സുരേശനും സുമലതയ്ക്കും ആശംസകള്‍ നേര്‍ന്ന് സിനിമാലോകം!! ഹിറ്റായി ട്രീലറും

പ്രഖ്യാപന സമയം മുതല്‍ ആരാധകലോകം പ്രതീക്ഷയോടെ കാത്തിരിക്കുന്ന ചിത്രമാണ് ‘സുരേശന്റേയും സുമലതയുടേയും ഹൃദയഹാരിയായ പ്രണയകഥ’ എന്ന ചിത്രം. ന്നാ താന്‍ കേസ് കൊട് ചിത്രത്തിലെ കഥാപാത്രങ്ങളായിരുന്ന സുരേശന്റെയും സുമതലതയുടെയും കഥയാണ് ചിത്രം പറയുന്നത്. വളരെ വേറിട്ട രീതിയിലായിരുന്നു ചിത്രം പ്രഖ്യാപിച്ചത്. ചിത്രത്തിന്റെ പുതിയ അപ്‌ഡേറ്റ് എത്തിയിരിക്കുകയാണ്. ചിത്രം മെയ് 16ന് തിയ്യേറ്ററിലേക്ക് എത്തുകയാണ്.

സുരേശനും സുമലതയ്ക്കും ആശംസകള്‍ നേര്‍ന്നുകൊണ്ട് മലയാള സിനിമാലോകത്തെ താരങ്ങള്‍ ഒന്നിച്ചെത്തിയ ട്രീലര്‍ ശ്രദ്ധേയമായിരിക്കുകയാണ്. ടൊവിനോ, ഐശ്വര്യലക്ഷ്മി, ഫഹദ്, ബേസില്‍, അനഘ, വിന്‍സി, റോഷന്‍, ഗായത്രി, കനി കുസൃതി, സന്തോഷ് കീഴാറ്റൂര്‍, ദര്‍ശന, ദീപക് പറമ്പോല്‍, അനാര്‍ക്കലി, സുദേവ് നായര്‍, മഞ്ജു പിള്ള, ശ്രിന്ദ, പിപി കുഞ്ഞികൃഷ്ണന്‍, ഷാഹി കബീര്‍, സൈജു കുറുപ്പ്, സിത്താര, അനുമോള്‍, ശാന്തി, ഗണപതി, ദിവ്യ, മൃദുല്‍ നായര്‍ തുടങ്ങി നിരവധി താരങ്ങള്‍ സെല്‍ഫി റീലുകളുമായി ട്രീലറില്‍ എത്തിയിട്ടുണ്ട്.

രസകരമായ രീതിയില്‍ സിനിമയിലെ താരങ്ങളുടെ ഡയലോഗുകളും ട്രീലറില്‍ ചേര്‍ത്തിട്ടുണ്ട്.
‘ഞാന്‍ നിങ്ങളെയെല്ലാവരേയും ഒറ്റയ്‌ക്കൊറ്റയ്ക്ക് പരിചയപ്പെടാന്‍ ആഗ്രഹിക്കുന്നു’ എന്ന സുരേശന്റെ ഡയലോഗോടെയാണ് ട്രീലര്‍ തുടങ്ങുന്നത്. ഓരോ താരങ്ങളും സിനിമയുടെ പേരിലെ വാക്കുകള്‍ പറയുകയാണ്. ‘ഈ നാട്ടിലെ എല്ലാരും ഓന്റെയൊപ്പാ, ഓന്‍ ട്രെന്‍ഡിംഗാവും നോക്കിക്കോ’ എന്നൊരു ഡയലോഗോടെയാണ് ട്രീലര്‍ അവസാനിക്കുന്നത്.

രതീഷ് ബാലകൃഷ്ണന്‍ പൊതുവാളാണ് ചിത്രം ഒരുക്കുന്നത്. രാജേഷ് മാധവനും ചിത്ര നായരുമാണ് സുരേശന്‍ കാവുങ്കല്‍, സുമലത ടീച്ചര്‍ എന്നീ കഥാപാത്രങ്ങളായി എത്തിയിട്ടുള്ളത്. വേറിട്ട രീതിയിലുള്ള സേവ് ദി ഡേറ്റ് ടീസറും ഫസ്റ്റ് ലുക്കും വൈറലായിരുന്നു. 1960, 1990, 2023 ഇങ്ങനെ മൂന്ന് കാലഘട്ടങ്ങളിലുള്ള സുരേശന്റേയും സുമലതയുടെയും പ്രണയ നിമിഷങ്ങളാണ് ബ്ലാക്ക് ആന്‍ഡ് വൈറ്റിലും ഓറഞ്ച് നിറത്തിലും നീലയിലുമായിരുന്നു പോസ്റ്ററുകള്‍ എത്തിയിരുന്നത്.