കൂട്ടിക്കൽ ജയചന്ദ്രന് ഇനിയും ആശ്വസിക്കാം! പോക്സോ കേസിൽ നടന്റെ അറസ്റ്റ് തടഞ്ഞു സുപ്രീം കോടതി.നാലുവയസുകാരിയെ ലൈംഗിമായി ഉപദ്രവിച്ചെന്ന കേസിലാണ് കൂട്ടിക്കല് ജയചന്ദ്രന്റെ അറസ്റ്റ് കോടതി തടഞ്ഞത്. അന്വേഷണവുമായി സഹകരിക്കണമെന്ന് കോടതി ജയചന്ദ്രനോട് ആവശ്യപ്പെട്ടു. മുന്കൂര് ജാമ്യാപേക്ഷയില് സുപ്രീംകോടതി സംസ്ഥാന സര്ക്കാരിന് നോട്ടീസ് അയച്ചു. ജയചന്ദ്രന്റെ മുന്കൂര് ജാമ്യാപേക്ഷ ഹൈക്കോടതി നേരത്തെ തള്ളിയിരുന്നു. ഇതിന് പിന്നാലെ കേരളാ പൊലീസ് നടനെതിരെ ലുക്കൗട്ട് നോട്ടീസ് പുറപ്പെടുവിച്ചിരുന്നു. നാലു വയസുകാരിയെ പീഡിപ്പിച്ചെന്ന പരാതിയിലാണ് കൂട്ടിക്കല് ജയചന്ദ്രനെതിരേ പൊലീസ് കേസെടുത്തത്.
കുട്ടിയുടെ അമ്മയുടെ പരാതിയെത്തുടര്ന്ന് കോഴിക്കോട് കസബ പൊലീസാണ് നടനെതിരെ കേസെടുത്തത്. കുടുംബ തര്ക്കങ്ങള് മുതലെടുത്ത് ജയചന്ദ്രന് മകളെ പീഡിപ്പിച്ചുവെന്നാണ് പരാതി. കസബ പൊലീസ് കുട്ടിയുടെ മൊഴിയെടുത്തിരുന്നു. കുട്ടിയുടെ മൊഴി അവിശ്വസിക്കേണ്ടതില്ലെന്ന് ചൂണ്ടിക്കാട്ടിയാണ് മുന്കൂര് ജാമ്യാപേക്ഷ ഹൈക്കോടതി തള്ളിയത്.
അതേസമയം നടൻ്റെ വാദം അംഗീകരിച്ചാണ് സുപ്രീം കോടതി ജസ്റ്റിസ് ബിവി നാഗരത്ന അധ്യക്ഷനായ ബെഞ്ചിൻ്റെ ഈ തീരുമാനം. ഹർജി അടുത്തമാസം 28ന് കോടതി വീണ്ടും പരിഗണിക്കും.
