മനുവിന്റെ ഒക്കത്തിരിക്കാന്‍ ഇനി മീനുക്കുട്ടി ഇല്ല!!! ലോകം മുഴുവന്‍ വാഴ്ത്തിയ ആ സ്‌നേഹക്കൂട്ടില്‍ ഇനി മനു തനിച്ച്

ഏട്ടന്റെ ഒക്കത്തിരുന്നു ലോകം കണ്ട മീനുക്കുട്ടി ഏട്ടനെ തനിച്ചാക്കി യാത്രയായി. വിവാഹചടങ്ങിലും സഹോദരിയെ താഴത്തുവയ്ക്കാതെ ഭക്ഷണം ഊട്ടിയും നടന്ന മനു സോഷ്യലിടത്ത് വൈറലായിരുന്നു. ലോകം മുഴുവന്‍ ആ സഹോദര സ്‌നേഹത്തിന് കൈയ്യടിച്ചിരുന്നു. അരയ്ക്ക് താഴെ തളര്‍ന്ന സഹോദരിയെ പൊന്നുപോലെയാണ് മനു നോക്കിയിരുന്നത്.

ഹൃദയരോഗത്തെ തുടര്‍ന്ന് ചികിത്സയിലായിരുന്നു മീനു ഇന്നലെ പുലര്‍ച്ചെയോടെയാണ് വിട പറഞ്ഞത്. തിരുവനന്തപുരം ജനറല്‍ ആശുപത്രിയിലായിരുന്നു അന്ത്യം. ശ്രീചിത്ര മെഡിക്കല്‍ സെന്ററിലായിരുന്നു ചികിത്സ.

രോഗം ഭേദമാക്കാന്‍ കഴിയില്ലെന്ന് അറിഞ്ഞെങ്കിലും മരണത്തിന് കുഞ്ഞനുജത്തിയെ പെട്ടെന്ന് വിട്ടുകൊടുക്കാന്‍ മനു തയ്യാറായില്ല. ഒരു വര്‍ഷം മുമ്പ് തുടര്‍ചികിത്സ മെഡിക്കല്‍ കോളജ് ആശുപത്രിയിലേക്ക് മാറ്റി. കിടക്കയുടെ അസൗകര്യം ഇവിടെയുള്ളതുകൊണ്ട് ജനറല്‍ ആശുപത്രിയിലേക്ക് മാറ്റിയിരുന്നു. കഴിഞ്ഞ ശനിയാഴ്ച രോഗാവസ്ഥ മൂര്‍ച്ഛിച്ചതിനെ തുടര്‍ന്ന് ജനറല്‍ ആശുപത്രിയില്‍ പ്രവേശിപ്പിച്ചെങ്കിലും ഇന്നലെ മരണത്തിന് കീഴടങ്ങി.

പട്ടം വാര്‍ഡ് മുന്‍ ബിജെപി കൗണ്‍സിലര്‍ രമ്യ രമേശുമായുള്ള മനുവിന്റെ വിവാഹദിനത്തിലാണ് മനുവും ഇടുപ്പിന് താഴോട്ട് തളര്‍ന്ന കുഞ്ഞനുജത്തി മീനുവും വൈറലായത്. കുഞ്ഞനുജത്തിയെ ഒക്കത്തിരുത്തി വിവാഹ പന്തലിലെത്തുന്ന മനുവിന്റെ ദൃശ്യം വൈറലായിരുന്നു.

ഓര്‍മ്മവെച്ച നാള്‍ മുതല്‍ മനുവിന്റെ എല്ലാമായിരുന്നു അനുജത്തി മീനു. എട്ടാം ക്ലാസ്സുവരെ മീനു പഠിച്ചിട്ടുണ്ട്. മനുവിന്റെ ഇരുപത്തിയൊന്നാമത്തെ വയസ്സില്‍ അച്ഛന്‍ ഹരീന്ദ്രന്‍നായര്‍ മരിച്ചപ്പോഴും മീനുവിന് അച്ഛന്റേയും സഹോദരന്റേയും സ്നേഹംനല്‍കി മനു കൂടെനിന്നു. വിവാഹം വരെ സഹോദരിയ്ക്ക് വേണ്ടി മാറ്റി വച്ചതായിരുന്നു. മീനുവിന്റെ നിര്‍ബന്ധത്തിലാണ് മനു വിവാഹം കഴിക്കാന്‍ തയ്യാറായത്.

ഓട്ടോറിക്ഷ ഡ്രൈവറാണ് മനു. വിശേഷങ്ങള്‍ക്കെല്ലാം അമ്മ രമാദേവിക്കൊപ്പം മീനുവും മനുവിന്റെ ഒക്കത്തുണ്ടാകും. ജീവിതത്തില്‍ എന്നും ഒക്കത്തുണ്ടായിരുന്ന കുഞ്ഞനുജത്തി ശാന്തികവാടത്തിലേക്കുള്ള അവസാന യാത്രയിലും മനു തന്നെയാണ് എടുത്തത്.