98-ാമത് അക്കാദമി അവാർഡ് വേദിയിൽ വിസ്മയമായി മാറിയിരിക്കുകയാണ് ഹൊറർ ത്രില്ലർ ചിത്രം ‘സിന്നേഴ്സ്’ (Sinners). ചിത്രത്തിന്റെ ഛായാഗ്രഹണം നിർവഹിച്ച ഓട്ടം ഡ്യൂറൾഡ് അർക്കപോ (Autumn Durald Arkapaw) മികച്ച സിനിമാറ്റോഗ്രാഫർക്കുള്ള പുരസ്കാരം സ്വന്തമാക്കിയതോടെ ഓസ്കർ ചരിത്രത്തിലെ പുതിയൊരു അധ്യായം കൂടി പിറന്നു. അക്കാദമി അവാർഡിന്റെ ഏകദേശം ഒരു നൂറ്റാണ്ട് നീണ്ട ചരിത്രത്തിൽ ആദ്യമായാണ് ഒരു വനിത ഈ വിഭാഗത്തിൽ പുരസ്കാരം നേടുന്നത്. ഫിലിപ്പിനോ-ക്രിയോൾ വംശജയായ ഓട്ടം ഈ നേട്ടം കൈവരിക്കുന്ന ആദ്യ കറുത്ത വർഗക്കാരി കൂടിയാണ്.
റയാൻ കൂഗ്ലർ സംവിധാനം ചെയ്ത ‘സിന്നേഴ്സ്’ ഇത്തവണ 16 നാമനിർദ്ദേശങ്ങളുമായി റെക്കോർഡ് ഭേദിച്ചാണ് മത്സരരംഗത്തെത്തിയത്. ഒടുവിൽ നാല് പ്രമുഖ പുരസ്കാരങ്ങൾ സ്വന്തമാക്കി ചിത്രം തിളങ്ങി. ഓട്ടം ഡ്യൂറൾഡിന് പുറമെ, മികച്ച നടനുള്ള പുരസ്കാരം മൈക്കൽ ബി. ജോർദാനും, മികച്ച ഒറിജിനൽ തിരക്കഥയ്ക്കുള്ള അവാർഡ് റയാൻ കൂഗ്ലറും, മികച്ച ഒറിജിനൽ സ്കോർ പുരസ്കാരം ലുഡ്വിഗ് ഗോരൻസണും നേടി. ചരിത്രപരമായ നേട്ടങ്ങൾ കൊയ്തുകൊണ്ട് 2026-ലെ ഓസ്കർ നിശയിൽ ‘സിന്നേഴ്സ്’ തങ്ങളുടെ സാന്നിധ്യം ശക്തമായി അടയാളപ്പെടുത്തി.
ഐമാക്സ് (IMAX) 65 എംഎം ഫോർമാറ്റിൽ ഒരു സിനിമ ചിത്രീകരിക്കുന്ന ആദ്യ വനിതാ ഛായാഗ്രാഹക എന്ന വിശേഷണവും ‘സിന്നേഴ്സി’ലൂടെ ഓട്ടം നേരത്തെ സ്വന്തമാക്കിയിരുന്നു. പുരസ്കാരം ഏറ്റുവാങ്ങിക്കൊണ്ട് വികാരാധീനയായി സംസാരിച്ച അവർ, സദസ്സിലുണ്ടായിരുന്ന മുഴുവൻ സ്ത്രീകളോടും എഴുന്നേറ്റു നിൽക്കാൻ ആവശ്യപ്പെട്ടത് സദസ്സിനെ കണ്ണീരണിയിച്ചു. തന്റെ ഈ നേട്ടം സിനിമാരംഗത്തെ മറ്റു സ്ത്രീകൾക്കും വരുംതലമുറയിലെ പെൺകുട്ടികൾക്കും വലിയൊരു പ്രചോദനമാകുമെന്ന് അവർ പ്രത്യാശ പ്രകടിപ്പിച്ചു. ഇതിനുമുമ്പ് ‘ബ്ലാക്ക് പാന്തർ: വക്കാണ്ട ഫോറെവർ’, ‘ലോക്കി’ തുടങ്ങിയ പ്രശസ്തമായ പ്രോജക്റ്റുകളുടെ ക്യാമറ ചലിപ്പിച്ചതും ഓട്ടമായിരുന്നു.
