചിത്രത്തിന് കമന്റ് ചെയ്തെങ്കിലും പിഷാരടിയെ വിടാന്‍ ആരാധകര്‍ തയാറായില്ല. പിഷാരടി കമന്റ് ചെയ്താല്‍ പിഷാരടിയുടെ സിനിമകള്‍ കാണാം എന്ന രീതിയില്‍ പിന്നീട് ചിത്രത്തിന് കമന്റുമായി ആരാധകര്‍ നിരന്നതോടെ പിഷാരടിക്ക് മറുപടി കൊടുക്കാതിരിക്കാന്‍ കഴിയാതെയായി. സംഭവം സമൂഹ മാധ്യമങ്ങളില്‍ വൈറലായിരിക്കുകയാണ്. പിഷു കമന്റ് ചെയ്താല്‍ പഞ്ചവര്‍ണത്തത്ത കാണും, കപ്പല്‍ മുതലാളി കാണും തുടങ്ങി പിഷാരടിയെ പിടികൂടിയിരിക്കുകയാണ് ആരാധകലോകം. എല്ലാ കമന്റുകള്‍ക്കും പിഷാരടിയും മറുപടി നല്‍കിയിട്ടുണ്ട്.

സിനിമയ്ക്കകത്തും പുറത്തും വലിയ സുഹൃത്ത് ബന്ധം കാത്തുസൂക്ഷിയ്ക്കുന്നവരാണ്
കുഞ്ചാക്കോ ബോബനും രമേഷ് പിഷാരടിയും. ഇരുവരും ഒരുമിച്ച് യാത്രകള്‍ നടത്താറുണ്ട്. ഒത്തുകൂടുന്ന നിമിഷങ്ങളുടെ ചിത്രങ്ങളെല്ലാം താരങ്ങള്‍ പങ്കിടാറുണ്ട്.