ഷാരൂഖ് ഖാന് ചിത്രം പഠാന് ബോക്സോഫീസില് തകര്ക്കുകയാണ്. കിങ് ഖാന്റെ തിരിച്ചുവരവ് ബോളിവുഡും ആരാധകരും ഒരുപോലെ ആഘോഷിച്ചിരിക്കുകയാണ് പഠാനിലൂടെ. ഇന്ത്യയില് ഏറ്റവും കൂടുതല് സമ്പന്നനായ യുവതാരമാണ് ഷാരൂഖ്. ആഗ്രഹം തോന്നിയതെന്തും സ്വന്തമാക്കുന്ന താരം തന്റെ പ്രിയതമയ്ക്കായി എന്താവും സമ്മാനിച്ചിരിക്കുക?
ഷാരുഖ് ഖാന്റെ വാലന്റൈന്ദിന സമ്മാനമെന്ത് എന്നറിയാന് കാത്തിരിപ്പിലാണ് ആരാധകലോകം. പഠാന്റെ വിജയത്തിനു ശേഷം ട്വിറ്ററില് ആരാധകരുമായി സംസാരിക്കുന്നതിനിടയിലാണ് പ്രണയദിനം എത്തിയത്. അപ്പോഴാണ് പ്രണയസമ്മാനത്തെ കുറിച്ചും സൂപ്പര്താരം വെളിപ്പെടുത്തിയത്.
ഗൗരിക്ക് ആദ്യമായി നല്കിയ വാലന്റൈന് ഗിഫ്റ്റ് എന്തായിരുന്നുവെന്ന ആരാധകന്റെ ചോദ്യത്തിന് മറുപടി നല്കിയിരിക്കുകയാണ് താരം. 1991 ലായിരുന്നു ഷാരൂഖ് ഖാനും ഗൗരി ഖാനും വിവാഹിതരായത്. ആറ് വര്ഷത്തെ പ്രണയത്തിനൊടുവിലായിരുന്നു വിവാഹം. കിങ് ഖാന് ആവുന്നതിന് മുമ്പുതന്നെ ഷാരുഖിന് പിന്തുണയുമായി ഗൗരിയുമുണ്ട്. ജീവിതത്തില് ആദ്യമായി തീവ്ര പ്രണയം തോന്നിയ പെണ്കുട്ടി ഗൗരിയാണെന്ന് ഷാരൂഖ് ഖാന് മുന്പും അഭിമുഖങ്ങളില് തുറന്നുപറഞ്ഞിട്ടുണ്ട്.
ആരാധകന്റെ ചോദ്യത്തിന് കൃത്യമായ മറുപടിയും താരം നല്കുന്നുണ്ട്. 34 വര്ഷം മുമ്പാണ് ഗൗരിക്ക് ആദ്യത്തെ സമ്മാനം നല്കിയത്. പിങ്ക് നിറത്തിലുള്ള ഒരു പ്ലാസ്റ്റിക് കമ്മലായിരുന്നു ആദ്യത്തെ സമ്മാനമെന്നും ഷാരൂഖ് പറഞ്ഞു.