കൊച്ചി: മെഗാസ്റ്റാർ മമ്മൂട്ടിയും നടൻ വിനായകനും പ്രധാന കഥാപാത്രങ്ങളെ അവതരിപ്പിക്കുന്ന ക്രൈം ത്രില്ലർ ചിത്രം ‘കളംകാവൽ’ ഡിസംബർ 5ന് ലോകമെമ്പാടുമുള്ള തിയേറ്ററുകളിൽ എത്താൻ ഒരുങ്ങുന്നു. ജിതിൻ കെ. ജോസ് ആദ്യമായി സംവിധാനം ചെയ്യുന്ന ഈ ചിത്രം മമ്മൂട്ടി കമ്പനിയാണ് നിർമ്മിക്കുന്നത്.
റിലീസിന് മുന്നോടിയായി, ചിത്രത്തിലെ അനുഭവങ്ങൾ പങ്കുവെച്ച് വിനായകൻ നടത്തിയ വെളിപ്പെടുത്തലുകൾ സിനിമാ പ്രേമികൾക്കിടയിൽ ചർച്ചയായി. ‘കളംകാവലി’ലെ തന്റെ കഥാപാത്രം മമ്മൂട്ടി നൽകിയ സമ്മാനമാണെന്നാണ് വിനായകൻ പറഞ്ഞത്. മമ്മൂട്ടിക്കൊപ്പം ഒരു പ്രധാന വേഷം ചെയ്യാനുള്ള അവസരം ജീവിതത്തിലെ വലിയ ഭാഗ്യമായി കരുതുന്നുവെന്നും അദ്ദേഹം കൂട്ടിച്ചേർത്തു.
മമ്മൂട്ടിയോടൊപ്പം പ്രവർത്തിച്ചതിനെക്കുറിച്ച് വിനായകൻ ഇങ്ങനെ പറഞ്ഞു: “മമ്മൂക്കയുമായി വർക്ക് ചെയ്യാൻ വളരെ എളുപ്പമാണ്. പുറത്തുള്ള ആളുകൾ പറയുന്നപോലെയല്ല. സംഭാഷണ രംഗങ്ങളിൽ അദ്ദേഹത്തിന്റെ അനുഭവപരിചയം എനിക്ക് ഏറെ ഉപകാരപ്പെട്ടു. ഇത് പറയണം, ഇത്രയേ പറയേണ്ടതുള്ളൂ എന്നൊക്കെ പറഞ്ഞ് അദ്ദേഹം സഹായിച്ചു.”
ചിത്രത്തിലെ മമ്മൂട്ടിയുടെയും വിനായകന്റെയും കഥാപാത്രങ്ങൾ വ്യത്യസ്ത ധ്രുവങ്ങളിൽ നിൽക്കുമ്പോഴും ഇരുവർക്കും അവരുടേതായ സത്യങ്ങളുണ്ട്. ആരാണ് നായകനെന്നും ആരാണ് വില്ലനെന്നുമുള്ള സസ്പെൻസ് വിനായകൻ നിലനിർത്തുന്നുണ്ട്.
അതേസമയം, ‘കളംകാവലി’ലെ തന്റെ കഥാപാത്രം ഒരു ‘നല്ല മനുഷ്യനല്ല’ എന്ന് മമ്മൂട്ടി തന്നെ അടുത്തിടെ വെളിപ്പെടുത്തിയിരുന്നു. പ്രായം കൂടുമ്പോൾ കിട്ടുന്ന അഭിനയ സാധ്യതകളെക്കുറിച്ചും സ്ഥിരം നായകവേഷങ്ങൾ വിട്ട് വ്യത്യസ്തമായ റോളുകൾ തിരഞ്ഞെടുക്കുന്നതിലെ സന്തോഷത്തെക്കുറിച്ചും അദ്ദേഹം സംസാരിച്ചു. കൂടാതെ, ചിത്രത്തിന് സീരിയൽ കില്ലർ ‘സൈനൈഡ് മോഹനുമായി’ നേരിട്ട് ബന്ധമില്ലെന്നും എന്നാൽ കഥാപാത്രത്തിന് ആ വ്യക്തിയെപ്പോലുള്ളവരുടെ ജീവിതത്തിൽ നിന്ന് പ്രചോദനം ലഭിച്ചിട്ടുണ്ടെന്നും അദ്ദേഹം വ്യക്തമാക്കി. ‘കുറുപ്പ്’ സിനിമയുടെ കഥാകൃത്തായ ജിതിൻ കെ. ജോസ് സംവിധാനം ചെയ്യുന്ന ഈ ചിത്രം മലയാള സിനിമയിലെ ഈ വർഷത്തെ ശ്രദ്ധേയ റിലീസുകളിൽ ഒന്നാണ്.
