കഴിഞ്ഞ ആഴ്ചയാണ് നടി സന അല്‍ത്താഫും നടന്‍ ഹക്കിം ഷാജഹാനും വിവാഹിതരായത്. വളരെ സര്‍പ്രൈസായിട്ടാണ് താരങ്ങള്‍ വിവാഹവാര്‍ത്ത പുറത്തുവിട്ടത്. രജിസ്റ്റര്‍ ഓഫീസില്‍ നിന്നുള്ള ചിത്രങ്ങളാണ് താരങ്ങള്‍ പുറത്തുവിട്ടിരുന്നത്. രജിസ്റ്റര്‍ വിവാഹത്തിന് ശേഷം വളരെ സ്വകാര്യമായി റിസപ്ഷനും സംഘടിപ്പിച്ചിരുന്നു
ഇപ്പോഴിതാ റിസ്പഷന്റെ ചിത്രങ്ങള്‍ അനുവാദമില്ലാതെ പ്രചരിപ്പിച്ചവര്‍ക്കെതിരെ രംഗത്തെത്തിയിരിക്കുകയാണ് താരം. കുടുംബാംഗങ്ങള്‍ക്കും അടുത്ത സുഹൃത്തുക്കള്‍ക്കുമായി നടത്തിയ സ്വകാര്യ വിരുന്നിലാണ് അനുവാദമില്ലാതെ ചില ഓണ്‍ലൈന്‍ മാധ്യമങ്ങള്‍ പങ്കെടുത്തതും ചടങ്ങിലെ ദൃശ്യങ്ങള്‍ പകര്‍ത്തുകയും ചെയ്തും. സോഷ്യലിടത്തും ചിത്രങ്ങളും വീഡിയോയും വൈറലായിരുന്നു.
ഈയടുത്ത് ഞങ്ങള്‍ വളരെ സ്വകാര്യമായി ഒരു കുടുംബ ചടങ്ങ് നടത്തിയിരുന്നു. ഇതില്‍ ചില ഓണ്‍ലൈന്‍ മാധ്യമങ്ങള്‍ ഞങ്ങളറിയാതെ പങ്കെടുക്കുകയും ചടങ്ങ് ചിത്രീകരിക്കുകയും ഞങ്ങളുടെ അനുവാദമില്ലാതെ ആ വീഡിയോ ഓണ്‍ലൈനില്‍ പങ്കുവയ്ക്കുകയും ചെയ്തു.
ആ ചടങ്ങ് കവര്‍ ചെയ്യാന്‍ പല മാധ്യമങ്ങളും ഞങ്ങളെ സമീപിച്ചെങ്കിലും വിനയപൂര്‍വം ഞങ്ങള്‍ നിരസിക്കുകയായിരുന്നു. കാരണം, ആ ചടങ്ങ് അത്രയും സ്വകാര്യമായി നടത്താനായിരുന്നു ഞങ്ങള്‍ ആഗ്രഹിച്ചത്. അതുകൊണ്ട്, അവരോട് അതില്‍ പങ്കെടുക്കേണ്ടതില്ലെന്നും പറഞ്ഞു. കേരളത്തിലെ ഓണ്‍ലൈന്‍ മാധ്യമങ്ങളുടെ നിരാശാജനകമായ അവസ്ഥ ഏറെ ദുഃഖിപ്പിക്കുന്നു. കാഴ്ചക്കാരുടെ എണ്ണം കൂട്ടുന്നതിന് മറ്റുള്ളവരുടെ സ്വകാര്യതയിലേക്ക് അവര്‍ നടത്തുന്ന നഗ്‌നമായ കടന്നുകയറ്റം വളരെ നിരാശാജനകമാണ് എന്നാണ് സന സോഷ്യലിടത്ത് പങ്കുവച്ചത്.
