നടൻ കുഞ്ചാക്കോ ബോബനെക്കുറിച്ചുള്ള (ചാക്കോച്ചൻ) തന്റെ വാക്കുകൾ ചില ഓൺലൈൻ മാധ്യമങ്ങൾ വളച്ചൊടിച്ച് വാർത്തയാക്കിയത് കടുത്ത വിഷമമുണ്ടാക്കിയെന്ന് മിമിക്രി കലാകാരനായ സുനിൽ രാജ് ഇടപ്പാൾ. ചാക്കോച്ചൻ തനിക്ക് ഒരുപാട് ഉപകാരങ്ങൾ മാത്രമേ ചെയ്തിട്ടുള്ളൂവെന്നും, തന്റെ പോസ്റ്റ് തെറ്റായി വ്യാഖ്യാനിച്ച് അദ്ദേഹത്തിന് ബുദ്ധിമുട്ടുണ്ടാക്കരുതെന്നും സുനിൽ രാജ് ആവശ്യപ്പെട്ടു. സമൂഹമാധ്യമങ്ങളിലൂടെ പുറത്തുവിട്ട വീഡിയോയിലൂടെയാണ് അദ്ദേഹം വിശദീകരണം നൽകിയത്.
സംഭവത്തിൻ്റെ തുടക്കം
സംവിധായകൻ രതീഷ് ബാലകൃഷ്ണ പൊതുവാളിൻ്റെ ‘സുരേശൻ്റെയും സുമലതയുടെയും ഹൃദയഹാരിയായ പ്രണയകഥ’ എന്ന ചിത്രവുമായി ബന്ധപ്പെട്ടാണ് വിവാദങ്ങൾക്ക് തുടക്കമായത്. കുഞ്ചാക്കോ ബോബൻ്റെ കഥാപാത്രത്തിനായി ചില സീനുകളിൽ താൻ ഡ്യൂപ്പായി അഭിനയിച്ചുവെന്ന് വെളിപ്പെടുത്തിക്കൊണ്ട് സുനിൽ രാജ് നേരത്തെ ഒരു പോസ്റ്റ് പങ്കുവെച്ചിരുന്നു. നടൻ വിദേശത്തായിരുന്ന സമയത്ത്, ചിത്രത്തിലെ ചില തിരക്ക് കുറഞ്ഞ ഷോട്ടുകൾ (ചീറ്റിങ് ഷോട്ടുകൾ, സജഷൻ ഷോട്ടുകൾ) പൂർത്തിയാക്കാൻ തന്നെ നിർദ്ദേശിച്ചത് കുഞ്ചാക്കോ ബോബൻ തന്നെയായിരുന്നുവെന്നും, അത് തനിക്ക് ലഭിച്ച വലിയൊരു അവസരമായിരുന്നുവെന്നും സുനിൽ രാജ് വ്യക്തമാക്കിയിരുന്നു.
വളച്ചൊടിച്ച വാർത്തകൾ
എന്നാൽ സുനിൽ രാജിൻ്റെ ഈ പോസ്റ്റ് ചില ഓൺലൈൻ മാധ്യമങ്ങൾ ദുർവ്യാഖ്യാനം ചെയ്തു. “ചാക്കോച്ചനെക്കുറിച്ച് രഹസ്യങ്ങൾ വെളിപ്പെടുത്തി”, “ചിത്രത്തിൽ ചാക്കോച്ചൻ അഭിനയിച്ചില്ല” എന്ന രീതിയിലുള്ള തലക്കെട്ടുകളോടെ വാർത്തകൾ പ്രചരിച്ചതോടെയാണ് വിഷയം വിവാദമായത്.
“അദ്ദേഹം ഒരു ഉപദ്രവവും ചെയ്തിട്ടില്ല” – സുനിൽ രാജ്
ഇതോടെയാണ് വിശദീകരണവുമായി സുനിൽ രാജ് വീണ്ടും രംഗത്തുവന്നത്. കുഞ്ചാക്കോ ബോബൻ ചെയ്ത നല്ലൊരു സഹായം മറ്റുള്ളവർ അറിയാൻ വേണ്ടിയാണ് താൻ ആ പോസ്റ്റ് ഇട്ടതെന്നും, അത് പുറത്തുവന്നപ്പോൾ നെഗറ്റീവ് ആയി മാറിയെന്നും അദ്ദേഹം പറഞ്ഞു.
“ചാക്കോച്ചൻ എന്നോട് ഒരു തെറ്റും ചെയ്തിട്ടില്ല, അദ്ദേഹം ഉപകാരം അല്ലാതെ ഒരു ഉപദ്രവവും എൻ്റെ അടുത്ത് ചെയ്തിട്ടില്ല, ചെയ്യുകയുമില്ല. ഒരിക്കലും ഒരു മനുഷ്യനോടും ദ്രോഹം ചെയ്യാത്ത വ്യക്തിയാണ് അദ്ദേഹം. ഞാൻ പറഞ്ഞ സത്യങ്ങൾ വളച്ചൊടിച്ച്, അദ്ദേഹത്തിന് വിഷമം ഉണ്ടാക്കുന്ന രീതിയിലേക്ക് കാര്യങ്ങൾ എത്തിക്കരുത്. അദ്ദേഹത്തെപ്പോലൊരു നല്ല മനുഷ്യനുമായി സൗഹൃദം പുലർത്താൻ കഴിയുക എന്നത് എന്നെ സംബന്ധിച്ചിടത്തോളം വലിയ കാര്യമാണ്.”
