ലാൽ ജോസ് സംവിധാനം ചെയ്ത ‘രസികൻ’ എന്ന ചിത്രത്തിലെ രസകരമായ പ്രകടനത്തിലൂടെ മലയാളികൾക്ക് സുപരിചിതനായ നടൻ ഹരി മുരളി അന്തരിച്ചു. ചിത്രത്തിൽ ദിലീപ് അവതരിപ്പിച്ച കഥാപാത്രം വിളിക്കുന്ന “കടവാവൽ” എന്ന വിളിപ്പേരിലൂടെയാണ് ഹരി ഏറെ ശ്രദ്ധിക്കപ്പെട്ടത്. അദ്ദേഹത്തിന്റെ അപ്രതീക്ഷിത വിയോഗം സിനിമാ പ്രേമികളെയും സഹപ്രവർത്തകരെയും വലിയ ദുഃഖത്തിലാഴ്ത്തിയിരിക്കുകയാണ്.
അഭിനയത്തിന് പുറമെ വിഎഫ്എക്സ് (VFX) ആർട്ടിസ്റ്റായും ഹരി മുരളി സിനിമാ മേഖലയിൽ സജീവമായിരുന്നു. ദിലീപിന്റെ സിനിമയിലെ ആ പ്രസിദ്ധമായ ഡയലോഗ് അവസാന നിമിഷം ചേർക്കപ്പെട്ടതായിരുന്നുവെന്നും അത് തന്റെ കരിയറിൽ വലിയൊരു വഴിത്തിരിവായെന്നും അദ്ദേഹം മുൻപ് വെളിപ്പെടുത്തിയിരുന്നു. അടുത്തിടെ മനോരമ ഓൺലൈനിന്റെ ‘ഓർമ്മയുണ്ടോ ഈ മുഖം’ എന്ന പരിപാടിയിൽ അദ്ദേഹം തന്റെ സിനിമാ വിശേഷങ്ങൾ പങ്കുവെച്ചിരുന്നു.
മമ്മൂട്ടിയെ ആദ്യമായി കണ്ടപ്പോഴുള്ള അനുഭവങ്ങളും അദ്ദേഹം ആ അഭിമുഖത്തിൽ അനുസ്മരിച്ചിരുന്നു. ‘രസികൻ’ എന്ന സിനിമയുടെ തുടക്കത്തിൽ തന്റെ കാലുകൾ കാണിച്ചുകൊണ്ടാണ് സിനിമ ആരംഭിക്കുന്നതെന്നും ആ സിനിമ വിജയിച്ചാലും പരാജയപ്പെട്ടാലും അത് നിന്റെ തലവരയായിരിക്കുമെന്ന് സംവിധായകൻ അന്ന് പറഞ്ഞിരുന്നതായും ഹരി ഓർത്തെടുത്തു. വർഷങ്ങൾക്ക് ശേഷം കണ്ടപ്പോൾ തന്നെ തിരിച്ചറിഞ്ഞ മമ്മൂട്ടിയുടെ ഓർമ്മശക്തിയെക്കുറിച്ചും അദ്ദേഹം വാചാലനായിരുന്നു. അഭിനയത്തോടുള്ള അടങ്ങാത്ത അഭിനിവേശം ബാക്കിവെച്ചാണ് ഹരി മുരളി വിടവാങ്ങുന്നത്.
