മോഹന്‍ലാലിന്റെ എതിര്‍വേഷത്തിലെത്തുന്നത് ഒട്ടും എളുപ്പമുള്ള കാര്യമല്ല, തുറന്ന് പറഞ്ഞ് സ്ഫടികം ജോര്‍ജ്ജ്

വില്ലന്‍ വേഷങ്ങളിലൂടെ ആരാധകരുടെ ഹൃദയം കീഴടക്കിയ നടനാണ് സ്ഫടികം ജോര്‍ജ്ജ്. എസ്.ഐ കുറ്റിക്കാടന്‍ എന്ന കഥാപാത്രമാണ് ജോര്‍ജ്ജിനെ സ്ഫടികം ജോര്‍ജ്ജ് ആക്കി മാറ്റിയത്. ഇപ്പോഴിതാ മോഹന്‍ലാലിനൊപ്പമുള്ള അഭിനയ അനുഭവങ്ങള്‍ പങ്ക് വച്ച് എത്തിയിരിക്കുകയാണ് താരം.

സ്ഫടികം ജോര്‍ജിന്റെ വാക്കുകള്‍,

മോഹന്‍ലാലിന്റെ എതിര്‍വേഷത്തിലെത്തുന്നത് ഒട്ടും എളുപ്പമുള്ള കാര്യമല്ല. സ്ഫടികത്തില്‍ ആടുതോമ എന്ന കഥാപാത്രം മോഹന്‍ലാല്‍ തകര്‍ത്തഭിനയിച്ച വേഷമാണ്. ആടുതോമയുടെ എതിരായി വരുമ്പോള്‍ അത് വലിയ ടെന്‍ഷന്‍ നല്‍കിയ കാര്യമാണ്. അല്പം ടെന്‍ഷനടിച്ചു തന്നെയാണ് ഞാന്‍ സ്ഫടികത്തിന്റെ സെറ്റിലെത്തിയത്. എന്നാല്‍ ഓരോ സീനും ചെയ്തു തുടങ്ങിയതോടെ ആത്മവിശ്വാസം കൂടിവന്നു. ഒരു നടനെന്ന നിലയില്‍ വളരാന്‍ മോഹന്‍ലാല്‍ വലിയ പ്രചോദനമായിട്ടുണ്ടെന്നും എങ്ങനെ പ്രൊഫഷണലാകാമെന്ന് പഠിപ്പിച്ചുതന്നതും മോഹന്‍ലാലാണ്. അതുവരെ ഞാനൊരു അമച്വര്‍ ആര്‍ട്ടിസ്റ്റായിരുന്നു.

സംവിധായകന്‍ ഭദ്രന്‍ സാറും എന്റെ വേഷത്തെ കുറിച്ച് കൃത്യമായി പറഞ്ഞു തന്നിരുന്നു. താങ്കള്‍ക്ക് മലയാളസിനിമയില്‍ ഇതിനെക്കാള്‍ മികച്ച വേഷം ഒരുപക്ഷേ ഇനി കിട്ടാനുണ്ടാകില്ല എന്നാണ് അന്ന് ഭദ്രന്‍ എന്നോട് പറഞ്ഞത്. അന്നതു കേട്ടപ്പോള്‍ അങ്ങനെ തോന്നിയില്ലെങ്കിലും അത് ശരിയാണെന്നു കാലം തെളിയിച്ചു. മോഹന്‍ലാലും ഞാനും തിയേറ്ററില്‍ വെച്ചു കണ്ടുമുട്ടുന്ന സീനൊക്കെ ഗംഭീരമായി ചെയ്യാന്‍ കഴിഞ്ഞെന്നു എല്ലാവരും പറഞ്ഞതോടെ പിന്നെ ഞാന്‍ ട്രാക്കിലായി. സ്ഫടികം കാലത്തെ അതിജീവിക്കുന്ന സിനിമകളിലൊന്നാണ്. ഇന്നും സ്ഫടികം ടിവിയില്‍ വരുമ്പോള്‍ ആദ്യമായി കാണുന്ന അതേ ത്രില്ലിലിരുന്ന് കാണാറുണ്ടെന്ന് പലരും പറയാറുണ്ട്.എന്റെ വേഷത്തിന് കൂടി കിട്ടുന്ന അംഗീകാരമായാണ് ഞാനീ വാക്കുകളൊക്കെ കേള്‍ക്കാറുള്ളത്.