പ്രഭാസ് ആരാധകര്‍ ആകാംക്ഷയോടെ കാത്തിരിക്കുന്ന ചിത്രമാണ് ‘ആദിപുരുഷ്’. ചിത്രത്തിന്റെ ട്രെയിലര്‍ പുറത്തിറങ്ങിയപ്പോള്‍ വിഎഫ്എക്‌സിന്റെ പേരില്‍ നിരവധി വിമര്‍ശനങ്ങള്‍ നേരിട്ടിരുന്നു. ഇപ്പോഴിതാ ചിത്രം തിയ്യേറ്ററിലെത്താനിരിക്കുകയാണ്. ജൂണ്‍ 16-നാണ് ചിത്രം പുറത്തിറങ്ങുന്നത്.
ഇപ്പോഴിതാ ചിത്രം പുറത്തിറങ്ങുന്നതിന് മുന്‍പ് ക്ഷേത്ര ദര്‍ശനത്തിന്റെ തിരക്കിലാണ് നിര്‍മാതാവ് ഭൂഷണ്‍ കുമാറും സംവിധായകന്‍ ഓം റൗട്ടും. ഇരുവരും ജമ്മു കാശ്മീരിലെ മാതാ വൈഷ്ണോ ദേവി ക്ഷേത്രത്തില്‍ ദര്‍ശനം നടത്തി. ഇരുവരും ക്ഷേത്രത്തിന് മുന്നില്‍ നില്‍ക്കുന്ന ചിത്രം ഓം റൗട്ട് പങ്കുവച്ചിട്ടുണ്ട്.
മാര്‍ച്ച് 30-ന് ആരംഭിക്കുന്ന ആദിപുരുഷ് ക്യാംപെയ്ന് മുന്നോടിയായിട്ടാണ് ക്ഷേത്രദര്‍ശനവും. രാമായണ കഥയെ ആസ്പദമാക്കിയാണ് ചിത്രം ഒരുങ്ങുന്നത്. ഓം റൗട്ട് – പ്രഭാസ് കൂട്ടുകെട്ടിലെ ആദ്യ ചിത്രമാണ് ആദിപുരുഷ്. ചിത്രത്തില്‍ ശ്രീരാമനായിട്ടാണ് പ്രഭാസ് എത്തുന്നത്. രാവണനായി എത്തുന്നത് ബോളിവുഡ് താരം സെയ്ഫ് അലിഖാന്‍ ആണ്. നടന്‍ സണ്ണി സിങ്ങും പ്രധാന വേഷം ചെയ്യുന്നുണ്ട്.
ടി-സീരിസ്, റെട്രോഫൈല്‍ ബാനറില്‍ ഭൂഷണ്‍ കുമാറും കൃഷ്ണകുമാറും ഓം റൗട്ടും ചേര്‍ന്നാണ് ചിത്രത്തിന്റെ നിര്‍മ്മാണം. സാഹോയുടെയും രാധേ ശ്യാമിന്റെയും നിര്‍മാതാവാണ് ഭൂഷണ്‍. അദ്ദേഹത്തിനൊപ്പമുള്ള പ്രഭാസിന്റെ മൂന്നാമത്തെ ചിത്രമാണ് ആദിപുരുഷ്.