‘ഒരു മുറൈ വന്ത് പാര്‍ത്തായ’ ചുവടുവച്ചത് എണ്ണ പുരട്ടിയ തറയില്‍ നിന്ന്!!! രഹസ്യം പങ്കുവച്ച് ശോഭന

മലയാളത്തിലെ എക്കാലത്തെയും ക്ലാസിക് സിനിമയാണ് മണിച്ചിത്രത്താഴ്. നാഗവല്ലിയും രാമനാഥനും തീര്‍ത്തും നൊസ്റ്റാള്‍ജിയയാണ്. കാലമെത്ര ചെന്നാലും വീര്യം കൂടുന്ന വീഞ്ഞുപോലെ ‘ഒരു മുറൈ വന്ത് പാര്‍ത്തായ’ നൃത്തവും, മലയാളിയ്ക്ക് അത്രമേല്‍ പ്രിയപ്പെട്ടതാണ്. 1993ല്‍ ഫാസിലിന്റെ സംവിധാനത്തിലിറങ്ങിയ ചിത്രമാണ് ‘മണിച്ചിത്രത്താഴ്’. ചിത്രത്തില്‍ മോഹന്‍ലാല്‍, സുരേഷ് ഗോപി, നെടുമുടി വേണു, തിലകന്‍ തുടങ്ങിയവരാണു മറ്റു പ്രധാന വേഷങ്ങള്‍ ചെയ്തത്.

‘ഒരു മുറൈ വന്ത് പാര്‍ത്തായ’ നൃത്തത്തിനെ കുറിച്ച് ഇതുവരെ ആരും അറിയാത്ത രഹസ്യം പങ്കുവച്ചിരിക്കുകയാണ് നടി ശോഭന. നാഗവല്ലിയായി ശോഭനയും രാമനാഥനായി ശ്രീധറും ആണ് ചുവടുകളുമായി നിറഞ്ഞാടിയത്.

കറുത്ത നിറത്തിലുള്ള തറയില്‍ നിന്നാണ് ഇരുവരും നൃത്തം ചെയ്യുന്നത്. കറുത്ത തറ നന്നായി തിളങ്ങുന്നത് ഗാന രംഗത്തില്‍ കാണാവുന്നതാണ്. അത് തറയില്‍ എണ്ണ പുരട്ടിയതുകൊണ്ടാണെന്നാണ് ശോഭന പറയുന്നത്. മാത്രമല്ല എണ്ണമയമുള്ള തറയില്‍ നൃത്തം ചെയ്യാന്‍ താനും ശ്രീധറും ഏറെ പ്രയാസപ്പെട്ടിരുന്നെന്നും ശോഭന പറഞ്ഞു.

ഇന്‍സ്റ്റഗ്രാമില്‍ പങ്കുവച്ച വീഡിയോയിലാണ് വര്‍ഷങ്ങള്‍ക്കിപ്പുറം അറിയാക്കഥ വെളിപ്പെടുത്തിയത്. തന്റെ നൃത്ത വിദ്യാലയത്തിലെ വിദ്യാര്‍ഥികള്‍ക്ക് ‘ഒരു മുറൈ വന്തു പാര്‍ത്തായ’ എന്ന ഗാനത്തിന്റെ ചുവടുകള്‍ ശോഭന പറഞ്ഞുകൊടുക്കുന്നതാണ് വീഡിയോ. ശോഭനയുടെ വിഡിയോ ഇതിനകം തന്നെ വൈറലായിക്കഴിഞ്ഞു.