തരുണി വിട പറഞ്ഞിട്ട് ഒന്‍പത് വര്‍ഷങ്ങള്‍

വെള്ളിനക്ഷത്രം എന്ന ഒറ്റ സിനിമ മതി തരുണിയെന്ന കൊച്ചുമിടുക്കിയെ ഓര്‍ക്കാന്‍.
അമ്മുക്കുട്ടി ആയി പ്രേക്ഷക മനസ്സില്‍ ചേക്കേറിയ ആ കൊച്ചുസുന്ദരിയുടെ കുസൃതിനിറഞ്ഞ ചിരിയും സംസാരം എല്ലാം ആരാധകര്‍ ഇന്നും ഓര്‍ക്കുന്നു. നടന്‍ പൃഥ്വിരാജിന്റെ മകളുടെ കഥാപാത്രത്തില്‍ ആയിരുന്നു ഇതില്‍ തരുണി സച്ചിദേവ് എത്തിയിരുന്നത്. ആദ്യ സിനിമയിലൂടെ തന്നെ മലയാളികളുടെ പ്രിയപ്പെട്ട താരമായി മാറുകയായിരുന്നു തരുണി . വെള്ളിനക്ഷത്രം കണ്ടവരെല്ലാം ഒരേ സ്വരത്തില്‍ പറഞ്ഞതാണ് തരുണി ഒരുപാട് നല്ല കഥാപാത്രങ്ങളായി ഇനിയും എത്തുമെന്നും നായികയാകുമെന്നുമൊക്കെ. പക്ഷെ അതിനൊന്നും തരുണി കാത്ത് നിന്നില്ല.
തരുണിയുടെ മരണവാര്‍ത്ത പ്രേക്ഷകരെ ഏറെ സങ്കടപ്പെടുത്തിയിരുന്നു. ജീവിച്ചു തുടങ്ങിയവെയാണ് തരുണിയെ തേടി മരണം എത്തിയത് . വിമാനപകടത്തില്‍ ആയിരുന്നു മരണം സംഭവിച്ചത്. തരുണിക്കൊപ്പം അമ്മയും മരണപ്പെട്ടു. ആ സമയത്ത് വെറും 14 വയസ്സായിരുന്നു തരുണിയുടെ പ്രായം.

മരിക്കുന്നതിനു മുമ്പ് തരുണി സുഹൃത്തുക്കളെ എല്ലാം കാണുകയും ഇവരോട് യാത്ര പറയുകയും ചെയ്തിരുന്നു. ഇതിനിടെ ഇനി കാണാന്‍ സാധിച്ചില്ലെങ്കിലോ എന്ന് തമാശ പോലെ തരുണി പറഞ്ഞതായും കൂട്ടുകാര്‍ ഓര്‍ക്കുന്നു. ഈ വിമാനം തകരുകയാണെങ്കില്‍ എന്തുചെയ്യുമെന്ന് തരുണി കൂട്ടുകാര്‍ക്ക് മെസേജ് അയക്കുകയും ചെയ്തിരുന്നു. പിന്നീട് ഫോണ്‍ സ്വിച്ച് ഓഫ് ചെയ്യുകയും ചെയ്തു. ശേഷം തരുണിയുടെ മരണവാര്‍ത്തയാണ് കൂട്ടുകാരികള്‍ അറിയുന്നത്. മരിച്ചിട്ട് ഒന്‍പത് വര്‍ഷങ്ങളായിട്ടും തരുണിയുടെ മുഖം മലയാളികള്‍ക്ക് മറക്കാന്‍ കഴിയില്ല.