അഞ്ച്​ വര്‍ഷത്തിനുള്ളില്‍ പ്രവാസികളാല്‍ ഉപേക്ഷിക്കപ്പെട്ട ഭാര്യമാരുടെ എണ്ണം 6000 കടന്നു

അഞ്ച്​ വര്‍ഷത്തിനുള്ളില്‍ പ്രവാസികളാല്‍ ഉപേക്ഷിക്കപ്പെട്ട ഭാര്യമാരുടെ 6000 പരാതികളാണ്​ ലഭിച്ചതെന്ന്​ വെളിപ്പെടുത്തലുമായി മന്ത്രി വി മുരളീധരൻ.വിദേശകാര്യ മന്ത്രലയത്തിന്റെ പുതിയ കണക്കെടുപ്പിലാണ് പരാതികളുടെ എണ്ണം മന്ത്രി വെളിപ്പെടുത്തിയത്. 2015 ജനുവരി മുതല്‍ 2019 ഒക്​ടോബര്‍ വരെയുള്ള കണക്കാണിത്​. ഈ വര്‍ഷം മാത്രം ഒക്​ടോബര്‍ 31 വരെ 991 പരാതികളാണ്​ ഇത്തരത്തില്‍ ലഭിച്ചത്​. ലോക്​സഭയില്‍ ഉന്നയിക്കപ്പെട്ട ചോദ്യത്തിന്​ വിദേശകാര്യ സഹമന്ത്രി വി. മുരളീധരനാണ്​ മറുപടി നല്‍കിയത്​.
റിപ്പോർട്ട് പ്രകാരം 2015ല്‍ 796 പരാതികളാണ്​ ലഭിച്ചത്​. ഓരോ വര്ഷം കൂടുന്തോറും പരാതികളുടെ എണ്ണം വർധിച്ചു.2016ല്‍ 1510, 2017ല്‍ 1498, 2018ല്‍ 1299 എന്നിങ്ങനെയും പരാതികള്‍ ലഭിച്ചതായി മന്ത്രി വ്യക്തമാക്കി. കഴിഞ്ഞ മൂന്ന്​ വര്‍ഷങ്ങളിലായി 77 ഇന്ത്യക്കാര്‍ വിവിധ രാജ്യങ്ങളിലായി അക​പ്പെട്ടു പോവുകയോ പിടിക്കപ്പെട്ട്​ തടവില്‍ കഴിയുകയോ ചെയ്​തിട്ടുണ്ടെന്നും മന്ത്രി വെളിപ്പെടുത്തി.ലഭ്യമായ വിവരമനുസരിച്ച്‌​ ഇതില്‍ 73 പേരും​​ ഇന്ത്യയിലേക്ക്​ തിരിച്ചെത്തിയാതായും മറ്റൊരു ചോദ്യത്തിനുള്ള മറുപടിയായി അദ്ദേഹം പറഞ്ഞു. എന്നാൽ ഒരാള്‍ തടവില്‍ കിടന്ന്​ മരിച്ചു. മറ്റ്​ മൂന്ന്​ പേര്‍ ഇപ്പോളും തടവില്‍ തുടരുകയാണ്​.​ അവരെ എത്രയും പെ​ട്ടെന്ന്​ രാജ്യത്തേക്ക്​ തിരികെയെത്തിക്കാന്‍ ഇന്ത്യ ഇടപെടലുകള്‍ നടത്തി വരുന്നുണ്ടെന്നും അദ്ദേഹം കൂട്ടിച്ചേര്‍ത്തു.ഔദ്യോഗിക വിവരമനുസരിച്ച്‌​, കുടിയേറിയ ജീവനക്കാര്‍ ഉള്‍പ്പെടെ 4823 ഇന്ത്യക്കാര്‍ ഈ വര്‍ഷം ഒക്​ടോബര്‍ 31 വരെ കുവൈത്ത്​, സൗദി അ​റേബ്യ, ബഹ്​റൈന്‍, ഖത്തര്‍, യു.എ.ഇ, ഒമാന്‍ എന്നീ രാജ്യങ്ങളിലായി​ മരിച്ചിട്ടു​ണ്ട്​. 2018ല്‍ ഇത്​ 6014 ആയിരുന്നു​.2015ല്‍ 5786​ പേരും 2016ല്‍ 6013 പേരും 2017ല്‍ 5906 പേരും ഇത്തരത്തില്‍ മരിച്ചിട്ടുണ്ടെന്നും വി. മുരളീധരന്‍ പറഞ്ഞു.