കശ്മീരില് തീവ്രവാദികളുടെ ആക്രമണത്തില് കൊല്ലപ്പെട്ട സെക്യൂരിറ്റി ഗാര്ഡ്
സഞ്ജയ് ശര്മയുടെ കുടുബത്തിന് സഹായ ഹസ്തവുമായി ബോളിവുഡ് നടന് അനുപം ഖേര്. സഞ്ജയ് ശര്മയുടെ മകള് ദിക്ഷയുടെ വിദ്യാഭ്യാസ ചെലവുകള് ഏറ്റെടുക്കുമെന്നും നടന് അറിയിച്ചു. ദിക്ഷയുടെ വിദ്യാഭ്യാസത്തിന്റെ പൂര്ണ ഉത്തരവാദിത്തം ഏറ്റെടുക്കാന് ആഗ്രഹിക്കുന്നതായി നടന് അറിയിച്ചു. ഗ്ലോബല് കശ്മീരി പണ്ഡിറ്റ് ഡയസ്പോറ എന്ന സംഘടനയോടാണ് അനുപം ഖേര് വെളിപ്പെടുത്തിയത്.
സഞ്ജയ് ശര്മ കൊല്ലപ്പെട്ടതിന് ശേഷം ഏഴ് വയസുകാരിയായ മകള് ദിക്ഷയുടെ നൊമ്പരപ്പെടുത്തുന്ന ചിത്രം സോഷ്യലിടത്ത് വൈറലായിരുന്നു. കുഞ്ഞിന്റെ ഫോട്ടോ വൈറലായതിന് പിന്നാലെയാണ് നടന് സഹായ ഹസ്തവുമായി എത്തിയത്. ദിക്ഷയ്ക്ക് ആഗ്രഹിക്കുന്നിടത്തോളം വരെ പഠിക്കാം, അതിന്റെ ചെലവുകള് എല്ലാം താന് വഹിച്ചോളാമെന്നും അനുപം ഖേര് സംഘടനയോട് വ്യക്തമാക്കി.
ബാങ്കിന്റെ എടിഎം സെക്യുരിറ്റിയായിരുന്നു സഞ്ജയ് ശര്മ. ഞായറാഴ്ച രാവിലെ ചന്തയില് നിന്ന് വീട്ടിലേക്കു നടന്നുവരുമ്പോഴായിരുന്നു അദ്ദേഹത്തിന് നേരെ തീവ്രവാദികളുടെ ആക്രമണം.
‘ദ വാക്സിന് വാര്’ എന്ന ചിത്രത്തിലാണ് അനുപം ഖേര് നിലവില് അഭിനയിച്ചുകൊണ്ടിരിക്കുന്നത്. ‘ദ കശ്മീര് ഫയല്സ്’ എന്ന ചിത്രത്തിന് ശേഷം വിവേക് അഗ്നിഹോത്രി സംവിധാനം ചെയ്യുന്ന ചിത്രമാണ് ‘ദ വാക്സിന് വാര്’. അനുപം ഖേര് അഭിനയിക്കുന്ന മൂന്നൂറ്റിയമ്പത്തി നാലാമത്തെ ചിത്രമാണ് ‘ദ വാക്സിന് വാര്’.